ޖުޑީޝަލް ސަރވިސް ކޮމިޝަންގައި ރައްޔިތުންގެ މަޖިލިސް ތަމްޞީލު ކުރުމަށް، މަޖިލިސް ރައީސް، ޢަބްދުﷲ މަސީހު މުޙައްމަދަށް މިހާރު އިންނެވޭނެ ކަމަށް ޤަބޫލު ނުކުރާ ކަމަށް އިދިކޮޅު ފަރާތްތަކުން ބުނެފިއެވެ.

ހޯމަ ދުވަހު އިދިކޮޅު ފަރާތްތަކުން ބޭއްވި ނޫސްވެރިންގެ ބައްދަލުވުމެއްގައި ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު އަލީ ޙުސައިން ވިދާޅުވީ، މަސީހުގެ އިތުބާރު ނެތްކަމަށް، މަޖިލީހުގެ މެޖޯރިޓީ މެންބަރުން މަޢުލޫއީ ގޮތުން ނިންމާފައިވާ ކަމަށާ، މިފަދަ ހާލަތެއްގައި،އެ މަޖިލިސް ތަމްޞީލު ކުރުމުގެ ބާރު މަސީހަށް ލިބިވަޑައިގެންވާކަމަށް ޤަބޫލުނުކުރައްވާ ކަމަށެވެ.

"ޖުޑީޝަލް ސަރވިސް ކޮމިޝަންގަ ރައްޔިތުންގެ މަޖިލިސް ތަމްޞީލުކުރަން ރައްޔިތުންގެ، މަޖިލީހުގެ ރައީސް އެއީ އެއްބޭފުޅެއް. މިހާރު މިއޮތީ 45 މެންބަރުން ސޮއިކޮށްފަ، ރައްޔިތުންގެ މަޖިލީހުގެ ރައީސަކީ، ރައްޔިތުންގެ މަޖިލީހުގެ މެންބަރުންގެ އިތުބާރު ނެތް ބޭފުޅެއްގެ ގޮތުގަ ކަނޑައަޅާ ނިންމާފަ. އެހެންވީމަ މަޢުލޫއީ ގޮތުން ހަޤީޤަތުގަ އެއޮތީ ރައްޔިތުންގެ މަޖިލީހުގެ ރައީސަކީ ރައްޔިތުންގެ މަޖިލީހުގެ މެންބަރުންގެ އިތުބާރު ނެތް މީހެއްގެ ގޮތުގަ ކަނޑައަޅާ ނިމިފަ. ހަމައެކަނި ބާކީ އޮތް ކަމަކީ، އިޖުރާޢީ ގޮތުން ނިންމަންޖެހޭ ނިންމުމެއް، އެއީ 24 ވަނޖަ ދުވަހު އޮންނަ ވޯޓު" އަލީ ޙުސައިން ވިދާޅުވިއެވެ.

އަލީ ޙުސައިން ވިދާޅުވީ، ކަންމިހެން ހުރުމުން، ޖޭއެސްސީއިން ނިންމާ އެއްވެސް ނިންމުމެއްގަ، ރައްޔިތުންގެ މަޖިލިސް ތަމްޞީލު ކުރެއްވުމަށް ރައްޔިތުންގެ މަޖިލީހުގެ މިހާރުގެ ރައީސަށް ބައިވެރިވެވަޑައިގެން އިންނެވޭނެ ކަމަށް އިދިކޮޅު ފަރާތްތަކުން ޤަބޫލު ނުކުރާ ކަމަށެވެ.

އިދިކޮޅު ފަރާތްތަކުން މިހެން ބުނެފައިވާއިރު، ޖޭއެސްސީން ހޯމަ ދުވަހު ބޭއްވި ބައްދަލުވުމުގައި މަޖިލިސް ރައީސް، ޢަބްދުﷲ މަސީހު ވަނީ ބައިވެރިވެވަޑައިގެންފައެވެ. މަސީހު ބައިވެރިވެވަޑައިގެންނެވި ބައްދަލުވުމުގެ އެޖެންޑާގައި އޮތީ އެކޮމިޝަންގެ ރައީސް ކަމުގެ މަގާމަށް ބޭފުޅަކު އައްޔަން ކުރުމެވެ.

