މަސްތުވާތަކެތި ގެންގުޅެ، ވިޔަފާރި ކުރާ ކަމުގެ ތުހުމަތުގައި ބަޔަކު ހައްޔަރުކޮށްފި
ބަންދާއިމެދު ގޮތެއް ނިންމުމަށް ހާޒިރުކޮށްފައިވޭ
ޝަހީދު ހުސެއިން އާދަމް ބިލްޑިން
މަސްތުވާތަކެތި ގެންގުޅެ، އޭގެ ވިޔަފާރި ކުރާ ކަމުގެ ތުހުމަތުގައި 3 މީހުން ހައްޔަރުކޮށްފިއެވެ.
ފުލުހުން ބުނީ މި މީހުން ހައްޔަރުކޮށްފައިވަނީ މަސްތުވާތަކެތި ގެންގުޅެ އެތަކެތީގެ ވިޔަފާރި ކުރާކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން މިމަހުގެ 15 ވަނަ ދުވަހު ހިންގި އޮޕަރޭޝަނެއްގައި ކަމަށެވެ.
މި މައްސަލައިގެ ތުހުމަތުގައި ހައްޔަރުކޮށްފައިވަނީ 28 އަހަރުގެ ފިރިހެނަކާއި 32 އަހަރުގެ ފިރިހެނެއްގެ އިތުރުން 31 އަހަރުގެ އަންހެނެއް ކަމަށް ފުލުހުން ބުނެފައިވެއެވެ. މި އެންމެންނަކީވެސް ދިވެހިންނެވެ.
މި މީހުންގެ ބަންދާމެދު ގޮތެއް ނިންމުމަށް އެންމެ ފުރަތަމަ ކޯޓަށް ހާޒިރުކުރުމުން 3 މީހުންގެ ބަންދަށްވެސް ދިނީ 10 ދުވަހެވެ. ދެވަނަ ފަހަރަށް ކޯޓަށް ހާޒިރުކުރުމުން އަންހެން މީހާގެ ބަންދަށް 15 ދުވަސް ދީފައިވެއެވެ. އަދި 28 އަހަރުގެ ފިރިހެން މީހާގެ ބަންދަށް 30 ދުވަސް ދީފައިވާއިރު، 32 އަހަރުގެ މީހާ ކަރެކްޝަންސްއާ ހަވާލުކޮށްފައިވާކަމަށް ފުލުހުން ބުނެއެވެ.
ފުލުހުން ދަނީ މި މައްސަލަ އިތުރަށް ތަހުގީގުކުރަމުންނެވެ.
