ހުޅުމާލޭގައި ވަރަށް އަވަހަށް 3000 ޓަނުގެ ފެން ޕްލާންޓެއް ބެހެއްޓިގެންދާނެ: އެމްޑީ ޝާހު
މި ސަރުކާރުގައި އެހެން އެއްވެސް ސަރުކާރަކުން ނުދޭވަރަށް އިސްކަން ދީގެން ފެނާއި ނަރުދަމާގެ މަސައްކަތްތައް ކޮށްފައިވާ ކަމަށް ޝާހު ވިދާޅުވި
މޯލްޑިވްސް ވޯޓަރ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ)ގެ މެނޭޖިން ޑިރެކްޓަރު ހަސަން ޝާހް
3000 ޓަނުގެ ފެން ޕްލާންޓެއް ހުޅުމާލޭގައި ވަރަށް އަވަހަށް ބެހެއްޓިގެންދާނެކަމަށް އެމްޑަބްލިއުއެސްސީގެ މެނޭޖިން ޑިރެކްޓަރު ހަސަން ޝާހު ވިދާޅުވެއްޖެއެވެ.
ޝާހު އެފަދައިން ވިދާޅުވީ ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަފުޅު ދައްކަވަމުންނެވެ. ޝާހު ވިދާޅުވީ އެމްޑަބްލިއުއެސްސީން އަބަދުވެސް މަސައްކަތްކުރަމުން ދަނީ ފެނުގެ ކެޕޭސިޓީ އިތުރުކުރުމަށް ކަމަށެވެ. އަދި ފެނުގެ ކޮލިޓީ ހިފެހެއްޓުމަށާއި، ފެނަކީ ރައްކާތެރި ފެންކަން ކަށަވަރުކުރުމަށް ވަރަށް ޚާއްސަ އިސްކަމެއް ދެއްވާކަމަށް ޝާހު ވިދާޅުވިއެވެ. ފެނުގެ ޚިދުމަތް މެދުނުކެނޑި ކުރިއަށްގެންދެވޭކަން ކަށަވަރުކުރުމަށް ކުރަމުންދާ މަސައްކަތުގެ ތެރެއިން ވަރަށް އަވަހަށް ހުޅުމާލޭގައި ދޭތެރެ ދޭތެރެއިން ދިމާވާ ފެނުގެ ދަތިކަމަށް ހައްލު ލިބިގެންދާނެ ކަމަށް އޭނާ ވިދާޅުވިއެވެ. އެގޮތުން މިހާރު ކުރިއަށް ދަނީ ހުޅުމާލޭގައި ޤާއިމްކުރާ 3000 ޓަނުގެ ފެން ޕްލާންޓުގެ އެންމެ ފަހުގެ މަސައްކަތްތައް ކަމަށް ޝާހު ވިދާޅުވިއެވެ.
ކުރިއަށް އޮތްތަނުގައި ވެސް އިތުރު އެކްސްޓެންޝަންތައް ހުޅުމާލޭގައި ޤާއިމްކުރާނެ ކަމަށް ޝާހު ވިދާޅުވިއެވެ. އަދި މާލެ އާއި އެހެނިހެން ސަރަހައްދުތަކުގައި ވެސް ފެނަށް ނުޖެހި އުޅެވޭނެ ފަދަ އިންތިޒާމްތަކެއް ހަމަޖައްސަން މަސައްކަތް ކުރާ ކަމަށް ޝާހު ވިދާޅުވިއެވެ. ޝާހު ވަނީ މިހާރު ވެސް ރާއްޖޭގެ އެކި ހިސާބުތަކުގައި އެމްޑަބްލިއުއެސްސީގެ މުހިންމު މަސައްކަތްތަކެއް ކުރިއަށްދާކަން ފާހަގަކުރައްވާފައެވެ. އެގޮތުން މި ސަރުކާރުގައި އެހެން އެއްވެސް ސަރުކާރަކުން ނުދޭވަރަށް އިސްކަން ދީގެން ފެނާއި ނަރުދަމާގެ މަސައްކަތްތައް ކޮށްފައިވާ ކަމަށާާއި އެކަމުގެ ނަތީޖާ ވެސް ރަނގަޅު ކަމަށް ޝާހު ވިދާޅުވިއެވެ.
