"މޮރިޝަސް އަށް ކާމިޔާބުވިނަމަ ރާއްޖޭގެ ވަރަށް ބޮޑު ސަރަހައްދެއް ގެއްލުމުގެ ފުރުސަތު އޮންނާނެ"
ކަންބޮޑުވީ މޮރިޝަސްއަށް އެ ދައުވާ "އެޓްރެކްޓިވް" ގޮތެއްގައި ހުށަހަޅަން ކާމިޔާބު ކުރެވިފައިވާތީ
އިޓްލޮސްގައި ކުރިއަށްދިޔަ އިން ވަކިކުރުމުގެ މައްސަލައިގައި ރާއްޖެއަށް ވަނީ ކާމިޔާބު ލިބިފައި
އުތުރު ޗަގޯސް އާކިޕެލަގޯ ރީޖަންގެ 200 ނޯޓިކަލް މޭލުން ބޭރުގައި ކޮންޓިނެންޓަލް ޝެލްފް އަށް މޮރިޝަސް އަށް ހައްގު ލިބިގެން މޮރިޝަސް އަށް މައްސަލަ ކާމިޔާބު ކުރެވުނު ނަމަ ވަރަށް ބޮޑު ސަރަހައްދެއް ރާއްޖެއިން ނަގައި މޮރިޝަސް އަށް ދިނުމުގެ ފުރުސަތު އޮތް ކަމަށް ރާއްޖޭގެ ލީޑް ކައުންސެލް އޮން ދަ ޑެލިމިޓޭޝަން ޕްރޮފެސަރ ޕަޔަމް އަޚަވަން ވިދާޅުވެއްޖެއެވެ.
އިންޑިއާ ކަނޑުގައި މޮރިޝަސް އާއި ރާއްޖެއާއި ދެމެދު ކަނޑުގެ ސަރަހައްދު ކަނޑައެޅުމާ ގުޅޭ މައްސަލައިގައި، އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އިން ހުކުރު ދުވަހު ވަނީ ހުކުމްކޮށްފައެވެ.
މިކަމާ ގުޅޭގޮތުން ހުކުރު ދުވަހު ބޭއްވި ނޫސްވެރިންގެ ބައްދަލުވުމުގައި އިންޑިއާ ކަނޑު (މޮރިޝަސް ވ ދިވެހިރާއްޖެ) މައްސަލައިގައި ރާއްޖޭގެ ލީޑް ކައުންސެލް އޮން ދަ ޑެލިމިޓޭޝަން އޮފް ދަ މެރިޓައިމް ބައުންޑަރީ ޕްރޮފެސަރު ޕަޔަމް އަޚަވާން އާއި ޕްރޮފެސަރު ޖީން މާކް ތޯވެނިން ވަނީ މި މައްސަލައާ ގުޅިގެން މީޑިއާއާ ވާހަކަ ދައްކަވާފައެވެ.
އުތުރު ޗަގޯސް އާކިޕެލަގޯ ރީޖަންގެ 200 ނޯޓިކަލް މޭލުން ބޭރުގައި މޮރިޝަސް އަށް ކޮންޓިނެންޓަލް ޝެލްފް އަށް ހައްގު ދިނުމުގެ މައްސަލަ މޮރިޝަސް އިން ކާމިޔާބު ކުރިނަމަ ރާއްޖެއަށް ކުރާނެ އަސަރުތަކަކީ ކޮބައިތޯ ރާއްޖެޓީވީން ކުރި ސުވާލުގެ ޖަވާބުގައި ޕްރޮފެސަރު ޕަޔަމް ވިދާޅުވީ އެއީ އެމީހުންގެ "އެންމެ ބޮޑު" ކަންބޮޑުވުން ކަމަށެވެ.
އެގޮތުން އޭނާ ވިދާޅުވީ އެ ނިންމުމަކީ މޮރިޝަސްގެ ފައިދާއަށް ނިންމި ނިންމުމެއް ނަމަ މޮރިޝަސްއަށް 11000 އަކަކިލޯމީޓަރުގެ ޕޮޓެންޝަލް ކްލޭމްއެއް ރާއްޖެއަށް ގެއްލުންވާނެ ކަމަށާއި އޭގެ މާނައަކީ ރާއްޖެއަށް ވަރަށް ބޮޑު ސަރަހައްދެއް ގެއްލިގެންދާނެ ކަމަށެވެ.
ޕްރޮފެސަރު ވިދާޅުވީ ނަސީބަކުން އިޓްލޮސްގެ ސްޕެޝަލް ޗެމްބަރުން އިއްތިފާގުން ނިންމީ މޮރިޝަސްގެ ދައުވާގެ އެއްވެސް އަސާސެއް ފަންނީ ނުވަތަ ސައިންޓިފިކް ހެކިތަކެއް ނެތް ކަމަށާއި ޗެމްބަރުގެ ބަހުން ބުނާނަމަ "މޮރިޝަސްގެ އެފަދަ ހައްގެއް އޮތްތޯ ބޮޑު ޔަގީންކަމެއް ނެތް" ކަމަށެވެ.
ޕްރޮފެސަރު އިތުރަށް ވިދާޅުވީ، މޮރިޝަސް އިން ހުށަހެޅި ދައުވާއާއި ހިލާފަށް، ރާއްޖެއާ ގުޅޭގޮތުން ކަނޑުގެ ބިންގަލާއި، ސިފަތަކާއި، ބޭރު ޝެލްފް ކައިރިވެފައި ހުރުމަށް ބަލާއިރު، ރާއްޖޭގެ ހައްގުގައި އެކަންކަން ނުހިނގާނެކަމަށެވެ.
ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޕްރޮފެސަރު ތޯވެނިން ވިދާޅުވީ އެކަމާ ގުޅިގެން އެމީހުން އެހާ ކަންބޮޑުވަނީ 200 ނޯޓިކަލް މޭލުން ބޭރުގެ ހައްގެއް ހޯދުމަށް މޮރިޝަސްއިން ދައުވާކޮށް، އެ ލިމިޓޭޝަނަށް ދައުވާ "އެޓްރެކްޓިވް" ގޮތެއްގެ ގޮތުގައި ހުށަހަޅަން ކާމިޔާބު ވުމުން ކަމަށެވެ.
އޭނާ ފާހަގަކުރެއްވި ގޮތުގައި އެމީހުން އެކަން ސިފަކުރުމަށް ގެންނަން މަސައްކަތް ކުރީ، ބޭރު ބައްރާ ގުޅޭ ދައުވާތަކުގެ ކޮންމެވެސް ވަރަކަށް ހަމަހަމަ ހިއްސާއެއް ކުރަންވީ ވަގުތު ޖެހިއްޖެ ކަމުގެ ޚިޔާލު ހޯދުމަށެވެ.
ޕްރޮފެސަރު އިތުރަށް ވިދާޅުވީ އެމީހުން "ފުދޭވަރަކަށް" ރަނގަޅު މަސައްކަތެއް ކުރި ކަމަށް ގަބޫލުކުރައްވާ ކަމަށާއި އެއީ "ބޮޑު" ކާމިޔާބީއެއް ކަމަށް ގަބޫލުކުރައްވާ ކަމަށެވެ. އަދި މޮރިޝަސްއަށް ކާމިޔާބުވި ނަމަ އެމީހުން ހޯދާ ބައިގެ ގޮތުން ރާއްޖެއަށް ލިބޭނީ ކިހާވަރެއްކަމެއްވެސް ނޭނގޭ ކަމަށެވެ.
