މިހާރު ކުރިއަށްދާ އިންޓަރ އޮފީސް ވޮލީބޯޅަ މުބާރާތުގައި މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ކުޅުނު ދެ ވަނަ މެޗުން ވެސް މޮޅުވިއިރު، މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ފުރަތަަމަ މޮޅު ހޯދައިފި އެވެ.

ހުކުރު ދުވަހުގެ ހަވީރު ހުޅުމާލޭ ވޮލީ ކޯޓުގައި އެމްއެންޑީއެފް އިން ނުކުތީ ވެމްކޯއާ ދެކޮޅަށެވެ. މި ދެ ޓީމު ވަނީ ގްރޫޕް ބީގައި ކުޅުނު ފުރަތަމަ މެޗުން ވެސް މޮޅުވެފަ އެވެ. އެމްއެންޑީއެފް އިން ވެމްކޯގެ މައްޗަށް ކުރި ހޯދީ ފަސޭހަކަމާއެކު ސީދާ ތިން ސެޓުންނެވެ. މެޗުގެ ސެޓުތައް އެ ޓީމުން ކާމިޔާބު ކުރީ 25-20، 25-20 އަދި 25-19 އިންނެވެ. މެޗުގެ މޮޅު ކުޅުންތެރިޔަަކަށް ހޮވުނީ އެމްއެންޑީއެފްގެ ބިދޭސީ ކުޅުންތެރިޔާ ކަވިޝްކާ މަދުޝަންކާ އެވެ. މޮޅާއެކު ގްރޫޕް ބީގެ އެއް ވަނައިގައި ހަ ޕޮއިންޓާއެކު އޮތީ އެމްއެންޑީއެފް އެވެ. ދެ ވަނައިގައި ތިން ޕޮއިންޓާއެކު ވެމްކޯ އޮތްއިރު، ތިން ވަނައިގައި އޮތް ކަރެކްޝަން އަދި ހަތަރު ވަަނައިގައި އޮތް އެފްއެސްއެމަށް އަދި ޕޮއިންޓެއް ނުލިބެ އެވެ.

ހުކުރު ދުވަހުގެ ރޭ ގްރޫޕް އޭގައި އެމްޕީއެލް ނުކުތީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އާ ދެކޮޅަށެވެ. މި ދެ ޓީމު ވަނީ މެޗަށް ނުކުތްއިރު މީގެ ކުރިން ކުޅުނު ދެ މެޗުން ވެސް ބަލިވެފަ އެވެ. އެ މެޗުގައި އެމްޕީއެލް އިން އެމްއޭސީއެލްގެ މައްޗަށް ކުރި ހޯދީ ތިން ސެޓު އެއް ސެޓުންނެވެ. މެޗުގެ ފުރަތަމަ ދެ ސެޓު އެމްޕީއެލް އިން ކާމިޔާބު ކުރީ ފަސޭހަކަމާއެކު އެވެ. އެއީ ފުރަތަމަ ސެޓު 25-20 އަދި ދެ ވަނަ ސެޓު 25-14 އިންނެވެ. ނަމަވެސް ތިން ވަނަ ސެޓުގައި ވާދަވެރި ކުޅުމަކަށްފަހު، 27-29 އިން ސެޓު ކާމިޔާބު ކުރީ އެމްއޭސީއެލް އެވެ. ހަތަރު ވަނަ ސެޓު އެމްޕީއެލް އިން ފަސޭހަކަމާއެކު ކާމިޔާބު ކުރީ 25-19 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ އެމްޕީއެލްގެ އަލީ އާމިރު އެވެ.

މި ގްރޫޕްގެ އެއް ވަނައިގައި ހަ ޕޮއިންޓާއެކު އާބަންކޯ އޮތްއިރު، ދެ ވަނައިގައި އޮތް ސްޓެކްލޯ އަށް ވެސް ލިބެނީ ހަ ޕޮއިންޓެވެ. ތިން ވަނައިގައި އޮތް ޕޮލިސް އަދި ހަތަރު ވަނައިގައި އޮތް އެމްޕީއެލަށް ލިބެނީ ތިން ޕޮއިންޓެވެ. ޕޮއިންޓެއް ނުލިބި ފުލުގައި އޮތީ އެމްއޭސީއެލް އެވެ.

މުބާރާތުގައި ހޮނިހިރު ދުވަހުގެ ހަވީރު ކުޅޭނީ އާބަންކޯ އާއި ސްޓެލްކޯ އެވެ. ހޮނިހިރު ދުވަހުގެ ރޭ ކުޅޭނީ އެފްއެސްއެމް އާއި ކަރެކްޝަން އެވެ.