މުސާރަ ކުޑަކޮށް، ލިވަޕޫލުގައި މަޑުކުރަން މިލްނާ އެއްބަސްވެއްޖެ
6 ޖޫން 2022 | ހޯމަ 03:32އަންނަ އަހަރުގެ ޖޫންއާ ހަމައަށް ލިވަޕޫލުގައި މަޑުކުރަނީ
މިލްނާ ލިވަޕޫލްގެ ކޯޗު ކްލޮޕްއާއެކު
މުސާރަ ކުޑަކޮށް ލިވަޕޫލުގައި މަޑުކުރަން އެ ޓީމަށް ކުޅެމުން އަންނަ ޖޭމްސް މިލްނާ އެއްބަސްވެއްޖެއެވެ.
ކުޅިވަރު ނޫސްވެރިޔާ ފެބްރީޒިއޯ ރޮމާނޯ ބުނި ގޮތުގައި މިލްނާ ވަނީ އޭނާގެ މުސާރަ ކުޑަކުރަން އެއްބަސްވެފައެވެ. އަދި ލިވަޕޫލުގައި އިތުރު އެއް އަހަރު މަޑުކުރަން ނިންމާފައެވެ. އެހެންކަމުން 2023 ވަނަ އަހަރުގެ ޖޫން މަހާ ހަމައަށް އޭނާ ލިވަޕޫލުގައި މަޑުކުރާނެއެވެ. މިލްނާ ލިވަޕޫލުގައި މަޑުކުރަން އެ ޓީމުގެ ކޯޗު ޔާގަން ކްލޮޕް ބޭނުންވާ ކަމަށް ވެސް ރޮމާނޯ ވަނީ ބުނެފައެވެ.
ލިވަޕޫލާއެކު އޭނާ ހަދާފައިވާ އެއްބަސްވުމުގެ މުއްދަތު މި ސީޒަނުގެ ނިޔަލަށް ހަމަވާނެއެވެ. އެހެންކަމުން މިދިފަ ފެބުރުއަރީ މަހުގެ ތެރޭގައި ލިވަޕޫލުން ވަނީ އޭނާއަށް އިތުރު އެއް އަހަރުގެ އެއްބަސްވުމެއް ހުށަހަޅާފައެވެ. އަދި އެ އެއްބަސްވުމުގައި ވަނީ މުސާރަ ކުޑަކުރުމަށް ވެސް ހިމަނާފައެވެ.
އުމުރުން 36 އަހަރުގެ މިލްނާ ލިވަޕޫލަށް ބަދަލުވީ 2015 ވަނަ އަހަރުއެވެ. ލިވަޕޫލަށް ބަދަލުވުމުގެ ކުރިން އޭނާ ވަނީ މެންޗެސްޓަރ ސިޓީ، އެސްޓަން ވިލާ، ނިއުކާސަލް ޔުނައިޓެޑް އަދި ލީޑްސް ޔުނައިޓެޑަށް ވެސް ކުޅެފައެވެ. މިލްނާ ވަނީ މިހާތަނަށް ލިވަޕޫލަށް 289 މެޗު ކުޅެދީ 26 ލަނޑު ޖަހާފައެވެ. އަދި އޭނާ ވަނީ ލިވަޕޫލާއެކު ހަ ތައްޓެއް ހޯދާފައެވެ. އޭގެ ތެރޭގައި އިނގިރޭސި ޕްރިމިއަރ ލީގު، އެފްއޭ ކަޕް، އީއެފްއެލް ކަޕް، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބް ވޯލްޑް ކަޕް އެއް ފަހަރު ކާމިޔާބުކުރުން ހިމެނެއެވެ.
މިލްނާ ވަނީ 2009 ވަނަ އަހަރުން ފެށިގެން 2016 ވަނަ އަހަރާ ދެމެދު އިންގްލޭންޑުގެ ގައުމީ ޓީމަށް ވެސް ކުޅެފައެވެ. އޭނާ ވަނީ ގައުމީ ޓީމަށް 61 މެޗު ކުޅެދީ، އެއް ލަނޑު ޖަހާފައެވެ.
