ބޮކުމްއާ އެއްވަރުވެ ލީޑު ނަގަން ލިބުނު ފުރުސަތު ޑޯޓްމަންޑުން ނަގާލައިފި

ޖަރުމަނު ލީގުގައި ބޮކުމްއާ ދެކޮޅަށް ކުޅުނު މެޗުން އެއްވަރުވެ، އެއް ވަނައިގައި ލީޑު ނެގުމަށް ލިބުނު ފުރުސަތު ބޮރޫޝިއާ ޑޯޓްމަންޑުން ނަގާލައިފި އެވެ.

ބޮކުމްގެ ދަނޑުގައި ހުކުރު ދުވަހުގެ ރޭ ކުޅުނު މެޗަށް ނިކުތްއިރު އެއް ވަނައިގައި ޑޯޓްމަންޑު އޮތީ ޕޮއިންޓެއްގެ ލީޑަކާ އެކު އެވެ. ނަމަވެސް އެ މެޗުން މޮޅުވެ ލީޑު ފުޅާ ކުރުމަށް ލިބުނު ފުރުސަތު ޑޯޓްމަންޑުން ވަނީ ނަގާލައިފަ އެވެ. އެ މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. އެއާއެކު ލީގުގައި ހާތާ ބާލިންއާ ދެކޮޅަށް ކުޅޭ މެެޗުން މޮޅުވެ، އަލުން އެއް ވަނަ އަށް އެރުމުގެ ފުރުސަތު އެންމެ ފަހުގެ ޗެމްޕިއަން ބަޔާން މިއުނިކަށް އޮންނާނެ އެވެ.

ބޮކުމްގެ ދަނޑުގައި ކުޅުނު މެޗު ފަށައިގެން ފަސް ވަނަ މިނެޓުގައި އެ ޓީމުން ވަނީ ލީޑު ނަގައިފަ އެވެ. ޑޯޓްމަންޑުގެ އޭރިޔާ ބޭރުން އެންތޮނީ ލޮސިލާ ފޮނުވާލި ބޯޅަ އަމާޒުވީ ގޯލުގެ މަތީ ކަނަށެވެ. އެއާއެކު ޑޯޓްމަންޑުން ނަތީޖާ ހަމަހަމަ ކުރުމަށް ކުރި މަސައްކަތް ކާމިޔާބުވީ އޭގެ ދެ މިނެޓު ފަހުންނެވެ. ސަބަސްޓިއެން ހާލާ ތަނަވަސްކޮށްދިން ފުރުސަތެއްގައި ތިރިތިރިން ބޯޅަ ގޯލަށް ވައްދާލައިގެން ޑޯޓްމަންޑަށް ނަތީޖާ ހަމަހަމަ ކޮށްދިނީ ކަރިމް އަޑަޔޭމީ އެވެ. މެޗުގައި ޑޯޓްމަންޑަށް ވަނީ ލީޑު ނެގުމަށް ވެސް ރަނގަޅު ފުރުސަތުތަކެއް ލިބި ބޭކާރު ވެފަ އެވެ.

މެޗު އެއްވަރުވުމުން ޑޯޓްމަންޑު އެއް ވަނައިގައި އޮތީ ދެ ޕޮއިންޓުގެ ލީޑަކުންނެވެ. އެއީ ކުޅުނު 30 މެޗުން 61 ޕޮއިންޓާއެކު އެވެ. ޑޯޓްމަންޑަށް ވުރެ މެޗެއް މަދުން ކުޅެގެން ދެ ވަނައިގައި ބަޔާން އޮތީ 59 ޕޮއިންޓާއެކު އެވެ.