ކުޑަ ކުދިންތަކަކަށް ޖިންސީ ގޯނާ ކުރިކަމުގެ ތުހުމަތުގައި ޓީޗަރަކު ހައްޔަރުކޮށްފި
5 މެއި 2023 | ހުކުރު 12:06ކޯޓު އަމުރެއްގެ ދަށުން ހައްޔަރުކުރީ 38 އަހަރުގެ ދިވެހި ފިރިހެނެއް
ކުޑަކުދިންނަށް ކުރާ ޖިންސީ ގޯނާ
ކުޑަ ކުދިންތަކަކަށް ޖިންސީ ގޯނާ ކުރިކަމުގެ ތުހުމަތުގައި ދިވެހި ފިރިހެނަކު ހައްޔަރުކޮށްފިއެވެ.
ފުލުހުން ބުނީ، ދެކުނުގެ އަތޮޅުތަކުގެ ތެރެއިން، މ، ފ، ދ، ތ އަދި ލ. އަތޮޅުގެ ސަރަހައްދުގައި ހިމެނޭ ރަށެއްގައި ކުޑަ ކުދިންތަކަކަށް ޖިންސީ ގޯނާ ކުރިކަމަށް ބުނާ މައްސަލައެއް އޭޕްރީލް 29 ވަނަ ދުވަހު ފުލުހުންނަށް ހުށަހަޅާފައިވާ ކަމަށެވެ.
ފުލުހުން ބުނީ މި މައްސަލައާ ގުޅިގެން މެއި 2 ވަނަ ދުވަހު ކޯޓު އަމުރެއްގެ ދަށުން 38 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށެވެ.
އެމީހާގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން ބަންދުގައި ބެހެއްޓުމަށް 30 ދުވަސް ދީފައިވާ ކަމަށް ފުލުހުން ބުނެއެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
މައުލޫމާތު ލިބިފައިވާ ގޮތުގައި އެރަށުން ހައްޔަރުކޮށްފައިވަނީ ސްކޫލުގައި ކިޔައިވައިދޭ ޓީޗަރެކެވެ. މީގެ ކުރިން ވެސް އެކަހަލަ ތުހުމަތުތަކެއް އެޓީޗަރަށް ކުރެވުނު ކަމަށް އެރަށުގެ ބައެއް މީހުން ބުނެއެވެ. އޭނާގެ މައްޗަށް ކުރަނީ ކުޑަކުދިންތަކަކާ އެއްޖިންސުން ގުޅުން ހިންގިކަމުގެ ތުހުމަތެވެ.