މީގެ އިތުރުން، ރައްޔިތުންގެ މަޖިލީހަށް ސިޔާސީ ޕާޓީއަކުން އިންތިޚާބް ވުމަށްފަހު އެ ޕާޓީން ވަކިވުމާއި، ޕާޓީ ބަދަލަކުރުމާއި އަދި ޕާޓީން ވަކިކުރާ ހާލަތްތަކުގައި، ރައްޔިތުންގެ މަޖިލީހުގެ މެންބަރުކަން ގެއްލޭނެ ކަމަށް ކަނޑައަޅައި ދިނުމަށް އެދި، ބަންޑާރަނައިބު ސުޕްރީމް ކޯޓަށް ހުށަހެޅުއްވި މައްސަލައިގެ ފުރަތަމަ އަޑުއެހުން ހޯމަ ދުވަހު ކުރިއަށް ގެންގޮސްފައިވާއިރު، އިދިކޮޅު ފަރާތްތަކުގެ ނޫސްވެރިންގެ ބައްދަލުވުމުގައި އެ މައްސަލައާއި ގުޅޭގޮތުންވެސް ވަނީ ވާހަކަ ދައްކާފައެވެ.

މި މައްސަލައިގައި ވާހަކަ ދައްކަވަމުން، އެމްޑީޕީގެ ސެކެޓްރީ ޖެނެރަލް، އަނަސް ޢަބްދުއްސައްތާރު ވިދާޅުވީ، މިއީ ސިޔާސީ ބޭނުމެއްގައި ހުށަހަޅާފައިވާ މައްސަލައެއް ކަމަށާ، މައްސަލަ ބެލުމުގައި، ކޯޓުތަކާ ބެހޭ ޤާނޫނާއި ޚިލާފަށް ބައެއް ކަންކަން ހިނގަމުންދާ ކަމަށެވެ.

"(ޤާނޫނުގައި) ބަޔާންކުރަނީ ސުޕްރީމް ކޯޓުގެ މިބާވަތުގެ ދުސްތޫރީ މައްސަލައެއް، ސުޕްރީމް ކޯޓުގެ ތެރެއިން މަދުވެގެން 5 ފަނޑިޔާރުންގެ މައްޗަށް އެކުލެވޭ މަޖިލީހަކުންނޭ ބަލަންވާނީ. އަދި އެ މަޖިލީހުގަ އެ ހުރިހާ ފަނޑިޔާރުން ހާޒިރުވެ، ތިއްބަވަން ޖެހޭނެ ކަމަށްވެސް، އެ މާއްދާގަ މިއޮތީ ލާޒިމް ކުރައްވާފަ. އެހެންވީމަ ސުވާލު އުފެދޭ އެހިސާބުންވެސް 3 ފަނޑިޔާރުންގެ ބެންޗަކުން، މި ބާވަތުގެ މައްސަލައެއް، ސުޕްރީމް ކޯޓުން ބައްލަވަން ފެށީމަ" އަނަސް ވިދާޅުވިއެވެ.

އަނަސް ވިދާޅުވީ މި މައްސަލަ ސަރުކާރުން ބޭނުންވާ ގޮތަށް ނިމިއްޖެ ނަމަ، ސަރުކާރުގެ ގިނަ މެންބަރުންތަކެއްގެ ގޮނޑިވެސް ގެއްލޭނެ ކަމަށެވެ.  

ނޫސްވެރިންގެ ބައްދަލުވުމުގައި ވާހަކަ ދައްކަވަމުން، ވެރިކަންކުރާ ޕީޕީއެމްގެ ރައީސްގެ ފެކްޝަނުންގެ ނައިބު ރައީސާ އައިމިނަތު ނާދިރާ ވިދާޅުވީ، ޕީޕީއެމްގެ ގިނަ މެންބަރުންތަކެއް ޕީޕީއެމާއި ވަކިވެވަޑައިގަންނަވަމުން ގެންދަވި ނަމަވެސް، ވަރަށް އަވަހަށް އެ މެންބަރުން އެ ޕާޓީއަށް އެނބުރި ވަޑައިގަންނަވާނެ ކަމަށެވެ.

މި ބައްދަލުވުމުގައި އިތުރަށް ވާހަކަ ދައްކަވަމުން، އަދާލަތު ޕާޓީގެ ހާރިޖީ ގުޅުންތަކާއި ބެހޭ ކޮމިޓީގެ ރައީސާ، ޝިދާތާ ޝަރީފް ވިދާޅުވީ، ޤާނޫނީ އިމުގެ ތެރެއިން މިނިވަންކަމާއި އެކު މަސައްކަތް ކުރުމުގެ މިނިވަންކަން ރައްޔިތުންގެ މަޖިލީހުގެ މެންބަރުންނަށް ލިބިދޭން ޖެހޭ ކަމަށެވެ.

އިދިކޮޅު ފަރާތްތަކަށް ރައްޔިތުންގެ މަޖިލީހުގެ މެޖޯރިޓީ ގާތްގަނޑަކަށް ޔަޤީން ވެފައިވާއިރު، މި ދަނޑިވަޅުގައި ސަރުކާރުން ދަނީ މެންބަރުންނަށް އެކި ކަހަލަ ފިއްތުންތައް ކުރިމަތިކުރަމުންނެވެ.