ހަރުކަށި ފިޔަވަޅުތަކަކާއި ޝަރުތުތަކަކާއެކު އާޒިމް ޕާޓީން ވަކިކޮށްފި

ހަރުކަށި ފިޔަވަޅުތަކަކާއި ޝަރުތުތަކަކާއެކު މެދު ހެންވޭރު ދާއިރާގެ މެންބަރު އަލީ އާޒިމް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ވަކިކުރުމަށް އެ ޕާޓީގެ ފިޔަވަޅު އަޅާ ކޮމިޓީން ނިންމައިފިއެވެ.

އެ މައްސަލަ މައްސަލަ އެމްޑީޕީގެ ފިޔަވަޅު އަޅާ ކޮމިޓީ އަށް ހުށަހަޅާފައި ވަނީ 15 މޭއި 2023 ވަނަ ދުވަހުއެވެ.

Advertisement

ބަންޑާރަ ނައިބު އަލްއުސްތާޛު އިބްރާހީމް ރިފްއަތުގެ އިތުބާރު ނެތްކަމަށް ހުށަހެޅި މައްސަލާގައި މެދު ހެންވޭރު ދާއިރާގެ މެންބަރު އަލީ އާޒިމް ހިމެނިވަޑައިގަންނަވާކަމުގެ މައުލޫމާތު ލިބިވަޑައިގެންފައިވާތީ، އެމްޑީޕީގެ ޕާލިމެންޓަރީ ގްރޫޕްގެ ލީޑަރު މުހައްމަދު އަސްލަމް ވަނީ އެކަން ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ގެ ޗެއަރޕަރސަން ފައްޔާޒް އިސްމާއީލުގެ ސަމާލުކަމަށް ގެންނަވާފައެވެ. އަސްލަމް އެކަންކަން ފައްޔާޒްގެ ސަމާލުކަމަށް ގެންނެވީ އޭނާ ފޮނުއްވި ސިޓީއެއްގައެވެ.

އަސްލަމްވަނީ މައްސަލައިގައި އެމްޑީޕީގެ ވެރިކަމެއްގައި، ސަރުކާރުގެ ވަޒީރެއްގެ އިތުބާރު ނެތްކަމަށް އިދިކޮޅު ފަރާތްތަކުން އިސްވެ ހުށަހަޅާ މައްސަލައެއްގައި އެ ޕާޓީގެ މެންބަރުން ބައިވެރިވުމަކީ ޕާޓީގެ މަސްލަހަތަށް ބުރޫއަރާފަދަ ކަމެއް ކަމުގައި ދެކެވަޑައިގަންނަވާކަމަށް ވިދާޅުވެފައެވެ. އަދި އެ އަމަލަކީ ޕާލިމަންޓަރީ ގްރޫޕުގެ ހިންގާ ގަވާއިދުގައި ބަޔާންކުރާ އުސޫލުތަކާ ޚިލާފު އަމަލެއްކަމުގައި ދެކެވަޑައިގަންނަވާ ކަމަށްވެސް އަސްލަމް ވަނީ ވިދާޅުވެފައެވެ. އެ ސިޓީފުޅު ފައްޔާޒަށް ފޮނުއްވާފައިވަނީ 14 މޭއި 2023ގައެވެ. މީގެ އިތުރުން ރައީސް ޞާލިހު އަށް ފާޑުކިޔާ ދެކޮޅު ހެދުމަށް ބޭއްވި ނޫސްވެރިންގެ ބައްދަލުވުމެއްގައި އާޒިމް ބައިވެރިވި މައްސަލަ ވެސް ހުށަހަޅާފައިވެއެވެ.

އެ މައްސަލަ ބަލާ ގޮތެއް ނިންމާފައި ވަނީ 16 މޭއި 2023ގައެވެ.

