4000 ހައުސިންގ ޔުނިޓުގެ ފިނިޝިންއަށް އިތުރު ލޯނެއް ނަގަން ނުޖެހޭނެ: އެފްޑީސީ
މިހާރު ނަގާފައިވާ ލޯނުން ހުރިހާ ޔުނިޓުތަކެއްގެ ފިނިޝިންގ މަސައްކަތް ނިންމޭނެ
އަމާން އުދަރެސް ފްލެޓުތައް
ހުޅުމާލެ ދެވަނަ ފިޔަވަހީގައި މިސަރުކާރުން ހިންގާ 4000 ހައުސިންގ ޔުނިޓުގެ މަޝްރޫއުގެ ދަށުން ފިނިޝިންގެ މަސައްކަތަށް އިތުރު ލޯނު ނެގުމަށް ފަހި ދިރިއުޅުން ކޯޕަރޭޝަނުން މަސައްކަތް ކުރަމުން އަންނަ ކަމަށް ބުނެ ފަތުރަމުން އަންނަ ވާހަކަތަކަށް އެ ކުންފުނިން ރައްދު ދީފިއެވެ.
އެ ކުންފުނިން އަންގާރަ ދުވަހު ނެރުނު ބަޔާނެއްގައި ބުނީ މި 4000 ހައުސިންގ ޔުނިޓުގެ ދެ މަޝްރޫއުގައި ވެސް ފިނިޝިންގެ މަސައްކަތް ހިމެނޭ ކަމަށެވެ. އެހެންކަމުން މަޝްރޫއުގައި ހިމެނެހޭ ހުރިހާ ޔުނިޓުތަކެއްގެ ފިނިޝިންގ މަސައްކަތް ނިންމޭނެ ކަމަށާއި އެގޮތުން، ފެލްޓުތަކުގެ މަސައްކަތް ނިމޭއިރު ހުންނާނީ ޓައިލްސް ޖަހައި، ދޮރުތައް ހަރުކޮށް، ކުލަ ލައި، ލައިޓުތަކާއި ފަންކާ އާއި ފާޚާ ފިޓިންގްސް ފުރިހަމަކޮށްފައި ކަމަށް ވެސް އެ ކުންފުނިން ބުންޏެވެ.
މި މަޝްރޫއުގެ މަސައްކަތަށް މިހާރު ނަގާފައިވާ ދެ ލޯނުން ހުރިހާ މަސައްކަތެއް ނިމޭނެކަން ފާހަގަކޮށް، ފަހި ދިރިއުޅުން ކޯޕަރޭޝަނުން ބުނީ ފިނިޝިންގެ މަސައްކަތަށް އިތުރު ލޯނެއް ނަގަން ނުޖެހޭނެ ކަމަށެވެ. އަދި އެ ކުންފުނިން އެ މަސައްކަތަށް އިތުރު ލޯނެއް ނަގަން ނުވަތަ ފައިސާ ހަމަޖައްސަން، އެއްވެސް ބޭންކަކަށް ނުދާނެ ކަމަށް ވެސް ވަނީ ބުނެފައެވެ.
ސަރުކާރުން ކުރިއަށްގެންދާ މިފަދަ މަޝްރޫއުތަކަކީ އެތައް ބަޔަކު އިންތިޒާރު ކުރަމުން އަންނަ މަޝްރޫއުތަކަކަށްވާތީ ރައްޔިތުންނަށް އޮޅުވާލުމަށް ހަގީގަތާ ޚިލާފު މައުލޫމާތު ނުފެތުރުމަށް ވެސް ފަހި ދިރިއުޅުން ކޯޕަރޭޝަނުން ވަނި ނަސޭހަތްތެރިވެފައެވެ.
އެފްޑީސީން އަންނަނީ އިންޑިއާގެ ދެ ކުންފުންޏަކާ ހަވާލުކޮށްގެން ހުޅުމާލެ ދެވަނަ ފިޔަވަހީގައި 4000 ހައުސިންގ ޔުނިޓު އެޅުމުގެ މަސައްކަތް ކުރަމުންނެވެ. މި ސަރުކާރުގެ "ގެދޮރުވެރިޔާ" ސިޔާސަތުގެ ދަށުން ހުޅުމާލޭ ދެވަނަ ފިޔަވަހީގައި ތަރައްގީކުރާ މި 4000 ހައުސިންގ ޔުނިޓުގެ ހަވާލުކޮށްފައިވަނީ ޖޭއެމްސީ ޕްރޮޖެކްޓްސް ލިމިޓެޑާއި، އެންބީސީސީ ލިމިޓެޑާއެވެ. މި މަޝްރޫއުގެ ދަށުން މިއިން ކޮންމެ ކުންފުންޏަކުންވެސް 2000 ހައުސިންގ ޔުނިޓް އަންނަނީ ތަރައްގީކުރަމުންނެވެ.
މި ދެ މަޝްރޫއުގެ ދަށުން ކޮންމެ މަޝްރޫއުއެއްގައި 900 އަކަފޫޓުގެ ތިން ކޮޓަރީގެ 1400 ޔުނިޓް އަދި 650 އަކަފޫޓުގެ ދެ ކޮޓަރީގެ 600 ޔުނިޓް ތަރައްގީ ކުރާނެއެވެ. މިކްސްޑް ރެސިޑެންޝަލް ޑިވެލޮޕްމަންޓް މޮޑެލްއަށް ރޭވިފައިވާ މި މަޝްރޫއުތަކުގެ ގްރައުންޑް ފްލޯ އަދި ފަސްޓްފްލޯގައި ހިމެނޭނީ މިޔުނިޓުތަކުގައި ދިރިއުޅޭ މީހުންނަށް ބޭނުންވާ ޚިދުމަތްތައް ފޯރުކޮށްދިނުމަށް ޚާއްސަ ކުރެވޭ ރީޓެއިލް އައުޓްލެޓްތަކާއި، ޕާކިން ޒޯނެކެވެ.
