ޗެމްޕިއަންސް ލީގު ހޯދަން މޮރީނިއޯ އަށް ބަޖެޓެއް ނެތް: ޓޮޓީ
ޔޫރޮޕާ ލީގު ހޯދާނެ ކަމަށް ބެލެވެނީ މޮރީނިއޯ
ރޯމާގެ ކޯޗު ހޯސޭ މޮރީނިއޯ
އިޓަލީގެ ރޯމާގައި ޗެމްޕިއަންސް ލީގު ފުޓްބޯޅަ މުބާރާތް ކާމިޔާބުކުރަން ބޭނުންވާ ވަރުގެ ބަޖެޓެއް ނެތް ކަމަށް އެކުލަބުގެ ކުރީގެ ކެޕްޓަން ފްރޭންޗެސްކޯ ޓޮޓީ ބުނެފި އެވެ.
އޭނާ މިހެން ބުނީ މިހާރުގެ ކޯޗު ހޯސޭ މޮރީނިއޯގެ ކުރިމަގާމެދު ނޫސްވެރިން ސުވާލު ކުރުމުންނެވެ.
މޮރީނިއޯ އަކީ ޗެމްޕިއަންސް ލީގު އިޓަލީގެ އިންޓަމިލާނާއި ޕޯޗުގަލްގެ ޕޯޓޯއާއެކު ކާމިޔާބުކުރި ކޯޗެކެވެ. އޭނާ ވަނީ ރޯމާ އަށް މިދިޔަ އަހަރުގެ ކޮންފަރެންސް ލީގު ކާމިޔާބުކޮށްދީ މި އަހަރުގެ ޔޫރޮޕާ ލީގުގެ ފައިނަލަށް ގެންގޮސްދީފަ އެވެ. އަދި ޔޫރޮޕާ ލީގު ކާމިޔާބުކުރުމުގެ ފުރުސަތު ބޮޑީ ވެސް ރޯމާ އަށް ކަމަށް ޓޮޓީ ގަބޫލުކުރެ އެވެ.
މޮރީނިއޯ ދަނީ ޗެމްޕިއަންސް ލީގު ކާމިޔާބު ކުރުމުގެ ފުރުސަތު ނެތްނަމަ އެހެން ކުލަބަކަށް ދިއުމުގެ ހިޔާލު ގެންގުޅެމުންނެވެ. އޭނާ އަށް ފްރާންސްގެ ޕީއެސްޖީގެ ހުށަހެޅުމެއް ވެސް ލިބިފައިވާ ކަމަށް ވާހަކަ ދެކެވެއެވެ. އަދި ކުރިމަގާމެދު ގޮތެއް ނިންމަން މޮރީނިއޯ ވަނީ ދާދި ފަހުން ރޯމާގެ އިސްވެރިންނާ ވެސް ބައްދަލުކޮށްފަ އެވެ.
