ފުލުހަކަށް ހަމަލާދީ ޒަހަމްކޮށްލި މައްސަލާގައި ހައްޔަރުކުރި 4 މީހުންގެ ބަންދުގެ މުއްދަތު ޖަހައިފި

ހުޅުމާލޭގައި ފުލުހަކަށް ހަމަލާދީ ޒަހަމްކޮށްލި މައްސަލާގައި ހައްޔަރުކުރި މީހުންގެ ބަންދުގެ މުއްދަތު ޖަހައިފިއެވެ.

ހުޅުމާލޭގައި ފުލުހަކަށް ހަމަލާދީ ޒަހަމްކޮށްލާފައިވަނީ މެއި މަހުގެ 21 ވީ އާދިއްތަ ދުވަހުގެ ރޭ ވަގުތެއްގައެވެ.

ފުލުހުން ބުނީ ހުޅުމާލޭގައި ފުލުހެއްގައިގައި ތަޅައި މާރާމާރި ހިންގި މައްސަލައާ ގުޅިގެން ހައްޔަރުކުރި މީހުންގެ ތެރެއިން 21 އަހަރުގެ މީހެއްގެ ބަންދަށް 15 ދުވަސް، 33 އަހަރުގެ މީހާގެ ބަންދަށް 5 ދުވަސް, އަދި 42 އަހަރު މީހާއާއި 44 އަހަރުގެ މީހާގެ ބަންދަށް 7 ދުވަސް ހުޅުމާލެ މެޖިސްޓްރޭޓް ކޯޓުން މިއަދު ޖަހައިދީފައިވާކަމަށެވެ.

މާރާމާރީގައި އަނިޔާވި ފުލުސްމީހާއަށް ހުޅުމާލެ ހޮސްޕިޓަލްގައި ފަރުވާ ދިނުމަށް އާދިއްތަ ދުވަހުގެ ރޭ ވަނީ ދޫކޮށްލާފައެވެ.

މިމައްސަލައާ ގުޅިގެން ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވީ، އެ ހާދިސާގެ ވީޑީއޯ ބަލާފައިވާ ކަމަށާއި، ގަލޮޅު ޕޮލިސް ސްޓޭޝަންގެ ސަރޖަންޓް ކޮށްފައިވާ މަސައްކަތަށް ތައުރީފްކުރައްވާ ކަމަށެވެ. އަދި ހަމަލާދީފައިވަނީ ގޭންގަކަށް ނިސްބަތްވާ ބައެއް ކަމަށް ސީޕީ ހަމީދު ވިދާޅުވިއެވެ.

މިމައްސަލަ ފުލުހުން ދަނީ ތަހުގީގުކުރަމުންނެވެ.