ވަރަށް ބާރުގަދަ، ގެއްލުން ބޮޑު ތޫފާނެއްކަމަށްވާ ސައިކްލޯން މޯޗާ ބަންގްލަދޭޝްގެ އިރުދެކުނުގެ ހިސާބުތަކަށް އަރާނެ ކަމަށް ބަލައި، އެ ހިސާބުގައި ދިރިއުޅޭ ބައިމިލިއަނެއްހާ މީހުން އެހެން ހިސާބުތަކަށް ގެންދިޔުމުގެ މަސައްކަތް އެ ޤައުމުގެ ސަރުކާރުން ފަށައިފި އެވެ.
ތޫފާން އަރާނެ ކަމަށް ލަފާކޮށްފައިވަނީ އާދީއްތަ ދުވަހުއެވެ. މި ތޫފާނުގައި ގަޑިއަކު 170 ކިލޯމީޓަރުގެ ބާރު މިނުގައި ވައިޖެހި، ކަނޑުގެ ބާނި އުފުލި، 12 ވަރަކަށް ފޫޓުގެ އުސް ރާޅުތައް އުފެދޭނެ ކަމަށް ކަމާބޭހޭ އިދާރާތަކުން އަންދާޒާކޮށްފައިވެއެވެ.
ބަންގްލަދޭޝްގައި އޮންނަ ކޮކްސް ބާޒާރަކީ ދުނިޔޭގައި ވެސް އޮތް އެންމެ ބޮޑު ރެފުޖީ ކޭމްޕަށްވާއިރު ތޫފާނުގެ ސަބަބުން އެ ސަރަހައްދަށް ގެއްލުންތައް ލިބޭނެ ކަމަށް ދަނީ ބެލެވެމުންނެވެ. ހޮނިހިރު ދުވަހުން ފެށިގެން އެ ހިސާބަށް ވާރޭވެހެން ފަށާފައިވާ ކަމަށާއި އަންނަން އުޅޭ ތޫފާނުގެ އިންޒާރު ދީ މުޅި އެ ހިސާބުގައި ރަތް ދިދަތައް ނަގާފައިވާ ކަމަށް ވެސް ޚަބަރު ލިބެއެވެ.
ތޫފާން މޯޗާ ވެގެން ދާނީ ފާއިތުވި ވިއްސަކަށް އަހަރުތެރޭގައި ވެސް ބަންގްލޭޝްއަށް އަރާ އެންމެ ބާރުގަދަ އަދި ނުރައްކާތެރި ތޫފާނަށް ކަމަށް ވެއެވެ. ތޫފާނުގެ މިސްރާބު ހޮނިހިރު ދުވަހުގެ އިރުއޮއްސުނުއިރު ބަންގްލަދޭޝް އަދި މިޔަންމާގެ އައްސޭރި ފަށާ ދިމާލަށް ހުރި އިރު، ކައިރި ހިސާބުތަކުގެ އެއާޕޯޓުތައް ބަންދުކޮށް މަސްވެރިން އެއްގަމަށް ގެނުވާ، އަދި 1،500 އެއްހާ ވަގުތީ ހިޔާ ގާއިމުކޮށް މީހުން ބަދަލުކުރުމުގެ މަސައްކަތް ވަނީ ފަށާފައެވެ.
އަވަށްޓެރި މިޔަންމާއިން ހިޖުރަކޮށްފައިވާ މިލިއަނެއްހާ ރޮހިންޔާ މުސްލިމުން ކޮކްސް ބާޒާރު ކިޔާ ރެފިއުޖީ ކޭމްޕުގައި، ދަނޑިއާއި އޮނު އަދި ސަތަރިފަދަ އެއްޗެހިން ހަދާފައިވާ ބަލިބަލި ގެތަކުގައި އުޅެމުންދާއިރު، ތޫފާނުގެ ސަބަބުން އެންމެ ބޮޑަށް ގެއްލުންވާނެ ކަމަށް ބެލެވެމުން ދަނީ އެ ހިސާބުތަކަށެވެ. މި ތޫފާނުގައި ބޯވާރޭއާއެކު ގަދަވައި ޖެހޭނެ ކަމަށް ފޯކާސްޓުކޮށްފައިވާތީ މިކަމަށް ތައްޔާރުވަމުންދާކަމަށް އޮފިޝަލުން މައުލޫމާތު ދީފައިވެއެވެ. އަދި އެންމެ އިސްކަމެއް ދޭނީ މީހުންގެ ފުރާނަ ސަލާމަތްކުރުމަށް ކަމަށް ވެސް ބުނެފައިވެއެވެ.
އަވަށްޓެރި މިޔަންމާއަށް ވެސް ހުކުރު ދުވަހުން ފެށިގެން މޫސުން ވަރަށް ގޯސްވެފައިވާއިރު ގިނަ ބަޔަކު ރައްކާތެރި ޝެލްޓަރުތަކަށް ދަތުރު ކުރަމުންދާކަމަށް ޚަބަރު ލިބެއެވެ. މިޔަންމާގެ ގޭސް އަޅާ ތަންތަން ވެސް ހޮނިހިރު ދުވަހު ބަންދުކޮށްފައިވުމުން ކާރުތަކުގައި ދުރަށް ދަތުރުކުރަން ބޭނުންވި މީހުންނަށް ދަތިތަކާ ވަނީ ކުރިމަތިވެފައެވެ.
