"ތައްޔާރުވެގެން އައި އިރު، ސްކޫލު ލޮލަށް ފެންނަން ވެސް ނެތް"

ޔަހޫދީ އިޒްރޭލުން ފަލަސްޠީނަށް ދެމުންދާ ގެއްލުންތަކުގެ ވާހަކައަކީ ދައްކާ ނިމޭނެ ވާހަކަތަކެއް ނޫނެވެ. ފަލަސްޠީނުގެ ރައްޔިތުންނަށް އިޒްރޭލުން ދެމުންދާ ގެއްލުންތަކަކީ ވަކި ޖިންސެއް، ވަކި ޢުމުރެއް ބެލުމެއް ނެތި، ދެމުންދާ ގެއްލުންތަކެކެވެ. ކޮންމެ ދުވަހަކީވެސް އިޒްރޭލުގެ ފުރައްސާރައާއި އަނިޔާއާ ކުރިމަތިލާން މަޖުބޫރުވާ ދުވަހަކަށް އޮންނަނީ ވެފައެވެ. މެއި 7 ވަނަ ދުވަހަކީވެސް ހަމަ އެފަދަ ދުވަހެކެވެ. އިޒްރޭލުން މި ފަހަރު ސުންނާފަތި ކޮށްލީ، ހުޅަނގު އައްސޭރީގައި ފަލަސްޠީނުން ހިންގަމުން ދިޔަ ސްކޫލެކެވެ.

އިޒްރޭލުގެ ލާއިންސާނީ އަސްކަރިއްޔާގެ ގޮތްޕެއް ކަމަށް ވާ ކޯގާޓުން އާންމު ކުރި ބަޔާނެއްގައި ބުނެފައި ވާ ގޮތުގައި، އެ އިމާރާތަކީ ބައިތުލަޙުމްއާ 2 ކިލޯމީޓަރު ދުރުގައި ހުރި، ޣައިރު ޤާނޫނީ އިމާރާތެކެވެ. އެއީ އެ ތަނަށް ޒިޔާރަތް ކުރާ މީހުންނާއި ކިޔަވާ ކުދިންނަށްވެސް ހުރި ނުރައްކަލެއް ކަމަށް ބުނެ ކޯގާޓުން ވަނީ ދިފާޢަށް ކުޅެފައެވެ. އެހެން ކަމުން އެ އިމާރާތް ބިމާ ހަމަ ކުރުމަށް އިޒްރޭލުގެ ކޯޓުން ޢަމުރުކުރީ ކަމަށް ކޯގާޓުން ބުނެއެވެ.

ވިލާތުގެ އިއްތިހާދު (އީޔޫ) އިން ފަލަސްޠީނަށް ކަނޑައަޅާފައި ވާ ވަފުދުން ބޭނުން ކުރާ ރަސްމީ ޓްވިޓަރ އެކައުންޓްގައި، މި ހަމަލާއާ ގުޅިގެން ކުރި ޓްވީޓެއްގައި ބުނެފައި ވަނީ، މިއީ އިންތިހާއަށް ސިހުން ގެނުވަނި ޢަމަލެއް ކަމަށެވެ. މި ހަމަލާގެ އަސަރު، ފަލަސްޠީނުގެ 60 އެއްހާ ދަރިވަރުންނަށް ކުރާނެކަންވެސް އީޔޫއިން ވަނީ ފާހަގަ ކޮށްފައެވެ.

އިމާރާތް ސުންނާފަތި ކޮށްފައި ވަނީ ބައިނަލްއަޤުވާމީ ޤާނޫނާ ޚިލާފަށް ކަމަށާ، މި ޢަމަލުގެ ސަބަބުން، ފަލަސްޠީނު ރައްޔިތުންގެ ދިރިއުޅުން އިތުރަށް ދަތިވެ، މިހާރުވެސް ނުތަނަވަސް ވެފައި ވާ މަސްރަހު، އިތުރަށް ގޯސްވެގެން ދާނެ ކަމަށްވެސް އީޔޫއިންވަނީ ބުނެފައެވެ.

