ރަސްމީ ދަތުރުފުޅެއްގައި ޝާހިދު ސާބިއާގައި
މުހިއްމު ފަސް އެއްބަސްވުމެއްގައި ސޮއިކުރައްވާނެ
ފޮރިން މިނިސްޓަރު އަބްދުﷲ ޝާހިދު ސާބިއާއަށް ވަޑައިގަތުން
ރަސްމީ ދަތުރުފުޅެއްގައި ފޮރިން މިނިސްޓަރު އަބްދުﷲ ޝާހިދު ސާބިއާއަށް ވަޑައިގެންފިއެވެ.
ފޮރިން މިނިސްޓްރީން ބުނީ ސާބިއާގެ ވެރިރަށް ބެލްގްރޭޑަށް ޝާހިދު މި ކުރައްވާ ރަސްމީ ދަތުރުފުޅުގައި ސާބިއާގެ ޚާރިޖީ ވަޒީރު އިވިކާ ޑަޗިޗްއާއެކު މުހިންމު މަޝްވަރާތަކެއް ބޭއްވެވުމަށް ހަމަޖެހިފައިވާ ކަމަށެވެ.
މީގެ އިތުރުން މުހިއްމު ފަސް އެއްބަސްވުމެއްގައި ސޮއިކުރައްވާނެކަމަށް ވެސް ފޮރިން މިނިސްޓްރީން ބުނެއެވެ.
ރާއްޖެއާއި ސާބިއާއާ ދެމެދު ސޮއިކުރުމަށް ހަމަޖެހިފައި ވަނީ ވިސާއާ ގުޅޭ އެއްބަސްވުމަކާއި، ޓްރޭޑް އިންވެސްޓްމަންޓް އަދި އިކޮނޮމިކް ކޯޕަރޭޝަންގެ އެއްބަސްވުމަކާއި، އެއަރ ސާވިސަސް އެއްބަސްވުމަކާއި ޑިޕްލޮމެޓިކް އެޑިއުކޭޝަންގެ އިތުރުން ކުޅިވަރުގެ ދާއިރާއިގެ އެއްބަސްވުމެއްގައެވެ.
ސާބިޔާއަށް ކުރައްވާ މި ދަތުރުފުޅުގެ ސަބަބުން ރާއްޖެ އާއި އެގައުމާ ދެމެދު އޮތް ގުޅުން އިތުރަށް ބަދަހިވެގެންދާނެކަން ޔަގީންކުރައްވާ ކަމަށް ޝާހިދު ކުރެއްވި ޓްވީޓެއްގައި ވިދާޅުވިއެވެ.
ސާބިޔާގެ ފޮރިން މިނިސްޓަރު އިވިކާ ޑަޗިޗްގެ ދައުވަތަކަށް މިދިޔަ އަހަރުގެ ނޮވެމްބަރު މަސް ތެރޭގައި ވެސް މިނިސްޓަރު ޝާހިދު ވަނީ އެ ގައުމަށް ރަސްމީ ދަތުރުފުޅެއް ކުރައްވާފައެވެ.
