ކޮންމެ އަހަރު އެއްފަހަރު ނެރޭ ފޯބްސްގެ އެންމެ މުއްސަނދި އެތްލީޓުންގެ ލިސްޓުގައި ކްރިސްޓިއާނޯ ރޮނާލްޑޯ ފަހަތަށް ޖައްސާލުމަށް ފަހު ކޮނާ މެކްގްރެގޯ ކުރިޔަށް ޖެހިލައިފިއެވެ.

މިއަހަރު މި ލިސްޓުގެ އެންމެ ކުރީގައި ރޮނާލްޑޯ އޮތް  ނަމަވެސް އަންނަ އަހަރު ނެރޭ ރޭންކިންގައި އޭނާއަށް ލިބޭނީ ތިންވަނަ އެވެ. އެގޮތުން މި ލިސްޓުގެ އެއްވަނަ ހޯދާނެ ކަމަށް ބެލެވެނީ  ބޮކްސިން ލެޖެންޑް  ފްލޮއިޑް މޭވެދާއެވެ. އަދި ދެވަނަ ހޯދާނެ ކަމަށް ބެލެވެނީ ޔޫއެފްސީގެ އެތްލީޓު ކޮނާ މެކްގްރެގޯއެވެ.

މި ދެ އެތްލީޓުންގެ ވެސް އާމްދަނީ މިއަހަރު އިތުރުވެގެން ގޮސްފައި ވަނީ އެ ދެ އެތްލީޓުންގެ މެދުގައި ބޭއްވުނު ބޮކްސިން މެޗުގެ ސަބަބުންނެވެ. "ދަ މަނީ ފައިޓު" ގެ ނަމުން ނަންދެވުނު މި ބޮކްސިން މެޗަކީ މިހާތަނަށް ދުނިޔޭގައި ބޭއްވުނު އެންމެ އަގުބޮޑު ބޮކްސިން މެޗެވެ.

މި މެޗު ކާމިޔާބު ކުރި ފްލޮއިޑް މޭވެދާއަށް 300 މިލިއަން ޑޮލަރު ލިބިފައިވާއިރު މެކްގެރެގޯ މި މެޗުން ބަލިވި ކަމުގައި ވިޔަސް އޭނާއަށް ވަނީ 100 މިލިއަން ޑޮލަރުގެ ލިބިފައެވެ.

މިއަހަރު މީޑިއާ އާއި ވާހަކަ ދައްކަމުން މެކްގެރެގޯ ބުނެފައި ވަނީ މިއަންނަ އަހަރު ނެރޭ ލިސްޓުގައި ރޮނާލްޑޯއަށް ވުރެ ކުރިން ޖާގަ ހޯދާނެ ކަމަށެވެ. ރޮނާލްޑޯގެ އިތުރުން މެކްގްރެގޯ ވަނީ އެމެރިކާގެ ބާސްކެޓު ތަރި ލެބްރޯން ޖޭމްސްއާ އާޖެންޓީނާގެ ކެޕްޓަން ލިއޮނެލް

މެސީ އަދި ފޯމިއުލާ ވަންގެ ލުއިސް ހެމިލްޓަން ވެސް ފަހަތަށް ޖައްސާލަފައެވެ.

މިދިޔަ އަހަރުގެ ރޭންކިންގައި ރޮނާލްޑޯ އެއްވަނައަށް ހޮވުނީ 93 މިލިއަން ޑޮލަރާއެކެއެވެ. އަދި އޭނާގެ ފަހަތުން ދެވަނައަށް ރޭންކް ކުރެވިފައި ވަނީ ބާސްކެޓު ތަރި ލެބްރޯން ޖޭމްސްއެވެ.