ވާދަވެރި އެސްޕަނިޔޯލް 4-2އިން ބަލިކޮށް ބާސެލޯނާއިން ސްޕެނިޝް ލީގުގެ ޗެމްޕިއަންކަން ހޯދައިފި އެވެ.

ލީގުގައި ބާކީހަތަރު މެޗު އޮއްވައި ބާސެލޯނާ އަށް ތަށި ޔަގީންވީ 34 މެޗުން 85 ޕޮއިންޓް ލިބިގެންނެވެ. ދެ ވަނާގައިވާ އެންމެ ފަހުގެ ޗެމްޕިއަން ރެއާލް މެޑްރިޑަށް ލިބިފައިވަނީ 34 މެޗުން 71 ޕޮއިންޓެވެ މިހެންވެ ބާކީ ހުރީހާ މެޗަކުން ބާސެލޯނާ ބަލިވެ، ރެއާލް މޮޅުވިޔަސް ކުރި ލިބޭނީ ބާސެލޯނާ އަށެވެ. މިއީ ބާސެލޯނާއިން ލީގު ކާމިޔާބުކުރި 27 ވަނަ ފަހަރެވެ. އަދި މިއީ 219 ވަނަ އަހަރުގެ ފަހުން ބާސެލޯނާ ލީގު ޗެމްޕިއަންކަން ހޯދި ފުރަތަމަ ފަހަރެވެ.

އެސްޕަނިޔޯލް އާއި ބާސެލޯނާ އަކީ އެއް ސަހަރަކަށް ނިސްބަތްވާ ވަރަށް ވާދަވެރި ދެ ޓީމެވެ. މިހެންވެ މެޗަށް ފަހު އެސްޕަނިޔޯލްގެ ދަނޑުގައި ބާސެލޯނާ ކުޅުންތެރިން އުފާ ފާޅުކުރަން ފެށުމުން އެކަން އެ ޓީމުގެ ސަޕޯޓަރުން ދަނޑަށް އަރައި ހުއްޓުވި އެވެ. ސަޕޯޓަރުން ދަނޑަށް އެރުމާއެކު ސެކިއުރިޓީންގެ އެހީގައި ބާސެލޯނާގެ ކުޅުންތެރިން އަވަހަށް ޗޭންޖިން ރޫމަށް ގެންދިޔަ އެވެ. އަދި ސަޕޯޓަރުން ދަނޑުން ބާލައި ސްޓޭޑިއަމް ހުސްކުރަން ސެކިއުރިޓީން އަވަސް ފިޔަވަޅުތަކެއް އަޅަންޖެހުނެވެ.

މި މެޗުގައި ބާސެލޯނާ އަށް ޕޮލެންޑްގެ ކެޕްޓަން ރޮބަޓް ލެވޮންޑޯސްކީ ދެ ގޯލު ޖަހައިދިނެވެ. މިއާއެކު މި ސީޒަނުގައި އޭނާ ޖެހިގޯލުގެ އަދަދު ވަނީ 30 ފަހަނައަޅައި ގޮސްފަ އެވެ. އަނެއް ދެ ގޯލު ޖެހީ އެލެކްސް ބަލްޑޭ އާއި ހޫލްސް ކޫންޑޭ އެވެ.

މިއީ ކުރީގެ ކެޕްޓަން ޒަވީ ހަނާންޑޭޒް ހަވާލުވި ފަހުން ބާސެލޯނާ ލީގު ޗެމްޕިއަންކަންހޯދި ފުރަތަމަ ފަހަރެވެ. މިދިޔަ ސީޒަނުގެ މެދުތެރެއިން ޓީމާ ހަވާލުވުމަށްފަހު އޭނާ ވަނީ މިސީޒަނުގެ ސްޕެނިޝް ސުޕަކަޕް ވެސް ކާމިޔާބުކޮށްފަ އެވެ.

މެޗަށް ފަހު ޒަވީ ބުނީ ތަށި ލިބުނީ ކުޅުންތެރިންގެ ބުރަ މަސައްކަތުން ކަމަށާއި ކުޅުންތެރިންނާއި ސަޕޯޓަރުންނާއި މެނޭޖްމަންޓަށް ޝުކުރު އަދާކުރާ ކަމަށެވެ.