އެމްޑީޕީގެ ފިޔަވަޅު އަޅާ ކޮމިޓީން ބެލި ބެލުމުން ފާހަގަކުރެވުނު ކަންކަމުގެ ތެރޭގައި އޭނާގެ މައްޗަށް ތުހުމަތުކުރާ ދެ މައްސަލައިގައި ވެސް އާޒިމްގެ ބައިވެރިވުން އޮތް ކަމަށް ބުނެފައިވެއެވެ. އަދި ރިއްފަތު އަކީ އެ ޕާޓިގެ ސިޔާސަތުތައް ތަންފީޒުކުރުމަށް މަސައްކަތްކުރައްވާ ބަންޑާރަނައިބު ކަމަށް ވާއިރު އޭނާގެ އިތުބާރު ނެތް ކަމަށް ހުށަހެޅުމަށް ސޮއިކުރުމަކީ ޕާޓީގެ ސިޔާސަތުތަކާއި ދެކޮޅު ކަމަށް ކޮމިޓީން ވަނީ އިއްތިފާގުވެފައެވެ.

އަދި ރައީސް ޞާލިހު އަކީ އެމްޑީޕީގެ ރިޔާސީ ކެނޑިޑޭޓް ކަމަށް ވުމާއި އެމްޑީޕީ އަށް ނިސްބަތްވެވަޑައިގަންނަވާ ރައީސް އަކަށް ފާޑުކިޔުމުގެ ގޮތުން ބޭއްވި ނޫސްވެރިންގެ ބައްދަލުވުމެއްގައި އާޒިމް ބައިވެރިވެވަޑައިގަތުމަކީ ޕާޓީގެ މަސްލަހަތަށް ގެއްލުންތަކެއް ވެދާނެ ކަމެއް ކަމަށް އެ ކޮމިޓީން ފާހަގަކޮށްފައިވެއެވެ. އަދި އެއީ މެމްބަރަކު ޕާޓީން ވަކިކުރަން އެކަށީގެންވާ ސަބަބެއްކަމަށް އަސާސީ ގަވާއިދަށް ބަލާލުމުން އެނގޭ ކަމަށް ބުނެފައިވެއެވެ. ހަމައެންމެ އާޒިމް އަކީ ޕީޖީ ގްރޫޕްގެ މެމްބަރަކަށް ވެފައި ޕާޓީގެ އިސް މަޤާމުތައް ފުރުއްވާ ބޭފުޅުން ކުރައްވާ ޤަވާއިދާއި ޚިލާފު ކަންކަމަކީ ސީިރިއަސް މައްސަލަތަކެއްގެ ގޮތުގައި ބަލަން ޖެހޭ ކަމަށް ކޮމިޓީން ވަނީ ބުނެފައެވެ.

އަދި ޕާޓީގެ އަސާސީ ޤަވާއިދާއި މަގްސަދުތަކާއި އުސޫލުތައް ދިފާއުކުރުމުގައި ޕީޖީ ގްރޫޕްގެ މެމްބަރުންގެ ޒިންމާ ބޮޑު ކަމަށާއި، އެ ފަރާތްތަކުން ޕާޓީގެ މެމްބަރުންނަށާއި ރައްޔިތުންނަށް ޖަވާބުދާރީ ވާންޖެހޭ މިންވަރުވެސް ބޮޑު ކަމަށް ބުނެފައިވެއެވެ. އެކަންކަމަށް ބެލުމަށް ފަހު އާޒިމް 1 އަހަރުދުވަހަށް ޕާޓީން ވަކިކުރުމަށް ވަނީ ނިންމާފައެވެ. އަދި 1 އަހަރު ދުވަހަށް ފަހު ވެސް ޕާޓީގެ މެމްބަރުކަމަށް ވުމަށް އެދޭ ފޯމާއި އެކު މުޅިން އަލަށް ވަންނަ 100 މެމްބަރުންގެ ފޯމާއި އެކުގައި ކަމަށް ވަނީ ޝަރުތުކޮށްފައެވެ. އަދި އޭނާ އަށް 16 މޭއި 2023 އިން ފެށިގެން ޕާޓީގެ އެތެރޭގެ އެއްވެސް މަޤާމަކަށް ކުރިމަތި ނުލެވުމާއި، ޕާޓީގެ އެއްވެސް ޕްރައިމަރީ އެއްގައި ބައިވެރި ނުވެވޭ ގޮތަށް ވަނީ ކަނޑައަޅާފައެވެ.