މެންޗެސްޓަރ ސިޓީ އެއްވަނައަށް، ހާލަންޑް ސީޒަންގެ 50 ވަނަ ގޯލް!

އާސެނަލް ފަހަތަށް ޖައްސާލުމަށްފަހު ޗެމްޕިއަން މެންޗެސްޓަރ ސިޓީން އެންމެފަހުން ލީގު ތާވަލްގެ އެއްވަނައަށް ޖެހިލައިފިއެވެ.

މެންޗެސްޓަރ ސިޓީން އެއްވަނައަށް ޖެހިލީ އަމިއްލަ ދަނޑުގައި ފުލަމް ބަލިކޮށް ހޯދި ތިން ޕޮއިންޓާއެކުއެވެ. ސިޓީ އެއްވަނާގައި އޮތީ ކުރިން އެމަގާމުގައި އޮތް އާސެނަލްއަށްވުރެ މެޗެއް މަދުން ކުޅެ, ޕޮއިންޓެއްގެ ލީޑަކާއެކުއެވެ. އެހެންކަމުން މެޗު ހަމަކޮށް, ހަތަރު ޕޮއިންޓްގެ ލީޑެއް ނެގުމުގެ ފުރުސަތު، ފޯމްގައި އޮތް ސިޓީއަށް އެބައޮތެވެ. ސިޓީ އެއްވަނާގައި އޮތީ 32 މެޗުން 76 ޕޮއިންޓާއެކުއެވެ. ދެވަނާގައި އޮތް އާސެނަލްއަށް 33 މެޗުން ލިބިފައިވަނީ 75 ޕޮއިންޓެވެ.

ފުލަމްގެ މައްޗަށް ސިޓީން ކުރިހޯދީ 2-1ންނެވެ. މެޗު ފަށައިގެން ތިންވަނަ މިނިޓްގައި ސިޓީން ލީޑް ނެގީ އަލްވާރޭޒްއަށް ކުރި ފައުލަށް ދިން ޕެނަލްޓީއަކުންނެވެ. ޕެނަލްޓީ ކާމިޔާބުކުރީ ލީގުގެ ޓޮޕް ސްކޯރަރ ހާލަންޑެވެ. މިއީ މިސީޒަންގައި ސިޓީއަށް ބަދަލުވެ އޭނާ ޖަހައިދިން 50 ވަނަ ލަނޑެވެ. މިލަނޑާއެކު ހާލަންޑް ވަނީ ޕްރިމިއަރ ލީގުގެ އެއް ސީޒަނެއްގައި އެންމެ ގިނަ ލަނޑު ޖެހި ކުޅުންތެރިންގެ ރެކޯޑާ އަރާ ހަމަކޮށްފައެވެ. އެއީ ލީގުގައި 34 ލަނޑު ޖަހައިގެންނެވެ. މިރެކޯޑް ހިއްސާ ކުރާ އަނެއް ދެ ކުޅުންތެރިންނަކީ ނިއުކާސަލްގެ އެންޑީ ކޯލްއާއި, އެލަން ޝިއަރާއެވެ. އެލަން ޝިއަރާ 34 ލަނޑު ޖެހީ ބްލެކްބާން ގައެވެ. ލީގުގައި ސިޓީއަށް ބާކީ ފަސް މެޗު އޮތުމުން އެރެކޯޑް އަމިއްލަ ކުރުމުގެ ބޮޑު ފުރުސަތެއް ހާލަންޑަށް އެބައޮތެވެ.

ފުރަތަމަ ހާފްގައި ފުލަމްއިން ނަތީޖާ ހަމަހަމަކުރިއެވެ. އެއީ ގުޅިގެން ތަނަވަސްކުރި ރަނގަޅު ފުރުސަތެއްގައި އަލްވެސް މޮރިއަސް ޖެހި ލަނޑުންނެވެ. ހާފް ނިމުމުގެ ކުރިން ސިޓީއަށް މުހިއްމު މޮޅު ހޯދައިދިނީ، ޑީ އޭރިޔާ ބޭރުން އަލްވަރޭޒް ފޮނުވާލި ބޯޅައިންނެވެ. އާސެނަލް ފަހަތަށް ޖައްސާލުމަށްފަހު ސިޓީ، ލީގު ތާވަލްގެ އެއްވަނަށް މި ޖެހިލީ ފެބްރުއަރީ މަހަށްފަހުއެވެ.