112 ހެލްތު ސެންޓަރަކަށް، ލޭއަޅަން ބޭނުންވާ ސާމާނު ހަދިޔާކޮށްފި

ރާއްޖޭގެ ސިއްހީ ޚިދުމަތް އިތުރަށް ފުޅާކޮށް ހަރުދަނާކުރުމަށްޓަކައި، ލެބޯޓްރީ ގާއިމުކުރެވިފައިވާ 112 ހެލްތު ސެންޓަރަކަށް، ލޭ އަޅަން ބޭނުންވާ ސާމާނު ހެލްތު މިނިސްޓްރީން ހަދިޔާކޮށްފިއެވެ.

މިނިސްޓްރީ އޮފް ހެލްތުން، އަތޮޅުތެރޭގެ ރަށްރަށުގައި ގާއިމުކޮށްފައިވާ 112 ހެލްތު ސެންޓަރަކަށް ލޭ އެޅުމަށް ބޭނުންވާ ސާމާނުގެ ގޮތުގައި ހަދިޔާކޮށްފައިވާ ތަކެތީގެ ތެރޭގައި؛ ބްލަޑް ބޭންކް ރެފްރިޖަރޭޓަރާއި, ބްލަޑް ކަލެކްޝަން މޮނިޓަރާއި, ޝޭކަރާއި ޕްލެސެންޓާ އެކްސްޓްރެކްޓަރާއި، ވޭން މެޝިން ހިމެނެއެވެ.

އެންމެ ފުރަތަމަ މިތަކެތި ހަވާލުކޮށްފައިވަނީ ކ އަތޮޅުގެ ލެބޯޓްރީ ގާއިމުކޮށްފައިވާ ސިއްހީ މަރުކަޒުތަކަށެވެ. ކުރިޔަށް އޮތް ދެ ހަފުތާތެރޭގައި މިތަކެތި ދެން ހުރި މަރުކަޒުތަކަށް ހަވާލުކުރާނެކަމަށް ހެލްތު މިނިސްޓްރީން ބުނެއެވެ.

މިތަކެތި ރަށްރަށަށް ހަވާލުކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ހެލްތު މިނިސްޓަރު އަހުމަދު ނަސީމް ވިދާޅުވީ، އަތޮޅުތެރޭގެ ރަށްރަށުގެ ސިއްހީ ފަރުވާގެ ނިޒާމު ވަރުގަދަކުރުމަށް ސަރުކާރުން ގިނަ މަސައްކަތްތަކެއް ކުރަމުން ގެންދާކަމަށެވެ.

މިތަކެތި ހަދިޔާކޮށްފައިވަނީ މިހާރުގެ ހާލަތަށް ބަލާއިރު އެކަމަށް އެންމެ އެކަށީގެންވާ ތަންތަން ބެލުމަށްފަހުގައި ކަމަށް ހެލްތު މިނިސްޓްރީން ބުނެއެވެ. މީގެ ސަބަބުން މިތަކެތި ފޮނުވުނު ރަށްރަށުގެ އިތުރުން، ރަށާ ކައިރި އެހެން ރަށްރަށަށްވެސް މިކަމުގެ ލުއިފަސޭހަ ލިބިގެންދާނެ ކަމަށް މިނިސްޓްރީން ބުނެއެވެ.

މިތަކެތި ހޯދާފައިވަނީ އިސްލާމިކް ޑިވެލޮޕްމަންޓް ބޭންކުން ފަންޑުކޮށްގެން ހެލްތު މިނިސްޓްރީން ކުރިޔަށްގެންދާ އިމަރޖެންސީ ރެސްޕޮންސް ޓު ކޮވިޑް-19 ޕެންޑަމިކް ފޭސް 2 ޕްރޮޖެކްޓްގެ ދަށުންނެވެ. ހަދިޔާކުރެވުނު މިތަކެތީގެ އަގު 19 މިލިއަން ރުފިޔާއަށް އަރައެވެ.

ރަށްރަށަށް ހަދިޔާ ކުރެވުނު މިތަކެއްޗާއެކު، ސަރުކާރުގެ މުހިއްމު އެއް ސިޔާސަތުކަމުގައިވާ ސިއްހީ ފަރުވާ އަތޮޅުތެރޭގައި ފުޅާކޮށް ފަރުވާއަށް މާލެއަށް ބަރޯސާވުން ހުއްޓުވުމަށް ބޮޑު ބާރަކަށްވެގެންދާނެ ކަމަށް ހެލްތު މިނިސްޓްރީން ފާހަގަކުރެއެވެ. ސަރުކާރުގެ މިއަމާޒަށް ވާސިލުވުމަށް ރާއްޖޭގެ 5 ސަރަހައްދެއްގައި ޓާޝަރީ ފެންވަރުގެ ހޮސްޕިޓަލް ތަރައްގީކުރުމުގެ މަސައްކަތްވެސް އަންނަނީ ކުރައްވަމުންނެވެ.