ނަހަމަގޮތުގައި މުވައްޒަފުން ފައިސާ ނަގާކަމަށް ބުނެ ޕާޓިކަލްސް ކުންފުނިން ދައްކަނީ ދޮގު ވާހަކަތަކެއް - އެމްޑަބްލިއުއެސްސީ

ނަހަމަގޮތުގައި މުވައްޒަފުން ފައިސާ ނަގާކަމަށް ބުނެ ޕާޓިކަލްސް ކުންފުނިން ދައްކަނީ ދޮގު ވާހަކަތަކެއް ކަމަށް އެމްޑަބްލިއުއެސްސީން ބުނެފިއެވެ.

އެމްޑަބްލިއުއެސްސީ އާއި ބެހޭގޮތުން ޕާޓިކަލްސް އިންކޮށްފައިވާ ޓްވީޓާއި ގުޅޭގޮތުން އެ ކުންފުނިން ނެރުނު ނޫސްބަޔާނުގައި ބުނެފައިވަނީ، އެމްޑަބްލިއުއެސްސީ އިން ކޮންޓްރެކްޓް އުސޫލުން ޕާޓިކަލްސް ނަމަކަށް ކިޔާ ކުންފުންޏަކާއި ހަވާލުކޮށްގެން ތައްޔާރުކޮށްފައިވާ ޓްރާންސްޕޯޓް މެނޭޖްމަންޓް އެޕްލިކޭޝަންގެ މަސައްކަތަށް ފައިސާ ނުދީ ހިފަހައްޓައި، އެ ކުންފުނީގެ މުވައްޒަފުން ނަހަމަ ގޮތުގައި ކޮންޓްރެކްޓަރ އަތުން ފައިސާ ހޯދުމަށް މަސައްކަތް ކޮށްފައި ވާކަމަށް ބުނެ، ޕާޓިކަލްސް ކުންފުނިން ކޮށްފައިވާ ޓްވީޓުގައި ބުނެފައިވާ ވާހަކަތަކަކީ ހަގީގަތާއި ހިލާފު ވާހަކަތަކެއް ކަމަށް އެމްޑަބްލިއުއެސްސީން ބުނެއެވެ.

އަދި މިކަމާއި ގުޅޭގޮތުން މީސްމީޑިއާފައި އަދި ހަބަރު ފަތުރާ ބައެއް ވަސީލަތްތައް މެދުވެރިކޮށް ދައުރުވަމުންދާ ހަބަރަކީ ވެސް ހަގީގަތާއި ހިލާފު ހަބަރެއް ކަމުގައި އެ ކުންފުނިން ވަނީ ބުނެފައެވެ.

އެމްޑަބްލިއުއެސްސީން ބުނީ މި މައްސަލައާއި ގުޅިގެން އެ ކުންފުނީގެ މުވައްޒަފުން އަދާކޮށްފައިވާ ދައުރާއި، ކޮންޓްރެކްޓަރާއި އެ ކުންފުންޏާއި ދެމެދު ކަން ހިނގައިދިޔަގޮތް ބަލާފައިވާ ކަމަށެވެ. އެގޮތުން ކުންފުނިން ޕާޓިކަލްސްއަށް ދޭންޖެހޭ ފައިސާ ނުދީ ހިފެހެއްޓުމަށް ކުންފުނީގެ އެއްވެސް މުވައްޒަފަކު މަސައްކަތް ކޮށްފައިވާ ނުވާ ކަމަށާއި، އަދި ކުންފުނީގެ އެއްވެސް މުވައްޒަފަކު ނަހަމަގޮތުގައި ކޮންޓްރެކްޓަރ އަތުން ފައިސާ ހޯދުމަށް އެއްވެސް މުއާމަލާތެއް ހިނގާފައި ނުވާކަމަށް ބުނެފައިވެއެވެ.

އަދި ކުންފުންޏާއި ޕާޓިކަލްސްއާ ދެމެދު ވެފައިވާ އެއްބަސްވުމުގައި ބިލަށް ފައިސާ ދެއްކުމަށް ބަޔާންކޮށްފައިވާ އުސޫލުތަކާއި އެއްގޮތަށް ކުންފުނިން އަމަލުކުރަމުންދާ އިރު، ފައިސާ ދެއްކުމަށް ކަނޑައަޅާފައިވާ މުއްދަތަށް ކޮންޓްރެކްޓަރަށް ފައިސާ ނުދެއްކި ލަސްވެފައި ނުވާކަމަށް ވެސް އެމްޑަބްލިއުއެސްސީން ބުނެފައިވެއެވެ.

އެމްޑަބްލިއުއެސްސީން ވަނީ މިފަދަ ހަގީގަތާއި ހިލާފު ހަބަރުތައް މިޑިއާގައި ފެތުރުމަކި އެ ކުންފުންޏާ މެދު އާންމުންގެ ތެރޭގައި އޮންނަ އިތުބާރު ގެއްލި، ޝައްކާއި ވަހުމް އުފައްދައި އެ ކުންފުނީގެ ނަން ކިލަނބު ވެގެންދާނެކަމަށް ބުނެފައެވެ. އަދި އެފަދަ ވާހަކަތައް ނުފެތުރުމަށް އެމްޑަބްލިއުއެސްސީން ވަނީ އިލްތިމާސްކޮށްފައެވެ.