ސަރުކާރުގެ ސިއްހީ އިދާރާއެއްގައި މަސައްކަތްކުރާ މުވައްޒަފުން އެހެން ތަނެއްގައި މަސައްކަތްނުކުރާނަމަ އެލަވަންސެއް!
ސިއްހީ ދާއިރާގެ މުވައްޒަފުންގެ މުސާރަ ވަނީ ބޮޑުކޮށްފައި
އައިޖީއެމްއެޗްގައި ކުރިއަށްދިޔަ އޮޕަރޭޝަނެއް
ސަރުކާރުގެ ސިއްހީ ޚިދުމަތްދޭ ތަނެއްގައި މަސައްކަތްކުރާ މުވައްޒަފުން އެހެން ތަނެއްގައި މަސައްކަތްނުކުރާނަމަ އެލަވަންސެއް ލިބޭނެ ކަމަށް ސަރުކާރުން ބުނެފިއެވެ.
ސިއްހީ ދާއިރާގެ މުވައްޒަފުންގެ މުސާރައަށް ހެޔޮ ބަދަލެއް ގެނެސްފައިވާއިރު، ސަރުކާރުގެ ސިއްހީ ޚިދުމަތްދޭ ތަންތަނުގައި މަސައްކަތްކުރާ މުވައްޒަފުން އެހެން ކްލިނިކްތަކަށް ގޮސް ބަލި މީހުން ބަލާކަމުގެ ޝަކުވާ ގިނަ ބަޔަކު ދަނީ ކުރަމުންނެވެ.
މިކަމާއި ގުޅިގެން ބުރާސްފަތި ދުވަހު ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ރާއްޖެޓީވީން ކުރި ސުވާލަށް ޖަވާބުދެއްވަމުން ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ ބައެއް އެހެން ދާއިރާތަކުގައިވެސް އެހެން ތަނެއްގައި މަސައްކަތްނުކޮށް އެއް ތަނެއްގައި މަސައްކަތްކުރާނަމަ އެކްސްކްލޫސިވް ސަރވިސް އެލަވަންސެއް ދޭ ކަމަށެވެ.
ސިއްހީ ދާއިރާގެ މުވައްޒަފުންގެ މުސާރައަށް ބަދަލުގެނެސް އެކުލަވާލި އައު ފްރޭމްވޯކުގެ ދަށުންވެސް މިފަދަ ސަރިސް އެލަވަންސެއް ލިބިގެންދާނެ ކަމަސް މިއުވާން ވިދާޅުވިއެވެ. މިގޮތުން ސިއްހީ ޚިދުމަތްދޭ އެހެން ތަނެއްގައި މަސައްކަތްނުކޮށް ހަމައެކަނި ސަރުކާރުގެ ސިއްހީ ޚިދުމަތްދޭ ތަނެއްގައި މަސައްކަތްކުރާނަމަ އެލަވަންސް ލިބޭނެ ކަމަށް މިއުވާން ވިދާޅުވިއެވެ.
މެއި މަހުން ފެށިގެން ސިއްހީ ދާއިރާގެ މުވައްޒަފުންގެ މުސާރަ ބޮޑުކޮށްފައިވާކަމަށް ސަރުކާރުން ވަނީ އިއުލާނުކޮށްފައެވެ. މިއާއެކު ސިއްހީ ދާއިރާގެ 3710 މުވައްޒަފުންގެ މުސާރައަށް ބަދަލު އަންނާނެއެވެ.
ސަރުކާރު މުވައްޒަފުންގެ މުސާރަ ގުނަނީ 15 ން 15 ށް ކަމަށްވުމުން މެއި މަހު ލިބޭ މުސާރައިން މުސާރަ ބޮޑުވިކަން ފާހަގަނުވެދާނެ ކަމަށް މިއުވާން ވިދާޅުވިއެވެ. އެހެންނަމަވެސް ޖޫން މަހު ސަރުކާރު މުވައްޒަފުންނަށް ލިބޭނީ އައު ފްރޭމްވޯކްގެ ދަށުން ކަނޑައަޅާފައިވާ އަދަދު ކަމަށް މިއުވާން ވިދާޅުވިއެވެ.
