ސްޕެއިންގެ ރެއާލް މެޑްރިޑުން އެ ޓީމުގެ މެދުތެރޭގައި ކުޅޭ މުހިންމު ކުޅުންތެރިންގެ އެއްބަސްވުން އައު ކުރި ނަމަވެސް، ބޮރޫޝިއާ ޑޯޓްމަންޑަށް ކުޅެމުން އަންނަ ޒުވާން ކުޅުންތެރިޔާ ޖޫޑް ބެލިންހަމް ހޯދުމުގެ މަސައްކަތް ހުއްޓާ ނުލާނެ ކަމަށް މީޑިއާ ރިޕޯޓުތައް ބުނެފި އެވެ.

މި ސީޒަނުގެ ނިޔަލަށް ޓޯނީ ކްރޫސް އާއި ލޫކާ މޮޑްރިޗް ރެއާލާއެކު ހަދާފައިވާ އެއްބަސްވުމުގެ މުއްދަތު ހަމަވާނެ އެވެ. އެހެން ނަމަވެސް ރެއާލުން، އެ ޓީމުގެ މެދުތެރޭގައި އިސް ދައުރެއް އަދާ ކުރަމުން އަންނަ މި ދެ ކުޅުންތެރިންގެ އެއްބަސްވުން އައު ކުރާނެ އެވެ. އެގޮތުން ދެ ކުޅުންތެރިން މިހާރު ތިބީ އިތުރު އެއް އަހަރަށް ކުލަބުގައި މަޑު ކުރަން ނިންމައިގެންނެވެ. މީގެ ތެރެއިން ކްރޫސް މިހާރު ވަނީ ރެއާލާއެކު އައު އެއްބަސްވުމުގައި ސޮއިކޮށްފައި ކަމަށާއި، ކުރިއަށް އޮތް ދުވަސްތަކުގެ ތެރޭގައި ރެއާލުން އެކަން ހާމަކުރާނެ ކަމަށް މީޑިއާ ތަކުގައި ވަނީ ބުނެފަ އެވެ. އަނެއްކޮޅުން ކުރިއަށް އޮތް ދުވަސްތަކުގައި މޮޑްރިޗު އައު އެއްބަސްވުމުގައި ސޮއި ކުރާނެ ކަމަށް ވެސް ވަނީ ބުނެފަ އެވެ.

އެހެން ނަމަވެސް، ރެއާލުން މިހާރު ވެސް މަސައްކަތް ކުރަމުން އަންނަ ގޮތަށް ބެލިންހަމް ހޯދުމުގެ މަސައްކަތް ހުއްޓާނުލާ ކުރިއަށް ގެންދާނެ ކަމަށް ސްޕެއިންގެ މީޑިއާތަކުގައި ވަނީ ބުނެފަ އެވެ. އޭގެ އިތުރުން، ބެލިންހަމް މިހާރު ވަނީ ރެއާލާއެކު އަނގަ ބަހުން އެއްބަސްވުމަކަށް އާދެވިފައި ކަމަށާއި، ދެން އޮތީ ރެއާލާ ޑޯޓްމަންޑާ ދެމެދު ކުރިއަށްދާ މަޝްވަރާތަކުން ގޮތެއް ނިންމުން ކަމަށް ވެސް ބުނެފައިވެ އެވެ. ރެއާލުން ޑޯޓްމަންޑާއެކު މަޝްވަރާތައް ކުރަމުން އަންނައިރު، ދެން އޮތީ ބެލިންހަމްގެ އަގަކާ މެދު އެއްބަސްވުމެވެ.

އިނގިރޭސި ޤައުމީ ޓީމުގައި ވެސް އަދި ޑޯޓްމަންޑުގައި ވެސް ހުނަރުވެރި ކުޅުމެއް ދައްކަމުން އަންނަ ކުޅުންތެރިޔާ ހޯދުމަށް 100 މިލިއަން ޔޫރޯ ޚަރަދު ކުރުމަށް ރެއާލުން އޮތީ ތައްޔާރަށެވެ. ނަމަވެސް ރިޕޯޓުތައް ބުނާ ގޮތުގައި ބެލިންހަމް ދޫކޮށްލުމަށް ޑޯޓްމަންޑުން ކިޔަނީ 150 މިލިއަން ޔޫރޯގެ އަގެކެވެ. އެހެން ނަމަވެސް މަޝްވަރާތަކަށް ފަހު ދެ ކުލަބުން އެއްބަސްވާ ގޮތެއްގެ މަތިން ބެލިންހަމްގެ ސޮއި ލިބޭނެ ކަމުގެ ބޮޑު އިތުބާރެއް ރެއާލަށް އޮތް ކަމަށް ވެސް މީޑިއާ ރިޕޯޓުތައް ބުނެ އެވެ.