މި ސީޒަނަށް ފަހު ހަތަރު ކުޅުންތެރިއަކު ދޫކޮށްލަން ލިވަޕޫލުން ނިންމައިފި އެވެ.

މި ހަތަރު ކުޅުންތެރިންނަކީ ފޯވަޑް ރޮބާޓޯ ފިރްމީނޯ އާއި މިޑްފީލްޑަރުން ކަމަށްވާ ވައިސް ކެޕްޓަން ޖޭމްސް މިލްނާއާއި އޮލްސްލައިޑް ޗެމްބްލައިން އާއި ނަބީ ކެއިތާ އެވެ. މި ހަތަރު ކުޅުންތެރިންގެ ކޮންޓްރެކްޓް އައުނުކުރަން ލިވަޕޫލުން ނިންމީ އަންނަ ސީޒަނަށް ޓީމަށް ބޮޑު ބަދަލެއް ގެނައުމަށް ކޯޗު ޔާގެން ކްލޮޕް ބޭނުންވުމުންނެވެ. މި ކުޅުންތެރިން ތެރޭގައި ފުރަތަމަ 11އިން މިދިޔަ ދެ ސީޒަނުގައި ގަވާއިދުން ޖާގަ ލިބުނު ކުޅުންތެރިއަކު ނެތެވެ. ލިވަޕޫލުން މިކުޅުންތެރިން ދޫކޮށްލާ އަނެއް ސަބަބަކީ އެކަށީގެންވާ ކުޅުމެއް ނުދެއްކޭއިރު އުމުރުން ދޮށިވަމުން ދިއުމެވެ. ލިވަޕޫލުން މިވަގުތު އެންމެ ބޮޑަށް މަސައްކަތްކުރާ އެއް ކަމަކީ ސްކޮޑް ޒުވާން ކުރުމެވެ.

މިލްނާ އާއި ފިރްމޯނީ އަކީ 2015 ވަނަ އަހަރު ލިވަޕޫލަށް ގެނައި ދެ ކުޅުންތެރިންނެވެ. 30 އަހަރަށް ފަހު ލިވަޕޫލް އިނގިރޭސި ލީގު ކާމިޔާބުކުރިއިރު މި ދެ ކުޅުންތެރިން މުހިންމު ރޯލެއް ކުޅުނެވެ. ޗެމްބަލައިން އާއި ކެއިތާ އަށް މިދިޔަ ދެ އަހަރު އެކަށީގެންވާ ކުޅުމެއް ނުދެއްކެ އެވެ.

މި ސީޒަނުގައި ލިވަޕޫލްގެ ނަތީޖާތައް ގޯސްވުމުން އަންނަ ސީޒަނުގައި ޗެމްޕިއަންސް ލީގު ކުޅުމުގެ އަމިއްލަ ބާރެއް ނެތެވެ. މިއާއެކު ޓީމު ވަރަށް ބޮޑަށް ބަދަލު ކުރުމަށް އެ ކުލަބުން ވަނީ އައު ކުޅުންތެރިން ހޯދުމަށް މަސައްކަތް ފަށައިފަ އެވެ. މި ގޮތުން ބްރައިޓަން އަށް ކުޅެމުން އަންނަ އާޖެންޓީނާގް މިޑްފީލްޑަރު އެލެކްސިސް މެކްލިސްޓާ ގަތުމަށް ލިވަޕޫލް ވަނީ ބިޑްކޮށްފަ އެވެ. އޭނާގެ އިތުރުން ޑިފެންޑަރަކާއި ކީޕަރެއް އަދި މިޑްފީލްޑަރަކާއި ފޯވަޑަކު ހޯދުމަށް ލިވަޕޫލުން ބޮޑު ހޭދައެއް ކުރާނެ ކަމަށް ބީބީސީން ބުނެ އެވެ. ލިވަޕޫލްގައި ބްރެޒިލްގެ ގައުމީ ކީޕަރު އަލިސަން ބެކާ ހުއްޓަސް އޭނާ ވަނީ މިދިޔަ ދެ ސީޒަނުގައި ގޯސްތަކެއް ހަދައިފަ އެވެ. މިހެންވެ އަންނަ ސީޒަނުގައި އޭނާ އަށް ފުރަތަމަ 11 އަށް އަރަން ޗެލެންޖް ކުރާވަރުގެ ކީޕަރެއް ހޯދަން ލިވަޕޫލް ބޭނުންވެ އެވެ.