ކަޝްމީރަކީ އެތަނަކުން މީހުން ހައިރާންކޮށްލުވައި، އަދި ހިތްވަރު ލިބޭފަދަ ތަފާތު ވާހަކަތައް އަޑުއިވޭ ތަނެއްގެގޮތުގައި އޮންނަނީ މަޝްހޫރުވެފައެވެ. މިފަދަ އެއް ވާހަކައަކީ، ލޭ ހަދިޔާކުރުމުގައި ގިނަ އަހަރުތަކެއް ވަންދެން ދެމިހުރި ޝަބީރު ހުސައިން ޚާންގެ ވާހަކައެވެ. އޭނާ ވަނީ 42 އަހަރު ތެރޭގައި 182 ޕައިޓް ލޭ ހަދިޔާކޮށް، ކަޝްމީރު ވެލީއޭ ކިއުނު ސަރަހައްދުގައި އެތައް ހާސް ބައެއްގެ ފުރާނަ ސަލާމަތްކޮށްދީފައެވެ.

ޝަބީރު ހުސައިން ޚާންގެ ވާހަކަ ފެށެނީ 1980 ވަނަ އަހަރު ޖަންމޫ އެންޑް ކަޝްމީރުގެ ވެރިރަށް ސްރީނަގަރުގައި އޭނާގެ ރަހުމަތްތެރިއަކަށް އެކްސިޑެންޓެއް ދިމާވެ، އޭނާއަށް ލޭ ދޭން ހޮސްޕިޓަލަށް ދިޔަ ހިސާބުންނެވެ. އެދުވަހުން ފެށިގެން މިއަދާ ހަމަޔަށް މިވީ ސާޅީހަކަށް އަހަރުތެރޭގައި އޭނާ ވަނީ 182 ޕައިންޓް ލޭ ހަދިޔާކޮށްފައެވެ. އޭނާ އަމިއްލަ ގައިން ލޭ ދީފައި ހުއްޓާލީއެއް ނޫނެވެ. ލޭ ދިނުމުގެ އިތުރުން އޭނާވަނީ އެތައް ސަތޭކަ ބްލަޑް ޑޮނޭޝަން ކޭމްޕްތައްވެސް އިންތިޒާމްކޮށްފައެވެ. މިގޮތުން އޭނާ ވަނީ 1200އެއްހާ ބްލަޑް ޑޮނޭޝަން ކޭމްޕް އިންތިޒާމްކޮށްފައެވެ.

ޝަބީރު ބުނިގޮތުގައި މީގެ 43 އަހަރު ކުރިން އޭނާގެ ރަހުމަތްތެރިޔާއަށް ލޭދިނުމަށް ސްރީނަގަރު މެޑިކަލް ހޮސްޕިޓަލްލަށް ދިޔަ ދުވަހުން ފެށިގެން މެދުކެނޑުމެއްނެތި އޭނާ އަންނަނީ ލޭ ހަދިޔާކުރަމުންނެވެ. އޭނާ ބުނިގޮތުގައި ލޭ ހަދިޔާކުރުމަކީ އޭނާގެ ހިތަށް ޚާއްސަ ހަމަޖެހުމެއް ލިއްބައިދޭ ކަމަށް ވިއެވެ. އޭނާއަކީވެސް ފަގީރު އާއިލާއަކަށް ނިސްބަތްވީ މީހެއްކަމަށާއި އޭނާފަދަ ފަގީރު ނިކަމެތިން ހޮސްޕިޓަލްތަކުގައި ލޭ ނުލިބިގެން އުޅޭ ހާލު ފެނި ހިތަށް ވަރަށް އަސަރު ކުރަން ފެށިކަމަށް އޭނާބުންޏެވެ. އަދި އެވަގުތު ކުރަން އެންމެ މުނާސަބު ކަމަކަށް ފެނުނީ އަމިއްލައަށް ލޭ ހަދިޔާކުރަން ފެށުންކަމަށް ބުނެފައިވެއެވެ. އިސްލާމް ދީންވެސް ބާރުއަޅަނީ އިންސާނިއްޔަތަށް ޚިދުމަތްކުރުން ކަމަށް ވާތީ، އެކަން އެގޮތަށް ކުރަންފެށީ ކަމަށް ޝަބީރު އޭނާ ބުނެފައިވެއެވެ.

އޭނާގެ ޚިދުމަތް ބަލައިގަނެ، ސަރުކާރުން ދޭ އެވޯޑެއް އަދި އޭނާއަށް ލިބިފައެއް ނުވެއެވެ. ނަމަވެސް އަމިއްލަ އެތައް ފަރާތަކުން ވަނީ އެތައް އެވޯޑްތަކެއް ދީފައެވެ. އަދި އޭނާއަކީ ޔޫނިއަން ޓެރިޓަރީގަ ހުރި، އެންމެ ގިނަ މީހުންގެ ފުރާނަ ސަލާމަތް ކޮށްދިން މީހާގެ ލަގަބްވެސް ވަނީ ދީފައެވެ. އޭނާ ބުނިގޮތުގައި އޭނާ މިކަން ކުރަމުންދަނީ ހަމައެކަނި ﷲގެ ހަޒުރަތުން ދަރުމައަށް އެދިގެންނެވެ. އޭނާއަށް ވަރަށް ގިނަ ބައެއްގެ ހެޔޮ ދުއާލިބޭ ކަމަށާއި ލޭދޭ އެންމެންވެސް އޭނާއަށް ހެޔޮ ދުއާ ކުރާކަމަށް ބުނެފައިވެއެވެ.

ލޭ ދިނުމުގެ މުހިންމުކަމާއި އެކަމުން އެތައް ބައެއްގެ ފުރާނަ ސަލާމަތް ކޮށްދެވޭނެކަން ބުނެދީ، އަންގައިދިނުމަކީ މިހާރު އޭނާ ދާއިމީގޮތެއްގައި ކުރަމުންދާ މަސައްކަތެކެވެ. އަދި ޒުވާނުން މިކަމުގެ ތެރެޔަށް ވައްދައި، ލޭ ބޭނުންވެފައިވާ ކުޑަކުދިންނަށާއި އުމުރުން ދުވަސްވީ މީހުންނަށް ޚާއްސަކޮށްގެންވެސް ހަރަކާތްތަކެއް ހިންގާފައިވެއެވެ. ޝަބީރުގެ މިއަދުގެ އެދުމަކީ އޭނާކުރާ މަސައްކަތް ބަލައިގަނެ އިންޑިޔާ ސަރުކާރުން އޭނާއަށް ކޮންމެވެސް އެވޯޑެއް ދިނުމެވެ. އޭނާ ބުނިގޮތުގައި އެފަދަ އެވޯޑްތަކަށް އޭނާގެ ނަން 10 ފަހަރު ފޮނުވައިގެންވެސް އަދިވެސް އެކަން ވާގޮތެއް ނުވެއެވެ.

ސަރުކާރުގެ އެވޯޑެއް ނުލިބުނުނަމަވެސް، ބަދަލުގައި އެއްވެސް އެއްޗެއް ލިބުމުގެ އުންމީދަކާނުލައި ޝަބީރު ހުރީ، އޭނާ ދިރިހުރިހައި ދުވަހަކު ލޭހަދިޔާ ކުރަމުން ގެންދާގޮތަށެވެ.