ޞިއްޙީ ދާއިރާއިން ރާއްޖެ ހޯދި ކޮންމެ ކާމިޔާބީއެއްގައި ޑަބްލިޔޫ.އެޗް.އޯގެ ހިއްސާ ވަރަށް ބޮޑު: ރައީސް

ޞިއްޙީ ދާއިރާއިން ރާއްޖެ ހޯދި ކޮންމެ ކާމިޔާބެއްގައި ޑަބްލިޔޫ.އެޗް.އޯ.ގެ ހިއްސާ ވަރަށް ބޮޑުކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ދުނިޔޭގެ ސިއްހަތު ދުވަސް ފާހަގަކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން ރައީސް ޞާލިހު ވިދާޅުވީ ޑަބްލިޔޫ.އެޗް.އޯ.އާއި ދިވެހި ރައްޔިތުންނާ ދެމެދު ވަރަށް ދުވަސްވީ ވަރަށް ގާތް ގުޅުމެއް އެބައޮތްކަމަށެވެ. ޑަބްލިޔޫ.އެޗް.އޯ.ގެ އޮފީހެއް ރާއްޖޭގައި ހުޅުވުނީ، ރާއްޖެއަށް މިނިވަންކަން ލިބުނު އަހަރު ނަމަވެސް އޭގެ އެތައް އަހަރެއް ކުރިން، ޑަބްލިޔޫ.އެޗް.އޯ.ގެ އެހީތެރިކަން ދިވެހިރާއްޖެއަށް ލިބެމުން އައިސްފައިވޭ.ވާކަމަށް ރައީސް ވިދާޅުވިއެވެ. އަދި އ.ދ. މަޖިލީހުގެ އިދާރާތަކުގެ ތެރެއިން ރާއްޖޭގައި ހުޅުވުނު އެންމެ ފުރަތަމަ އިދާރާއަކީވެސް ޑަބްލިޔޫ.އެޗް.އޯކަމަށް ރައީސް ވިދާޅުވިއެވެ.

ޑަބްލިޔޫ.އެޗް.އޯ.ގެ 75 އަހަރުގެ ތާރީޚަށް ބަލާއިރު، ދިވެހިންނަށް ޞިއްޙީ ދުޅަހެޔޮކަން ހޯދައިދީ، ބަލިތަކާއި ވަބާތަކުން ދިވެހިން ސަލާމަތް ކުރުމުގައި، ޑަބްލިޔޫ.އެޗް.އޯ. އަދާކުރު ދައުރު ވަރަށް މުހިންމުކަމަށް ރައީސް ވިދާޅުވިއެވެ. ބަލިތަކާއި ވަބާތަކުން ދިވެހިން ރައްކާތެރިކުރުމަށް ދިވެހި ދައުލަތުގެ ފަރާތުން އުފުލި ކޮންމެ ބުރައެއްގައި، އެންމެ ފުރިހަމަ އެއްބާރުލުމެއް ދިނީ ޑަބްލިޔޫ.އެޗް.އޯ.އިން ކަން ޝުކުރުވެރިކަމާއެކު ފާހަގަކުރައްވާކަމަށް ރައީސް ވިދާޅުވިއެވެ.

މީގެއިތުރުން 2019 ވަނަ އަހަރުގެ ތެރޭގައި މައިންގެ ފަރާތުން ތުއްތު ދަރިފުޅަށް އެޗްއައިވީ އާއި ސިފިލިސް ވާސިލުނުވާ ގައުމެއްގެ ގޮތުގައި ރާއްޖެ ކަނޑައެޅިގެންދިޔައީވެސް ޑަބްލިޔުއެޗްއޯގެ އެހީތެރިކަމާއެކު ކަމަށް ރައީސް ވިދާޅުވިއެވެ. މީގެއިތުރުން 2020 ވަނަ އަހަރު ރުބެއްލާ ބަލި ނައްތާލެވިފައިވާ ގައުމެއްގެ ގޮތުގައި ރާއްޖެ ކަނޑައެޅިގެންދިޔައީވެސް ޑަބްލިޔުއެޗްއޯގެ އެހީތެރިކަމާއެކު ކަމަށް ރައީސް ވިދާޅުވިއެބެ.

ކޮވިޑް ވެކްސިން ދިނުމަށް މުޅި ރާއްޖޭގައި ހިންގި ޕްރޮގްރާމްގައި ޑަބްލިޔުއެޗްއޯގެ އެހީތެރިކަން ވަރަށް ބޮޑަށް ލިބިގެންދިޔަކަމަށް ރައީސް ވިދާޅުވިއެވެ.

ރާއްޖޭގައި ޑަބްލިޔޫ.އެޗް.އޯ.ގެ އޮފީހެއް ހުޅުވިފަހުން މިވީ 58 އަހަރުގެ ތެރޭގައި، ދިވެހި ރައްޔިތުންގެ ޢާންމު ޞިއްޙަތު ރައްކާތެރިކުރުމުގެ ދާއިރާއިން، އެ ޖަމްޢިއްޔާއިން އަދާކޮށްފައިވަނީ ދިވެހި ކޮންމެ ރައްޔިތަކު ޝުކުރުވެރިކަމާއެކު ބަލައިގަންނާނެ ދައުރެއްކަމަށް ރައީސް ވިދާޅުވިއެވެ.

ރައީސް ވިދާޅުވީ ޑަބްލިޔޫ.އެޗް.އޯ.ގެ ކަންޓްރީ ކޯޕަރޭޝަން ސްޓްރެޓަޖީއަކީ، ރާއްޖޭގެ ޞިއްޙީ ޚިދުމަތް ތަރައްޤީކުރުމަށް ބޭނުންވާ ފަންނީ އެހީތެރިކަން ފޯރުކޮށްދިނުންކަމަށެވެ. އެ ސިޔާސަތުގެ ދަށުން، ޔުނިވަރސަލް ހެލްތް ކަވަރޭޖް ކަށަވަރުކުރުމާއި، ޞިއްޙަތާ ގުޅުން ހުރި ދެމެހެއްޓެނިވި ތަރައްޤީގެ ލަނޑުދަނޑިތައް ޙާޞިލުކުރުމުގައި ޑަބްލިޔޫ.އެޗް.އޯ.ގެ ފަންނީ ލަފާ މިހާރުވެސް ރާއްޖެއަށް ލިބެމުންދާކަމަށެވެ.

އަދި އެ ނޫން ކިތަންމެ ދާއިރާއަކުންވެސް ޑަބްލިޔޫ.އެޗް.އޯ.ގެ އެހީތެރިކަން ވަރަށް ފުޅާ ދާއިރާއެއްގައި މިހާރުވެސް ރާއްޖެއަށް ލިބޭކަމަށް ރައީސް ވިދާޅުވިއެވެ.