މޫލީ މެދުވެރިކޮށް އަންހެނުންނަށް އެމީހުންގެ އުފެއްދުންތައް މާކެޓް ކުރުމުގެ ފުރުސަތު ފަހިވެގެންދާނެ
ވިއަމްގެ ޗެއާޕާސަން ޝާއިރާ ސަލީމް
ވިމެން އެންޓަރޕްރިނިއަރސް އެސޯސިއޭޝަން މޯލްޑިވްސް (ވިއެމް)ން އުރީދޫގެ މޫލީ މެދުވެރިކޮށް އަންހެނުންގެ ވިޔަފާރިތައް ކުރިއެރުވުމުގެ ފުރުސަތު ފަހިކޮށްދެމުންދާކަމަށް ވިއެމްގެ ޗެއާޕާސަން ޝާއިރާ ސަލީމް ވިދާޅުވެއްޖެއެވެ.
ވިއެމް އިން މޫލީ މެދުވެރިކޮށް އަންހެނުންގެ ވިޔަފާރިތައް ކުރިއެރުވުމަށް ކުރަމުންދާ މަސައްކަތްތަކާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ޝާއިރާ ވިދާޅުވީ މޫލީ މެދުވެރިކޮށް އަންހެނުން އުފައްދާ އުފެއްދުންތައް ޕްރޮމޯޓްކުރުމުގެ ފުރުސަތު ފަހިވެގެންދިޔައީ އީދު ދުވަހު ކުރިޔަށްދިޔަ އީދު ހަދިޔާ ޕްރޮގްރާމުންކަމަށެވެ. އޭގެފަހުން މޫލީ މެދުވެރިކޮށް ވިއެމްގެ މެމްބަރުންނަށް އެމީހުންގެ އުފެއްދުންތައް ޕްރޮމޯޓްކުރުމުގެ ފުރުސަތު ފަހިކޮށްދެމުންދާކަމަށް ޝާއިރާ ވިދާޅުވިއެވެ.
މޫލީ އާ ގުޅޭގޮތުން ވިއެމްގެ މެމްބަރުންނަށް މައުލޫމާތު ދީ އެފުރުސަތު ފަހިކޮށްދެމުންދާކަމަށް ޝާއިރާ ވިދާޅުވިއެވެ.
މޫލީ މެދުވެރިކޮށް ހިދުމަތް ދެމުންދާ ގޮތާއި ގުޅޭގޮތުން ޕްރޮގްރާމްގައި ވާހަކަދައްކަވަމުން އުރީދޫގެ އެސިސްޓަންޓް މެނޭޖަރ ޕީއާރު ނާއިފާ ޖިހާދު ވިދާޅުވީ މޫލީ މެދުވެރިކޮށް އަންހެނުންނަށް އެމީހުންގެ އުފެއްދުންތައް ގިނަ ބަޔަކަށް ފޯރުކޮށްދިނުމުގެ ފުރުސަތު ފަހިވެގެންދާކަމަށެވެ. މޫލީ އަކީ އޮންލައިން ޝޮޕިން މާކެޓަކަށް ވާއިރު މިމާކެޓް ބޭނުންކޮށްގެން ރާއްޖޭގެ ހުރިހާ ހިސާބަކަށްވެސް އެބަޔެއްގެ ޕްރޮޑަކްޓްތައް ވިއްކުމުގެ ފުރުސަތު ފަހިވެގެންދާނެކަމަށެވެ.
އަދި ކޮންމެ ހިސާބަކަށްވެސް ހިލޭ ޑެލިވަރކޮށްދޭނެކަމަށް ނާއިފާ ވިދާޅުވިއެވެ.
ޝާއިރާ ވިދާޅުވީ ވިއެމްގެ މެމްބަރުންނަށް ނޫނަސް މޫލީ މެދުވެރިކޮށް ވިޔަފާރިތައް ރަޖިސްޓްރީކޮށް ކުރިޔަށްގެންދިޔުމުގެ ފުރުސަތު ވިއެމް އިން ފަހިކޮށްދޭނެކަމަށެވެ. އަދި ވިއެމް އިން އަބަދުވެސް މަސައްކަތްކުރަމުން އަންނަނީ އަންހެން ވިޔަފާރިވެރިންނަށް ފުރުސަތުތައް ފަހިކޮށްދީ މާކެޓް ކުރާނެ ގޮތްތައް ހޯދައިދިނުމަށް ކަމަށެވެ.
