މެނޭޖްމަންޓުގެ ސަޕޯޓެއް ނެތުމާއި ކުޅުންތެރިން ބަޣާވާތްކުރާ ކަމަށް ރިޕޯޓްތައް ބުނާ ދަނޑިވަޅެއްގައި ޕީއެސްވީގެ ކޯޗު، ވެން ނިސްޓެލްރޫއީ ކޯޗުކަމުން ވަކިވެއްޖެއެެވެ.
ޓީމުގެ މެނޭޖުމެންޓާ މަޝްވަރާ ކުރުމަށްފަހު ވެން ނިސްޓެލްރޫއީ ކޯޗުކަމުން ވަކިވީ ބުދަ ދުވަހު ކަމަށް ކުލަބުން ވަނީ ރަސްމީކޮށް އިއުލާނުކޮށްފައެވެ. ރިޕޯޓުތަކުން ދައްކާގޮތުން ގިނަ ކުޅުންތެރިންތަކެއް ވަނީ އޭނަގެ ސްޓައިލް އާއި ޓެކްޓިކްސް އާމެދު ޝަކުވާކޮށްފައެވެ. ލީގުގެ ފަހު މެޗުގައި އޭޒީ އަލްކްމާރާ ދެކޮޅަށް ނިކުންނައިރު ޓީމާ ހަވާލުވާނީ އެސިސްޓެންޓް ކޯޗު ފްރެޑް ރޫޓެން އެވެ. އެ މެޗުން އެއް ޕޮއިންޓު ލިބުނަސް، ޕީއެސްވީ އަށް ދެވަނަ ލިބި، ޗެމްޕިއަންސް ލީގުން ފުރުސަތު ލިބޭނެއެވެ.
މެންޗެސްޓާ ޔުނައިޓެޑުގެ ކުރީގެ ފޯވާޑް ވެން ނިސްޓެލްރޫއީ، މި ސީޒަން ފެށުނުއިރު ރޮޖާ ޝްމިޓްގެ ބަދަލުގައި ޕީއެސްވީއާ ހަވާލުވިއިރު، ޕްލޭއޮފް ބުރުގައި ރޭންޖާސް އަތުން ބަލިވެ ޗެމްޕިއަންސް ލީގުން ފުރުސަތު ގެއްލުނެވެ. ނަމަވެސް ވެން ނިސްޓެލްރޫއީ ވަނީ ޕީއެސްވީ އާ އެކު ކަޕު ކާމިޔާބުކޮށްފައެވެ.
