މޮޓޯކޭޑަށް ހުރަސް އެޅި މައްސަލައިގައި ސަލާމަތީ ކަންކަމާ ގުޅޭ ސިފައިންގެ އިސްވެރިޔާގެ އިހުމާލެއް ނެތް
10 މެއި 2023 | ބުދަ 10:28މައްސަލަ ބެލުމަށްޓަކައި މަސްޢޫލިއްޔަތާއި ޒިންމާތަކުން އެކަހެރިކުރެވުނު
ރައީސްގެ ސެކިއުރިޓީގެ ކޮމާންޑިން އޮފިސަރަކަށް ހުންނެވި އަބްދުﷲ އިބްރާހިމް
ރައީސް އިބްރާހިމް މުހައްމަދު ޞާލިހުގެ މޮޓޯކޭޑަށް ބަޔަކު ހުރަސް އެޅި މައްސަލައިގައި ސަލާމަތީ ކަންކަމާ ގުޅޭ ސިފައިންގެ އިސްވެރިޔާ ކާނަލް އަބްދުﷲ އިބްރާހިމްގެ އިހުމާލެއް ފެންނަން ނެތްކަމަށް އެމްއެންޑީއެފުން ބުނެފިއެވެ.
އެމްއެންޑީއެފުން މި މައުލޫމާތުތައް ހާމަކޮށްފައި މިވަނީ ކާނަލް އަބްދުﷲ އިބްރާހިމްއަށް ބްރިގޭޑިއާ ޖެނެރަލްކަން ދިނުމާއި ގުޅިގެން ބައެއް ނޫސްތަކުން އެ ޚަބަރު ރިޕޯޓު ކޮށްފައިވާތީއެވެ. އެގޮތުން ރައީސް އިބްރާހިމް މުހައްމަދު ޞާލިހުގެ މޮޓޯކޭޑަށް ބަޔަކު ހުރަސް އެޅި މައްސަލައިގައި ސަލާމަތީ ކަންކަން ފެއިލް ވެފައިވާކަމަށް ކަމަށް ބެލެވޭތީ، އެ މަނިކުފާނުގެ ސަލާމަތީ ކަންކަމާ ގުޅޭ ސިފައިންގެ އިސްވެރިޔާ ކަމުން ސަސްޕެންޑްކުރި އޮފިސަރަށް ބްރިގޭޑިއަރ ޖެނެރަލްކަމުގެ މަޤާމު ދީފައިވާކަމަށް ބުނެ ނޫސްތަކުން ވަނީ ރިޕޯޓު ކޮށްފައެވެ.
ދިވެހިރާއްޖޭގެ ޤައުމީ ދިފާއީ ބާރުން 21 މާރޗު 2023 ގައި ނެރުނު ނޫސްބަޔާނެއްގައި ވަނީ ޕްރެޒިޑެންޝަލް ގާޑްސްގެ ކޮމާންޑިންގ އޮފިސަރުގެ މަގާމުގައި ހުންނެވި ކާނަލް އަބްދުﷲ އިބްރާހިމް މަސްޢޫލިއްޔަތާއި ޒިންމާތަކުން އެކަހެރިކުރެވުނުކަން ހާމަކޮށްފައެވެ.
ދިފާއީ ބާރުން މައުލޫމާތު ދޭ ގޮތުގައި އެގޮތަށް ޒިންމާތަކުން އެކަހެރި ކޮށްފައިވަނީ ސިފައިންގެ ތެރޭގައި އަމަލުކުރަމުން އަންނަ ޕްރޮސިޖަރތަކާއި އެއްގޮތްވާ ގޮތުގެ މަތިން ބަލަންޖެހޭ ކަންތައްތަކެއް ބެލުމުގެ ގޮތުންނެވެ.
އޭގެ އިތުރުން، ސިފައިންގެ ވަޒީފާއާއި ބެހޭ ޤަވާއިދުގެ ދަށުން "ސިފައިންގެ މުވައްޒަފުން ވަޒީފާއިން ސަސްޕެންޑް ކުރުން" އެ މާއްދާގެ ދަށުން އަޅާފައިވާ ފިޔަވަޅެއް ނޫންކަމަށްވެސް އެ އިދާރާއިން މައުލޫމާތު ދެއެވެ.
އަދި މިގޮތަށް ކޮމާންޑަރުން އަދާކުރައްވާ ޒިންމާއާއި މަސްއޫލިއްޔަތުތަކުން ވަގުތީގޮތުން އެކަހެރިކުރަނީ އެފަދަ ކަންކަމުގެ އިންކުއަރީ އެއްވެސް ފަރާތެއްގެ ނުފޫޒެއްނެތި އިންސާފުވެރިކަމާއެކު ހިންގުމަށްކަންވެސް އެމްއެންޑީއެފުން ފާހަގަ ކޮށްފައިވެއެވެ.
އެމްއެންޑީއެފުން މައުލޫމާތު ދޭ ގޮތުގައި މި މައްސަލަ ބެލި ބެލުމުން، ކޮމާންޑިންގ އޮފިސަރުގެ އެއްވެސް އިހުމާލެއް ފެންނާކަށް ނެތެވެ.
ރައީސް އިބްރާހީމް މުހައްމަދު ޞާލިހުގެ މޮޓޯކޭޑަށް ހުރަސްއެޅި މައްސަލައިގައި ކަން ހިނގާ ދިޔަ ގޮތް ސާފުކުރުމަށާއި، ސަލާމަތީ ބާރުތަކުން އަމަލުކުރި ގޮތާއިގުޅޭ ގޮތުން ރައްޔިތުންގެ މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމެޓީންވަނީ ސަލާމަތީ ބާރުތަކާ ބައްދަލުކޮށްފައެވެ.
ރައީސްގެ މޮޓޯކޭޑް ހުއްޓުވީ، ހުޅުމާލޭގައި ބޭއްވި ރެހެންދި އެވޯޑް ހަފްލާއަށް ފަހު، އެ މަނިކުފާނު ބޮޑުތަކުރުފާނު މަގުން ވަޑައިގަންނަވަނިކޮށް ޕީޕީއެމް އޮފީސް ސަރަހައްދުންނެވެ. މިހާދިސާ ހިނގާފައި ވަނީ 13 މާރޗްގައެވެ.
