ވަޒީފާ ދޭ ފަރާތްތަކުން ޓްރިބިއުނަލާއި ކޯޓު މަރުހަލާގެ ނާޖާއިޒް ފައިދާ ނަގާ - ޕީއައިއެލްސީ
2 މެއި 2023 | އަންގާރަ 14:08ވަޒީފާއާ ގުޅުންހުރި 1،600 މައްސަލަ ހުށަހަޅާފައިވޭ
ޕީއައިއެލްސީގެ ރައީސާ، ޝުނާނާ
ވަޒީފާ ދޭ ފަރާތްތަކުން, ޓްރިބިއުނަލާއި ކޯޓު މަރުހަލާގެ ނާޖާއިޒް ފައިދާ ނަގާކަމަށް، އައިއެލްސީގެ ރައީސާ އަދި ގާނޫނީ ވަކީލު މަރިޔަމް ޝުނާނާ ވިދާޅުވެއްޖެއެވެ.
ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަފުޅުދައްކަވަމުން އޭނާ ވިދާޅުވީ، އަދިވެސް ވަރަށް ގިނަ މަސައްކަތްތެރިންނަށް އެ މަސައްކަތްތެރިންނަށް ލިބިދޭ ހައްގުތައް ސާފުކޮށް ނޭނގޭކަމަށެވެ. އަދި ހައްގުތައް ހޯދުމަށް ދާ މުވައްޒަފުންނަށްވެސް ގިނަ ދަތިތަކާ ކުރިމަތިލާންޖެހޭ ކަމަށް ޝުނާނާ ވިދާޅުވިއެވެ. އަދި މައްސަލަތައް ނުނިމި ދިގުލައިގެން ދިއުމަކީ މަސައްކަތްތެރިން ވަރަށް ބޮޑަށް މާޔޫސްވާ ކަމެއް ކަމަށްވެސް އޭނާ ވަނީ ވިދާޅުވެފައެވެ. ކަނޑައެޅިގެން މުވައްޒަފުގެ ހައްގު ގެއްލިފައިވާކަން، ޓްރަބިއުނަލުން މައްސަލަ ނިމޭއިރު ކުންފުނިން އަމަލު ކުރީ ރަނގަޅަށް ނޫންކަން، ސާފުވާ ހާލަތުގައިވެސް ކޯޓުތަކަށް މައްސަލަ ހުށަހަޅައިގެން މައްސަލަ ދިގު ދަންމާލާކަމަށް ޝުނާނާ ވަނީ ވިދާޅުވެފައެވެ.
މީގެ އިތުރުން ވަޒީފާ ދޭން އެންގި ކަމުގައި ވީނަމަވެސް އެ ނިންމުން އިސްތިއުނާފް ކުރާކަމަށާއި، އެކަން ކުރަނީ އިސްތިއުނާފް ކާމިޔާބުކުރުމަށްވުރެ ބޮޑަށް މަސައްކަތްތެެރިޔާއަށް އުނދަނގޫކުރުމުގެ ނިޔަތުގައިކަމަށް އޭނާ ވަނީ ވިދާޅުވެފައެވެ.
މަސައްކަތްތެރިން ތިބީ މާޔޫސްވެފައިކަމަށާއި، ކޯޓަށް މައްސަލަ ހުށަހެޅުމުގެ ވިސްނުން ގިނަ މީހުން ނުގެންގުޅެނީވެސް އެހެންވެގެން ކަމަށް ޕީއައިއެލްސީން ބުނެއެވެ. އަދި މަދަނީ އިޖުރާއަތަށް ގެނައި ބަދަލާއެކު، އިދާރާތަކަށް ފަހިވިނަމަވެސް އާއްމު ފަރާތްތަކަށް އެކަމުގެ ސަބަބުން ވަރަށް ބޮޑަށް އުނދަގޫވާކަމަށް އެ ސެންޓަރުން ވަނީ ބުނެފައެވެ. ޝުނާނާ ވިދާޅުވީ ޕީއައިއެލްސީއަށް އެންމެ ގިނަ މައްސަލަ ހުށަހެޅެނީ ވަޒީފާއާ ގުޅިގެންކަމަށެވެ. ފާއިތުވި 4 އަހަރު އަހަރު ދުވަހުގެތެރޭގައި ވަޒީފާއާ ގުޅުންހުރި 1،600 މައްސަލަ ހުށަހަޅާފައިވާކަމަށާއި، އޭގެތެރެއިން 832 މީހުންގެ މައްސަލަ ޓްރައިބިއުނަލުން އެކަށީގެންވާ މިންވަރަށް ކާމިޔާބުކުރެވިފައިވާކަމަށް ޝުނާނާ ވިދާޅުވިއެވެ.
