ޕީއައިއެލްސީއަށް ހުށަހެޅޭ 80 އިންސައްތަ މައްސަލައަކީ ވަޒީފާއާބެހޭ މައްސަލަތައް: ޝުނާނާ

ޕަބްލިކް އިންޓްރެސްޓް ލޯ ސެންޓަރ (ޕީއައިއެލްސީ)އަށް ހުށަހެޅޭ 80 އިންސައްތަ މައްސަލައަކީ ވަޒީފާއާބެހޭ މައްސަލަތައް ކަމަށް, ޕީއައިއެލްސީގެ ރައީސް އަދި ގާނޫނީ ވަކީލު މަރިޔަމް ޝުނާނާ ވިދާޅުވެއްޖެއެވެ.

މަސައްކަތްތެރިންގެ ދުވަހާ ގުޅިގެން ރާއްޖެޓީވީގެ "ފަލަ ސުރުޚީ" ޕްރޮގްރާމުގައި ބައިވެރިވެވަޑައިގެން ވާހަކަފުޅުދައްކަވަމުން ޝުނާނާ ވިދާޅުވީ، އެކި މައްސަލަތަކުގައި ކޯޓުތަކާ ހަމައަށް ދިއުމަށް ގިނަ ބަޔަކު ޖެހިލުންވާކަމަށެވެ. އެއީ އެމީހުންގެ މާލީ ތަނަވަސްކަން ނެތުމުންކަން ފާހަގަވެފައިވާކަމަށާއި، މިފަދަ ކަންކަމުގައި އާންމުންނަށް ގާނޫނީ އެހީތެރިކަން ފޯރުކޮށްދިނުމަށް އެކުލަވާލާފައިވާ ޖަމިއްޔާއެއްގެ ހައިސިއްޔަތުން ޕީއައިއެލްސީން މިހާތަނަށް ގިނަ ބަޔަކަށް ގާނޫނީ އެހީ ފޯރުކޮށްދީފައިވާކަމަށް ޝުނާނާ ވިދާޅުވިއެވެ.

ޝުނާނާ ވިދާޅުވީ ޕީއައިއެލްސީއަށް އެންމެ ގިނަ މައްސަލަ ހުށަހެޅެނީ ވަޒީފާއާ ގުޅިގެންކަމަށެވެ. ފާއިތުވި 4 އަހަރު އަހަރު ދުވަހުގެތެރޭގައި ވަޒީފާއާ ގުޅުންހުރި 1،600 މައްސަލަ ހުށަހަޅާފައިވާކަމަށާއި، އޭގެތެރެއިން 832 މީހުންގެ މައްސަލަ ޓްރައިބިއުނަލްއިން އެކަށީގެންވާ މިންވަރަށް ކާމިޔާބުކުރެވިފައިވާކަމަށް ޝުނާނާ ވިދާޅުވިއެވެ.

ޝުނާނާ އިތުރަށް ވިދާޅުވީ ޖަމިއްޔާއަށް މައްސަލަ ހުށަހެޅުމުން ޖަމިއްޔާއިންވެސް ވަރަށް ގިނަ ކަންކަމަށް ބަލާނެކަމަށެވެ. އެގޮތުން އެމީހަކީ މާލީގޮތުން ގާނޫނީ ވަކީލަކު ހޯދުމުގެ ގާބިލްކަން ހުރި މީހެއްތޯ ބަލާނެ ކަމަށާއި، އެމީހަކީ ގާނޫނާ ޚިލާފަށް ވަޒީފާއިން ވަކިކޮށްފައިވާ މީހެއްތޯ ބަލާނެކަމަށް ޝުނާނާ ވިދާޅުވިއެވެ. އަދި ގާނޫނީ ވަކީލުން ފޯރުކޮށްދޭންޖެހޭނަމަ އެކަން ކުރާނެކަމަށް ޝުނާނާ ވިދާޅުވިއެވެ.