4 މެންބަރުންނަށް ފިޔަވަޅު އެޅުން - ކޮމިޓީން ނިންމީ ނަސޭހަތްދިނުމަށްފަހު އިސްލާހުނުވާނަމަ ފިޔަވަޅު އެޅުމަށް
16 މެއި 2023 | އަންގާރަ 08:02އޭޕްރިލް މަހުގެ 27 ވަނަ ދުވަހު އެމްޑީޕީގެ ޕީޖީ ގްރޫޕްގެ ލީޑަރު މުހައްމަދު އަސްލަމް ވަނީ ފައްޔާޒް އަށް ސިޓީފުޅެއް ފޮނުއްވާފައި
ނަސޭހަތް ދިން ހަތަރު މެންބަރުން
އެމްޑީޕީއަށް ނިސްބަތްވާ, ރައްޔިތުންގެ މަޖިލީހުގެ ހަތަރު މެންބަރަކާމެދު ފިޔަވަޅު އަޅައިދިނުމަށް އެމްޑީޕީގެ ޕީޖީން އެދުނު މައްސަލައިގައި އެ މެންބަރުންނަށް ނަސޭހަތް ދިނުމަށް އެމްޑީޕީގެ ފިޔަވަޅު އަޅާ ކޮމިޓީން ނިންމައިފިއެވެ.
އެމްޑީޕީގެ ޕީޖީން ފިޔަވަޅު އަޅަން އެދިފައިވަނީ؛ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީއާއި، ހެންވޭރު ހުޅަނގު ދާއިރާގެ މެންބަރު ހަސަން ލަތީފާއި، ހުޅުދޫ ދާއިރާގެ މެންބަރު އިލްޔާސް ލަބީބުގެ އިތުރުން ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުއްލަތީފާ މެދުގައެވެ. އެގޮތަށް އެދިފައިވަނީ އެމްޑީޕީގެ ޗެއަރޕަރސަން ފައްޔާޒް އިސްމާއީލަށް އެޑްރެސްކުރައްވައި އޭޕްރިލް މަހުގެ 27 ވަނަ ދުވަހު އެމްޑީޕީގެ ޕީޖީ ގްރޫޕްގެ ލީޑަރު މުހައްމަދު އަސްލަމް ފޮނުއްވި ސިޓީފުޅެއްގައެވެ.
މި ސިޓީގައި ޕީޖީ ގްރޫޕްގެ ހިންގާ ޤަވާއިދުގައި މެންބަރުން އަމަލުކުރަންޖެހޭ އުސޫލުތަކާއި ޚިލާފުވާ ކަމަށާއި ތަކުރާރުކޮށް ގަވާއިދާ ޚިލާފަށް އަމަލުކުރަމުންދާކަމަށް އަސްލަމް ވިދާޅުވެފައިވެއެވެ. މީގެ އިތުރުން، ސަރުކާރު ބަދުނާމުވާގޮތަށް ގަރާރުތަކާއި މައްސަލަތައް ހުށަހެޅުމާއި، ސަރުކާރުން މަޖިލީހަށް ފޮނުވާ މައްސަލަތަކާއި ބިލުތަކުގެ މަސައްކަތް ލަސްކުރުމާއި، ހުރަސް އެޅުމުގެ އަމަލުތައް އެ މެމްބަރުންގެ ފަރާތުން ފެންނަކަަމަށް ވެސް ވަނީ ވިދާޅުވެފައެވެ. އެހެންކަމުން 19 އެޕްރީލް 2023ގައި ބޭއްވި ޕާލިމެންޓަރީ ގްރޫޕްގެ ބައްދަލުވުމުން، 5 މެންބަރަކަށް ފިޔަވަޅު އެޅުމަށް އެމްޑީޕީގެ ފިޔަވަޅުއަޅާ ކޮމިޓީއަށް ފޮނުއްވަން ނިންމެވީކަމަށް އެ ސިޓީގައިވެއެވެ.
ފިޔަވަޅު އަޅާ ކޮމިޓީން ނިންމާފައި ވަނީ އެ ހަތަރު މެންބަރުންނަށް ވެސް ނަސޭހަތްތެރިވުމަށެވެ. އަދި އެފަދަ އަމަލެއް ތަކުރާރުކޮށްފިނަމަ އެ މެންބަރުންނާމެދު ފިޔަވަޅު އެޅުމަށް ވަނީ ނިންމާފައެވެ.
އެމްޑީޕީގެ ފިޔަވަޅު އަޅާ ކޮމިޓީން ވަނީ މެދުހެންވޭރު ދާއިރާގެ މެންބަރު އަލީ އާޒިމް ޕާޓީން ވަކިކުރުމަށް ނިންމާފައެވެ.
