އެވަޓަންއަށް ކުޅެމުން އަންނަ ޒުވާން ވިންގަރ އެންތަނީ ގޯޑަން ދޫކޮށްލަން ބޭނުންނުވާ ކަމަށް އެ ޓީމުގެ ކޯޗު ފްރޭންކް ލަމްޕާޑް ބުނެފިއެވެ.

ލަމްޕާޑް މިހެން ބުނީ އީއެފްއެލް ކަޕްގައި ފްލީޓްވުޑް ޓައުންއާ ދެކޮޅަށް ކުޅުނު މެޗަށް ފަހުއެެވެ. އެ މެޗު އެވަޓަން އިން ކާމިޔާބުކުރީ 1-0 އިންނެވެ. މެޗުގެ ހަމައެކަނި ލަނޑު ޖެހީ އެވަޓަންގެ ޑެމަރާއި ގްރޭއެވެ. މެޗަށްފަހު ލަމްޕާޑު ބުނީ ގޯޑަން އަކީ އެވަޓަންގެ ކުޅުންތެރިޔެއް ކަމަށެވެ. އަދި ޗެލްސީން ބޭނުންވަނީ ކޮން ގޮތެއް ކަން އެންމެނަށް ވެސް އެނގޭ ކަމަށެވެ. މީގެ އިތުރުން ލަމްޕާޑު ބުނީ ގޯޑަންއާ ދެމެދު އޮންނަނީ ވަރަށް ރަނގަޅު ގުޅުމެއް ކަމަށާއި، މައްސަލައެއް ދިމާވާނެ ފަދަ ހާލަތެއް އޮތް ކަމަށް އޭނާ އަށް ޤަބޫލު ނުކުރެވޭ ކަމަށެވެ.

ގޯޑަން ހޯދުމުގެ މަސައްކަތް ޗެލްސީން ކުރަމުން އަންނަ ކަމަށް މީޑިއާތަކުގައި ރިޕޯޓުކޮށްފައިވެއެވެ. މީޑިއާތަކުގައި ބުނެފައިވާ ގޮތުން ގޯޑަން ހޯދުމަށް ޗެލްސީން ކުރި 45 މިލިއަން ޕައުންޑުގެ ބިޑެއް އެވަޓަން އިން ވަނީ ރިޖެކްޓުކޮށްފައެވެ. އަދި މިހާރު ޗެލްސީން އަންނަނީ 50 މިލިއަން ޕައުންޑަށްވުރެ ބޮޑު އަަދަދެއްގެ ބިޑެއް ހުށަހަޅަން ތައްޔާރުވަމުން ކަމަށް ރިޕޯޓުތައް ބުނެއެވެ. ނަމަވެސް ގޯޑަން އަކީ އެވަޓަން އިން ދޫކުރާނެ ކުޅުންތެރިޔެއް ނޫން ކަމަށް މީގެ ކުރިން ވެސް ލަމްޕާޑު ވަނީ ބުނެފައެވެ.

ގޯޑަން އޭނާގެ ސީނިއަރ ކެރިއަރު ފަށާފައި ވަނީ ވެސް އެވަޓަންއިންނެވެ. 2017 ވަނަ އަހަރު އެވަޓަން އަށް ގުޅުނު ފަހުން އޭނާ ވަނީ އެ ޓީމަށް ކުޅެދިން 63 މެޗުގައި ހަތަރު ލަނޑު ޖަހާފައެވެ. އެވަޓަންގައި ހުރުމަށްފަހު އޭނާ ވަނީ ލޯނު އެއްބަސްވުމެއްގެ ދަށުން ޕްރެސްޓަން ނޯތް އެންޑަށް ކުޅެފައެވެ.