މާލޭގައި ހުންނަ ސިނަމާލެ ފްލެޓުތައް ތަޅާލައި، އަލުން އެތަން އިމާރާތް ކުރުމަށް "ސިނަމާލެ ރީ ޑިވެލޮޕްމަންޓް ޕްރޮޖެކްޓް" ހިންގާނެ ބަޔަކު ހޯދަން މާލެ ސިޓީ ކައުންސިލުން އިއުލާންކޮށްފިއެވެ.

މިއީ މާލެ ސިޓީ ކައުންސިލުގެ ހަތަރުވަނަ ދައުރުގެ ސްޓްރެޓެޖިކް އެކްޝަން ޕްލޭންގައި ހިންގުމަށް ކަނޑައަޅާފައިވާ ޕްރޮޖެކްޓުތަކުގެ ތެރޭގައި ހިމެނޭ ޕްރޮޖެކްޓެކެވެ. އެހެންކަމުން އެ ކައުންސިލުން އެކުލަވާލާފައިވާ ޕްލޭނާ އެއްގޮތަށް ކުރިއަށްގެންދަން ޝައުގުވެރިވާ ފަރާތްތަކުން ޕްރޮޕޯސަލް ހުށަހެޅުމުގެ ފުރުސަތު މިހާރު ވަނީ ހުޅުވާލައިފައެވެ.

"ސިނަމާލެ ރީ ޑެވެލޮޕްމަންޓް ޕްރޮޖެކްޓް" އަށް ޝައުގުވެރިވާ ފަރާތްތަކުން އަންނަ މަހުގެ 15 ވަނަ ދުވަހުގެ މެންދުރު 1:00 ގެ ކުރިން [email protected] މެދުވެރިކޮށް ޕްރޮޕޯސަލް ހުށަހަޅަން ޖެހޭނެއެވެ. އަދި އަންނަ މަހުގެ 4ވަނަ ދުވަހުގެ މެންދުރު 1:00 ގެ ކުރިން ޕްރޮޕޯސަލް ހުށަހެޅުމަށް އީމެއިލް މެދުވެރިކޮށް ރަޖިސްޓްރީ ވާން ޖެހޭނެއެވެ.

ދެ ފިޔަވައްސަކަށް ބަހާލައިގެން ކުރިއަށްގެންދާ މި ޕްރޮޖެކްޓުގެ ދަށުން ޖުމްލަ 1500 އެޕާޓްމަންޓު ހަދަން ވަނީ ނިންމާފައެވެ. ފުރަތަމަ ފިޔަވަހީގެ ދަށުން 700 އެޕާޓްމަންޓް ހިމެނޭ ފަސް ބިލްޑިންގ އިމާރާތް ކުރުމަށް ނިންމާފައިވާއިރު ދެވަނަ ފިޔަވަހީގެ ދަށުން 800 އެޕާޓްމަންޓުގެ ފަސް ބިލްޑިން އިމާރާތް ކުރާނެއެވެ.

މި ޕްރޮޖެކްޓުގެ ދަށުން ހަދަން ނިންމާފައިވަނީ ތިން ބާވަތުގެ އެޕާޓްމަންޓުތަކެވެ. އެއީ ދެ ކޮޓަރި އާއި ތިން ކޮޓަރި އަދި ހަތަރު ކޮޓަރީގެ އެޕާޓްމަންޓުތަކެވެ. އަދި ގްރައުންޑް ފްލޯގައި ކޮމާޝަލް ޔުނިޓުތައް ހުންނައިރު ބޭސްމެންޓުގައި ޕާކިން ޒޯނެއްވެސް ތަރައްގީ ކުރުމަށް ވަނީ ހަމަޖެހިފައެވެ.

ސިޓީ ކައުންސިލުން ބުނެފައިވާ ގޮތުގައި މި ޕްރޮޖެކްޓު ހިންގުމަށް ޝައުގުވެރިކަން ފާޅު ކުރާ ކުންފުންޏަކީ ދިވެހި ކުންފުންޏެއްނަމަ ބިޑް ސެކިއުރިޓީގެ ގޮތުގައި 300،000 ރުފިޔާ ދައްކަން ޖެހޭނެއެވެ. އަދި ބޭރު ކުންފުންޏެއްނަމަ ބިޑް ސެކިއުރިޓީގެ ގޮތުގައި ދައްކަން ޖެހޭނީ 25،000 ޑޮލަރެވެ.

މި ޕްރޮޖެކްޓު ކުރިއަށްގެންދާނެ ކުންފުންޏަކު ހޮވާއިރު މުޅި ޕްރޮޖެކްޓު ހިންގުމަށް އެންމެ ކުޑަ އަގެއް ކަނޑައަޅާ ފަރާތްތަކާއި ކޮންސެޕްޓް ޑިޒައިނާއި އެ ކުންފުންޏެއްގެ ގާބިލުކަމަށް ބަލާނެއެވެ.

މިހާރު ހުރި ސިނަމާލެ އިމާރާތްތަކަކީ ގިނަ ދުވަސްވުމުގެ ސަބަބުން އެތައް މައްސަލަތަކެއް ދިމާވެފައިވާ އިމާރާތްތަކަކެވެ. މިކަމުގެ ޝަކުވާ އެތަނުގައި ދިރިއުޅޭ ފަރާތްތަކުން ވެސް ކުރެއެވެ. މިއީ ކުރީގެ ރައީސް މައުމޫން އަބްދުއްގައްޔޫމުގެ ވެރިކަމުގައި ޗައިނާގެ އެހީގައި އިމާރަތްކުރި ފުލެޓުތަކެކެވެ.