ހަސަންބެގެ މަރާ ގުޅިގެން ހުކުމްކުރި ނައުޝާދު، ޕެރޯލްގެ ދަށުން ޝަރުތުތަކަކާއެކު ދޫކޮށްލައިފި
22 މެއި 2023 | ހޯމަ 16:21މި މައްސަލާގައި ދެ މީހަކު އުމުރަށް ޖަލަށް ލާން ހުކުމްކޮށްފައިވަނީ 2015 ވަނަ އަހަރުގެ އޭޕްރީލް 23 ވަނަ ދުވަހު
ގ. އިރުފާ މުހައްމަދު ނައުޝާދު
ނ. މާފަރު ހިތްފަސޭހަގޭ ހަސަން އަބޫބަކުރު (ހަސަންބެ)، މަރާލި މައްސަލާގައި އުމުރަށް ޖަލަށްލާން ހުކުމްކޮށްފައިވާ މީހަކު ޕެރޯލްގެ ދަށުން ދޫކޮށްލައިފިއެވެ.
ހަސަންބެގެ މަރުގެ މައްސަލާގައި އުމުރަށް ޖަލަށްލުމަށް ދަށު ކޯޓުން ހުކުމްކޮށްފައިވަނީ ގ. އިރުފާ މުހައްމަދު ނައުޝާދާއި ލ. އިސްދޫ އެވަލާސްޓް މުހައްމަދު ފައިސަލެވެ. އެ ދެ މީހުންގެ މައްޗަށް ހުކުމްކޮށްފައިވަނީ 2015 ވަނަ އަހަރުގެ އޭޕްރީލް 23 ވަނަ ދުވަހުއެވެ.
މޯލްޑިވްސް ކަރެކްޝަނަލް ސަރވިސްއިން ބުނީ، މި ދެ މީހުންގެ ތެރެއިން އަހުމަދު ނައުޝާދު ޕެރޯލްގެ ފުރުސަތަށް އެދި، ހުރިހާ ޝަރުތުތަކެއް ފުރިހަމަވުމުން އޭނާ މުޖުތަމައަށް ނެރެފައިވާކަމަށެވެ. ޕެރޯލް ބޯޑުން އޭނާ މުޖުތަމައަށް ނެރެފައިވަނީ ޝަރުތުތަކެއްގެ މަތިން ވަކި މުއްދަތަކަށް ކަމަށް ކަރެކްޝަންސްއިން ބުނެފައިވެއެވެ. އޭނާ މިނިވަންވާނީ އެ މުއްދަތުގައި ހުރިހާ ޝަރުތުތަކެއް ފުރިހަމަވުމުން ކަމަށް ކަރެކްޝަންސްއިން ބުނެފައިވެއެވެ.
މި މައްސަލައަށް ބަލާއިރު ހަސަންބެ މަރުވީ ރަހީނުކުރުމުގެ ސަބަބުން ކަމަށް ހައިކޯޓުން ވަނީ ހުކުމްކޮށްފައެވެ. ހަސަންބެގެ މަރުގެ މައްސަލާގައި އެ މީހުންގެ މައްޗަށް ދައުލަތުން އުފުލީ ޓެރަރިޒަމުގެ ދައުވާއެވެ. ދައުވާގައިވާގޮތުގައި، މި ދެ މީހުންނާއި އިތުރު މީހަކު ބައިވެރިވެގެން، 2012 ވަނަ އަހަރުގެ މެއި 29 ވަނަ ދުވަހުގެ ރޭ، ހަސަންބެ ބަނުމަށްފަހު، ހިތްފަސޭހަގެއިން ވައްކަންކުރުމަށް ރާވައި، ހަސަންބެ ނިދާފައި އޮއްވައި އެ ގެއަށް ވަގަށް ވަދެ, ހަސަންބެ ރަހީނުކުރި ކަމަށެވެ.
އެގޮތުން، ހަސަންބެގެ އަނގަމަތީގައި މުހައްމަދު ފައިސަލް ޓީޝާޓެއް އަޅައި، ލޯމަތީގައި ބާލީހެއް އެޅިކަމަށް ދައުވާގައި ވެއެވެ. އަދި އަހުމަދު ނައުޝާދާއި އިތުރު މީހަކު ވެގެން އިންސިއުލޭޝަން ޓޭޕުން ހަސަންބެގެ އަތްފައި ބަނދެ، އޭނާ ރަހީނުކުރި ކަމަށްވެސް ދައުވާގައިވެއެވެ.
އެ މީހުންގެ މައްޗަށް ދައުވާކުރީ، ހަސަންބެ މަރުވީ އެމީހުންގެ އެ އަމަލުގެ ސަބަބުން ކަމަށް ބުނެއެވެ. ފުލުހުން ހިންގި ތަހުގީގައި އެ މީހުން ކުށަށް އިއުތިރާފުވިއެވެ. އެހެންނަމަވެސް، ޝަރީއަތުގައި އެ މީހުން ވަނީ އެކަން ދޮގުކޮށްފައެވެ. ހައިކޯޓުގެ ހުކުމުގައި ވާގޮތުގައި، ޝަރީއަތުގައި ދައުވާއަށް އިންކާރުކުރިނަމަވެސް، ތަހުގީގަށް އެ ދެ މީހުން ދީފައިވާ ވީޑިއޯ ބަޔާނަށް ބެލި ބެލުމުން، އެއީ މަޖުބޫރުކޮށްގެން ނަގާފައިވާ ބަޔާނެއްކަމަށް ބެލެވޭނެ ޖާގައެއްނެތެވެ.
އެ މީހުން ހިންގި އަމަލުގެ ސަބަބުން ހަސަންބެ މަރުވިއިރު، ހިތްފަސޭހަގެއިން 11،500ރ. އެ މީހުން ވަގަށް ނެގިއެވެ. މައްސަލައިގެ ލިޔެކިޔުންތަކުގައި ވާގޮތުގައި، އެ ފައިސާ ތިން މީހުންގެ މެދުގައި ބެހުމުން މީހަކަށް ލިބުނީ 3،500ރ. އެވެ. ބާކީވާ އެއްހާސް ރުފިޔާ ބޭއްވީ މުހައްމަދު ފައިސަލްގެ އަތުގައެވެ.
މި މައްސަލާގައި ހިމެނޭ ތިންވަނަ މީހަކީ ކުޑަކުއްޖެކެވެ. އެ ކުއްޖާގެ މައްޗަށްވެސް ދައުލަތުން ދައުވާކުރިއެވެ. އެހެންނަމަވެސް، އެ ކުއްޖާގެ މައްޗަށް ކުށް ސާބިތުނުވާކަމަށް ވަނީ ހުކުމްކޮށްފައެވެ.
