ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް, މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ން ވަކިކުރިކަން އިލެކްޝަންސް ކޮމިޝަނުން މަޖިލީހަށް އަންގައިފިއެވެ.
ހަރުކަށި ފިޔަވަޅުތަކަކާއި ޝަރުތުތަކަކާއެކު މެދު ހެންވޭރު ދާއިރާގެ މެންބަރު އަލީ އާޒިމް އެމްޑީޕީން ވަކިކުރުމަށް އެ ޕާޓީގެ ފިޔަވަޅު އަޅާ ކޮމިޓީން ނިންމާފައިވަނީ އަންގާރަ ދުވަހުއެވެ. އެގޮތަށް ނިންމީ ޕާޓީގެ ފިޔަވަޅު އަޅާ ކޮމިޓީއަށް ހުށަހަޅާފައިވާ މައްސަލައަކާ ގުޅިގެން، މޭއި 16 ވަނަ ދުވަހުއެވެ.
އާޒިމާމެދު އެފަދަ މައްސަލައެއް ހުށަހެޅި އެއް ސަބަބަކީ ބަންޑާރަ ނައިބު އިބްރާހީމް ރިފްއަތުގެ އިތުބާރު ނެތްކަމަށް ރައްޔިތުންގެ މަޖިލީހަށް މައްސަލަ ހުށަހެޅުމަށް ސޮއިކުރެއްވުމެވެ. މީގެ އިތުރުން ރައީސް އިބްރާހީމް މުހައްމަދު ސާލިހަށް ފާޑުވިދާޅުވެ، ދެކޮޅު ހެދުމަށް ބޭއްވި ނޫސްވެރިންގެ ބައްދަލުވުމެއްގައި އާޒިމް ބައިވެރިވެވަޑައިގަތް މައްސަލަވެސް ހުށަހަޅާފައިވެއެވެ.
އެމްޑީޕީގެ ފިޔަވަޅު އަޅާ ކޮމިޓީން ވަނީ، އެ ކޮމިޓީން ބެލި ބެލުމުން ފާހަގަކުރެވުނު ކަންކަމުގެ ތެރޭގައި؛ އޭނާގެ މައްޗަށް ތުހުމަތުކުރާ ދެ މައްސަލާގައިވެސް އާޒިމްގެ ބައިވެރިވެވަޑައިގަތުން އޮތް ކަމަށް ބުނެފައެވެ. އަދި ރިފްއަތަކީ އެ ޕާޓިގެ ސިޔާސަތުތައް ތަންފީޒުކުރެއްވުމަށް މަސައްކަތްކުރައްވާ ބަންޑާރަނައިބު ކަމަށް ވާއިރު، އޭނާގެ އިތުބާރު ނެތްކަމަށް ހުށަހެޅުމަށް ސޮއިކުރެއްވުމަކީ ޕާޓީގެ ސިޔާސަތުތަކާއި ދެކޮޅުވެވަޑައިގަތުން ކަމަށް ކޮމިޓީން ވަނީ އިއްތިފާގުވެފައެވެ.
އަދި ރައީސް ސާލިހަކީ އެމްޑީޕީގެ ރިޔާސީ ކެނޑިޑޭޓް ކަމަށް ވުމާއި، އެމްޑީޕީއަށް ނިސްބަތްވެވަޑައިގަންނަވާ ރައީސަކަށް ފާޑުކިޔުމުގެ ގޮތުން ބޭއްވި ނޫސްވެރިންގެ ބައްދަލުވުމެއްގައި އާޒިމް ބައިވެރިވެވަޑައިގަތުމަކީ ޕާޓީގެ މަސްލަހަތަށް ގެއްލުންތަކެއް ވެދާނެ ކަމެއްކަން އެ ކޮމިޓީން ފާހަގަކޮށްފައިވެއެވެ.
އެމްޑީޕީގެ ފިޔަވަޅު އަޅާ ކޮމިޓީން ވަނީ އާޒިމް 1 އަހަރުދުވަހަށް ޕާޓީން ވަކިކުރުމަށް ނިންމާފައެވެ. އަދި 1 އަހަރު ދުވަހަށްފަހުވެސް ޕާޓީގެ މެމްބަރަކަށް ވެވަޑައިގެންނެވޭނީ، މެމްބަރަކަށް ވުމަށް އެދޭ ފޯމާއެކު، މުޅިން އަލަށް ވަންނަ 100 މެމްބަރުންގެ ފޯމު ހުށަހެޅުއްވުމުން ކަމަށް ވަނީ ޝަރުތުކޮށްފައެވެ. އަދި އޭނާއަށް 16 މެއި 2023ން ފެށިގެން 5 އަހަރު ވަންދެން ޕާޓީގެ އެތެރޭގެ އެއްވެސް މަގާމަކަށް ކުރިމަތިނުލެއްވުމާއި، ޕާޓީގެ އެއްވެސް ޕްރައިމަރީއެއްގައި ބައިވެރިވެވަޑައިނުގެންނެވޭ ގޮތަށް ވަނީ ކަނޑައަޅާފައެވެ.
