ސާފް ޗެމްޕިއަންޝިޕް ފުޓްބޯޅަ މުބާރާތަށް އަމާޒުކޮށް އިންޑިޔާއިން ވަރުގަދަ ސްކޮޑެއް އެކުލަވާލައިފި އެވެ.
މުބާރާތަށް ކޯޗު އިއަގޯ ސްޓިމަކް އެކުލަވާލީ 27 ކުޅުންތެރިންގެ ސްކޮޑެކެވެ. މިއީ ދެ ދުވަހެއްގެ މަތީން ހެދި މެޑިކަލް ޓެސްޓްތަކަށް ފަހު ވަރަށް މުހިންމު ހަ ކުޅުންތެރިއަކު ނުލައި އެކުލަވާލި ސްކޮޑެކެވެ. މި ހަ ކުޅުންތެރިން ދޫކޮށްލީ އަނިޔާގެ ސަބަބުންނެވެ.
ސާފް ޗެމްޕިއަންޝިޕަށް އިންޑީޔާއިން އެކުލަވާލި ޓީމުގައި ކެޕްޓަން ސުނިލް ޗެތްރީ އާއި ގޯލްކީޕަރު ގުރްޕްރީތު ސިންގާއި ޑިފެންޑަރު ޝުބާސިސް ބޯސޭ އާއި އަންވަރު އަލީ އަދި މެހްތާބް ސިންގާއި ރާހުލް ބޭކޭ އަދި މިޑްފީލްޑރު އުދަންތާ ސިންގް ފަދަ ކުޅުންތެރިން ހިމެނެ އެވެ.
އިންޑިޔާ އަކީ މި މުބާރާތުގެ އެންމެ ފަހުގެ ޗެމްޕިއަނުންނެވެ. ނަމަވެސް މި ފަހަރުގެ މުބާރާތަށް އެ ގައުމުން ކުރިން ފޮނުވަން ނިންމީ 23 އަހަރުން ދަށުގެ ޓީމެވެ. ނަމަވެސް އަންނަ އަހަރުގެ އޭޝިއަން ކަޕަށް ތައްޔާރުވުމަށް ވަރުގަދަ މެޗުތަކެއް ކުޅެން ބޭނުންވާތީވެ ސާފް ޗެމްޕިއަންޝިޕުގައި ސަރަހައްދުން ބޭރުގެ ގައުމުތައް ބައިވެރިކޮށް، ސީނިއާ ގައުމީ ޓީމަށް މި ފުރުސަތުދޭން ވަނީ ނިންމާފަ އެވެ.
