ނެޕީއެއް ޖަހައިގެން މަސްތުވާތަކެތި ރާއްޖެއަށް އެތެރެކުރަން އުޅުނު ދިވެހި ފިރިހެނަކު އިންޑިއާއިން ހައްޔަރުކޮށްފިއެވެ.

އިންޑިއާގެ ނޫސްތަކުން ރިޕޯޓްކުރި ގޮތުގައި، ސެންޓްރަލް އިންޑަސްޓްރީ ސެކިއުރިޓީ ފޯހުން، ޔޫސުފް ފުއާދު ނަމަކަށް ކިޔާ ދިވެއްސަކު ހައްޔަރުކުރީ ކޮޗިން އެއާޕޯޓުންނެވެ. އޭނާ ހައްޔަރުކުރި ވީޑިއޯ އިން ފެންނަ ގޮތުގައި، މަސްތުވާތަކެތި އެތެރެކުރަން އޭނާ ހުރީ ނެޕީއެއް ޖަހައިގެންނެވެ.

އިންޑިއާގެ ނޫސްތަކުން ރިޕޯޓްކޮށްފައިވާގޮތުގައި މަސްތުވާތަކެއްޗާއެކު ހައްޔަރުކުރި، ދިވެހި މީހާގެ ހަށިގަނޑު މަސްތުވާތަކެތީގެ ބާވަތެއް ކަމަށް ބެލެވޭ 33 ކެޕްސޫލު ފެނިފައިވާކަމަށް ބުނެފައިވެއެވެ. އަދި އެ މަސްތުވާތަކެތީގެ އަގު 748،000ރ އާއި ގާތްކުރާނެކަމަށްވެސް މީޑިއާއިން ބުނެފައިވެއެވެ.

އިންޑިއާގެ ސެންޓްރަލް އިންޑަސްޓްރީ ސެކިއުރިޓީ ފޯހުން ވަނީ ޔޫސުފް ފުއާދު ހައްޔަރުކޮށް އޭނާގެ ހަށިގަނޑުގައި ފޮރުވާފައިވާ މަސްތުވާތަކެތި ހޯދާ ވީޑިއޯ ސޯޝަލް މީޑިއާގައި ޢާންމުކޮށްފައެވެ. އެގޮތުން އެ ވީޑިއޯއިން ފެންނަގޮތުގައި އޭނާ ރާއްޖެއަށް މަސްތުވާތަކެތި އެތެރެކުރަން މަސައްކަތްކުރީ "ނެޕީ"އެއް ޖަހައިގެން އޭގެ އެތެރޭގައެވެ. މަސްތުވާތަކެތީގެ މި މައްސަލައާއި ގުޅިގެން އޭނާ މިވަގުތު ހުރީ އެންސީބީގެ ބެލުމުގެ ދަށުގައިކަމަށް އިންޑިއާގެ މީޑިއާއިން ވަނީ ރިޕޯޓްކޮށްފައެވެ.