ދިފާޢަށް ކުޅެމުން ކޯގާޓުން ބުނީ އިމާރާތުގެ މައްސަލާގައި މަޝްވަރާ ކުރުމަށް އިޒްރޭލުގެ ކަމާބެހޭ ފަރާތްތަކުން ތަކުރާރުކޮށް މަސައްކަތް ކުރުމުންވެސް، އެއްބާރުލުން ދިނުމަށް އިމާރާތުގެ ވެރި ފަރާތުން އިންކާރު ކޮށްފައިވާ ކަމަށެވެ.

ސްކޫލްގައި ކިޔަވަމުން ދިޔަ ދަރިވަރުންނާއި މަންޒަރު ދުށް މީހުން ކިޔައިދިން ގޮތުގައި އިމާރާތް ބިމާ ހަމަކޮށްލާފައި ވަނީ އެތަނުގައި އިރެއްގައި ސްކޫލެއް ހިނގި ކަމުގެ ނިޝާންވެސް ފެންނަން ނެތް މިންވަރަށެވެ.

މަންޒަރު ދުށް މީހުން ބުނި ގޮތުގައި، ސުންނާފަތި ކުރި އިމާރާތުގެ ތެރެއިން ނެގި ބައެއް ސަމާނުތައްވެސް، އިޒްރޭލުގެ ކަމާ ބެހޭ ފަރާތްތަކުން ވަނީ ގެންގޮސްފައެވެ.

އިޒްރޭލުގެ އަސްކަރިއްޔާއިން ވައްޓާލި ސްކޫލާ މާ ދުރު ނޫން ހިސާބެއްގައި އާބާދުވެފައިވާ ޔަހޫދީން ތަމްސީލު ކުރާ ގަޝް އެޓްޒަޔޯން ރީޖަނަލް ކައުންސިލުން ވަނީ، އަސްކަރިއްޔާގެ އަމަލަށް މަރުޙަބާ ކިޔާފައެވެ.

ފަލަސްޠީނުގެ މައި ސަރުކާރުގެ ތަޢުލީމާ ބެހޭ ވުޒާރާއިން ސިފަ ކުރި ގޮތުގައި މި ހަމަލާއަކީ "ނުލަފާ ޖަރީމާ"އެކެވެ. އަދި މިކަމުގެ ސަބަބުން ދަރިވަރުންނަށް ލިބިފައި އޮތް އުނގެނުމުގެ ފުރުޞަތުން މަހުރޫމުވެ، ދުނިޔޭގެ އެހެން ހިސާބުތަކުގެ ކުދިންނަށް ލިބިދީފައި އޮންނަ ގޮތަށް، ސަލާމަތްތެރި، ހަމަޖެހޭ ވެއްޓެއްގައި ކިޔެވުމުގެ ފުރުޞަތުންވެސް އެކުދިން މަހްރޫމު ކުރެވޭކަމަށް އެ ވުޒާރާއިން ވަނީ ބުނެފައެވެ.

އިޒްރޭލުގެ މަސްދަރަކާ ހަވާލާދީ ރޮއިޓާޒްއިން ރިޕޯޓް ކޮށްފައި ވާ ގޮތުގައި، އިމާރާތުގެ މައްސަލާގައި އިޒްރޭލުން "ވާހަކަދައްކާތާ" 6 އެއްކަ އަހަރު ވަނީ ވެފައެވެ. ސުންނާފަތި ކުރި ސްކޫލްގައި ކިޔަވަމުން ދިޔަ ދަރިވަރުން ދެން ބަދަލު ވާނީ އެ ސަރަޙައްދުގައި ހުރި އެހެން ސްކޫލަކަށް ކަމަށްވެސް އިޒްރޭލުން ބުނެއެވެ.