8 މެޑަލް އާއެކު ޒުވާން ޓީޓީ ދެ ޓީމަށް ކާމިޔާބު

ބުދަ ދުވަހު އިންޑިއާގައި ނިމުނު ސައުތު އޭޝިއަން ޖޫނިއާ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕުން ރާއްޖޭގެ ޒުވާން ދެ ޓީމުން 8 މެޑަލް ހޯދައިފިއެވެ.

މި މުބާރާތުގައި ރާއްޖެއަށް ލިބިފައިވަނީ ދެ ރިހި މެޑައްޔާއި ހަ ލޯ މެޑައްޔެވެ. އޭގެތެރެއިން، ރާއްޖޭގެ ޗެމްޕިއަން ދީމާ ވަނީ ހަތަރު މެޑަލް ހޯދާފައެވެ. ރާއްޖެއިން ވަނީ ޑަބަލްސް އިވެންޓުތަކުން ފަސް މެޑަލްގެ އިތުރުން ޓީމް އިވެންޓުން ދެ މެޑައްޔާއި ސިންގަލްސް އިން އެއް މެޑަލް ހޯދާފައެވެ. ސިންގަލްސް ގެ ހަމައެކަނި މެޑަލް ހޯދީ ދީނާއެވެ. ދީނާއަށް ލިބިފައިވަނީ ލޯ މެޑައްޔެކެވެ.

ރާއްޖެއަށް ރިހި މެޑަލް ހޯދައިދިނީ ޖޫނިއާ މިކްސްޑް ޑަބަލްގެ ބައިން ދީމާ އަދި އަޚްޔާރުގެ ޕެއާ އާއި، ޖޫނިއާ އަންހެން ޑަބަލްސްގެ ދީމާ އަދި މިޝްކާގެ ޕެއާ އިންނެވެ.

ޑަބަލްސްގެ ބައިން ރާއްޖޭގެ ތިން ޕެއާއަކަށް ވަނީ ލޯ މެޑަލް ލިބިފައެވެ. އެއީ ފިރިހެން ޖޫނިއާ ބައިން އަޚްޔާރު އަދި ތާބިންގެ ޕެއާ އާއި، ކެޑޭޓް އަންހެން ބައިން މިޝްކާ އާއި ޒާރާގެ ޕެއާގެ އިތުރުން ކެޑޭޓް ފިރިހެން ބައިން އުމެއިރު އަދި އޯންގެ ޕެއާއެވެ. ޓީމު އިވެންޓުތަކުން ރާއްޖޭގެ ޖޫނިއާ ފިރިހެން އަދި އަންހެން ޓީމުންވަނީ ލޯ މެޑަލް ހޯދާފައެވެ.

މިފަހަރުގެ މުބާރާތުގައި ރާއްޖޭގެ އިތުރުން ބައިވެރިވީ އިންޑިއާ، ނޭޕާލް، ބަންގްލަދޭޝް، ސްރީލަންކާގެ އިތުރުން ބޫޓާންއެވެ. 2022 ވަނަ އަހަރު ރާއްޖޭގައި އޮތް މި މުބާރާތުން ވެސް ރާއްޖޭގެ ޓީމުން ވަނީ ރަނގަޅު ކާމިޔާބެއް ހޯދާފައެވެ.