އިންޑިއަން ސުޕަ ލީގު ފުރިހަމަކުރުމަށް، ޕާޓްނަރަކަށް އިނިއެސްޓާ

އިންޑިޔާގެ ފުޓްބޯޅަ ކުރިއެރުމަށް ސްޕޭނުގެ މަޝްހޫރު ފުޓްބޯޅަ ކުޅުންތެރިޔާ އަންދްރޭސް އިނިއެސްޓާގެ އެހީތެރިކަން ދޭން ފަށައިފި އެވެ.

ބާސެލޯނާގެ ކުރީގެ ކެޕްޓަން އިނިއެސްޓާ ސްކައުޓިން ގްރޫޕުގެ ކޯޗުން ވަނީ އިންޑިޔާގެ ފުޓްބޯޅަ ފެޑަރޭޝަނުގެ އެދުމުގެ މަތިން އެ ގައުމުގައި ހަރަކާތްތެރިވާން ފަށައިފަ އެވެ.

ހަތަރު ކޯޗަކު ވެގެން ކުރާ މައިގަނޑު މަސައްކަތަކީ އިންޑިޔާގެ ކޯޗުން ތަމްރީނުކުރުމެވެ. މި ގޮތުން ފުރަތަމަ ބެޗުގައި 40 ކޯޗުން އަދި ފަހު ބެޗުގައި އިތުރު 30 ކޯޗުން ތަމްރީނުކުރާނެ އެވެ. މި ހުރިހާ ކޯޗުން ވެގެން ގާތްގަނޑަކަށް 2500 ކުދިން ސްކައުޓް ކުރުމުގެ މަސައްކަތް ކުރިއަށް ގެންދާނެ ކަމަށް ވެސް އިންޑިއަން ސުޕަލީގުން ބުނެ އެވެ.

އިންޑިއަން ސުޕަ ލީގުގެ ސީއީއޯ މެތިއު ޖޯސެފް ވިދާޅުވީ ސުޕަ ލީގު ފުރިހަމަ ކުރުމަށް ގްރާސްރޫޓް ތަމްރީނު ކުރަން އިނިއެސްޓާގެ އެހީތެރިކަން ހޯދަން ނިންމެވީ ވަރަށް ގިނަ ގޮތްގޮތަށް ވިސްނަވާފައި ކަމަށެވެ.

އޭނާ އިތުރަށް ވިދާޅުވީ މި ޕްރޮގްރާމްތަކުން ފާހަގަވާ ކުދިން ގައުމުން ބޭރަށް އިތުރު ތަމްރީނަށް ފޮނުވާނެ ކަމަށާއި އޭގެ ތެރޭގައި އިނިއެސްޓާ އެކެޑަމީ ވެސް ހިމެނޭ ކަމަށެވެ.