އަނބިމީހާއަށް ގެވެށި އަނިޔާ ކުރި އިންޑިއާ މީހަކު ހައްޔަރުކޮށްފި

އަނބިމީހާއަށް އަނިޔާ ކުރި މައްސަލައެއްގައި އިންޑިއާ މީހަކު ހައްޔަރުކޮށްފިއެވެ.

މި މައްސަލައާ ގުޅިގެން ހައްޔަރުކޮށްފައިވަނީ އުމުރުން 53 އަހަރުގެ އިންޑިއާ ފިރިހެނެކެވެ. އޭނާ ހައްޔަރުކޮށްފައިވަނީ ގެވެށި އަނިޔާއާއި، މާރާމާރީ، އަދި ބިރުދެއްކުމާއި އިންޒާރު ދިނުމުގެ ކުށުގެ ތުހުމަތުގައެވެ.

އޭނާ 15 ދުވަހަށް ބަންދުކުރުމަށް ކްރިމިނަލް ކޯޓުން ވަނީ އަމުރުކޮށްފައެވެ. އޭނާގެ ބަންދުގެ މުއްދަތު ހަމަވާނީ 27 މެއި 2023 ގައެވެ.

މި މައްސަލާގައި ހެކީގެ ގޮތުގައި ފުލުހުން ވަނީ އަނިޔާ ލިބުނު ފަރާތުގެ ބަޔާނާއި، ފޮޓޯތައްވެސް ހުށައަޅާފައެވެ.

އޭނާ ބަންދުކުރުމަށް އަމުރުކޮށްފައިވަނީ މުޖުތަމައުގެ ސަލާމަތަށް ނުރައްކާވެދާނެތީއާއި ހެތްކަށް ނުފޫޒު ފޯރުވާފާނެތީއެވެ.

ކޯޓު އަމުރުގައި ބަޔާންކޮށްފައިވާގޮތުގައި އޭނާ ވަނީ އަނބިމީހާއަށް ބޮޑެތި އަނިޔާތަކެއް ދީފައެވެ. އަނިޔާތަކުގެ ބާވަތަށް ބަލާއިރުވެސް، އޭނާ ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކާ އޮވެދާނެކަމަށް ފެންނަކަމަށް ބުނެފައިވެއެވެ.

އޭގެ އިތުރުން، އޭނާ އަނިޔާކޮށްފައިވަނީ އޭނާގެ އަނބިމީހާއަށްކަމަށްވާއިރު، އެ މަންޒަރު ފެނުނީ އޭނާގެ އަނބިމީހާގެ ދެ ދަރިންނަށްކަމަށްވާތީ، އަނިޔާލިބުނު ފަރާތާއި، މަންޒަރު ދުށް ފަރާތްތަކަށް ނުފޫޒު ފޯރުވުމުގެ އިހުތިމާލުވެސް އޮތްކަމަށް ކޯޓު އަމުރުގައި ވަނީ ބަޔާންކޮށްފައެވެ.

އޭނާ ހައްޔަރުކޮށްފައިވަނީ ގާނޫނީ އިޖުރާއަތުތަކާ އެއްގޮތަށެވެ.

ކްރިމިނަލް ކޯޓުގައި މި އަމުރު ނެރުއްވީ ގާޒީ އަލީ ނަދީމެވެ.