އެއް އަހަރުވީ އިރު ވެސް، ކަނޑުގެ މައްސަލައިގެ ރިޕޯޓު ވަޒީރުންގެ މަޖިލީހަށް ހުށަނާޅާ
މި މައްސަލައިގައި 2024 ވަނަ އަހަރުގެ މާޗު މަހުގެ ހަ ވަނަ ދުވަހު އޮތް ނޫސްވެރިންގެ ބައްދަލުވުމުގައި ބަންޑާރަ ނައިބު އަލްއުސްތާޛް އަޙުމަދު އުޝާމް ވިދާޅުވެފައި ވަނީ، އެ ރިޕޯޓު ވަރަށް އަވަހަށް ވަޒީރުންގެ މަޖިލީހަށް ހުށަހަޅުއްވާނެ ކަމަށް.
ރައީސުލްޖުމްހޫރިއްޔާ ޑރ.މުަހައްމަދު މުއިއްޒު
ދިވެހި ރާއްޖޭގެ ކަނޑުގެ ސަރަހައްދުން ބައެއް ގެއްލިފައިވާ ކަމަށާއި، އެ ސަރަހައްދު ހޯދުމަށް މަސައްކަތް ކުރައްވާނެ ކަމަށް ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ވިދާޅުވި ނަމަވެސް، އެ މައްސަލަ އަދި ވެސް އޮތީ ދިރާސާ ކުރުމުގެ މަރުޙަލާގައި ކަމަށް އެމަނިކުފާނު ވިދާޅުވެއްޖެ އެވެ.
ރައީސުލްޖުމްހޫރިއްޔާގެ އޮފީހުގައި ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ރައީސް މުޢިއްޒު ވަނީ މިހާތަނަށް ސަރުކާރުން ކޮށްފައިވާ މަސައްކަތްތަކުގެ އެންމެ ފަހުގެ މައުލޫމާތު ހިއްސާކޮށްފަ އެވެ.
އިންޓަނޭޝަނަލް ޓްރައިބުނަލް ފޮރ ދަ ލޯ އޮފް ދަ ސީ (އިޓްލޮސް) އިން ކޮށްފައިވާ ޙުކުމް އިސްތިއުނާފު ކުރުމަކީ އެމަނިކުފާނުގެ ރިޔާސީ އެންމެ ބޮޑު އެއް ވައުދުފުޅެވެ. އެގޮތުން، ސަރުކާރުގެ ފުރަތަމަ 100 ދުވަހުގެ ތެރޭގައި އެ މައްސަލަ އިޓްލޮސްގައި އިސްތިއުނާފު ކުރާނެ ކަމަށް އޮތީ ވައުދުވެ ވަޑައިގެންފަ އެވެ.
ނޫސްވެރިންގެ ބައްދަލުވުމުގައި ރައީސް މުޢިއްޒު ހުށަހެޅުއްވި ޕްރެޒެންޓޭޝަންގައި ބުނެފައި ވަނީ، އެ މަސައްކަތަށް އައްޔަން ކުރެެވުނު ބައިނަލްއަޤުވާމީ މާހިރުންގެ ލަފާ ލިބިފައިވާ ކަމަށެވެ. އަދި ބަންޑާރަ ނައިބުގެ އޮފީހުން އެ ލަފާ ދިރާސާ ކުރުމަށްފަހު، ވަޒީރުންގެ މަޖިލީހަށް ހުށަހަޅުއްވައި ކުރިއަށް ދާނެ ގޮތެއް ނިންމަވާނެ ކަމަށް ވެސް ވަނީ ބުނެފަ އެވެ.
މީގެ އިތުރުން، ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުން މޮރިޝަސްގެ ބޮޑު ވަޒީރަށް އޭރު ފޮނުއްވި ސިޓީގެ ސަބަބުން، ދޫކޮށްލި ބައި އަލުން ހޯދުމުގައި ގޮންޖެހުންތަކެއް ހުރި ކަމަށް މާހިރުން ބުނެފައިވާ ކަމަށް ވެސް ވަނީ ފާހަގަ ކޮށްފަ އެވެ.
ކުރީގެ ސަރުކާރުން މޮރިޝަސްގެ ބޮޑު ވަޒީރަށް ފޮނުވި ސިޓީ ސޯޝަލް މީޑިއާގައި ލީކުވެފައިވާއިރު، އެ ސިޓީގައި ރާއްޖޭގެ ކަނޑުން ބައެއް ދޫކޮށްލާ ވާހަކަ ނެތް ކަމަށް އޭރު ވަނީ ފާހަގަ ވެސް ވެފަ އެވެ. އަދި އެ ސިޓީގެ ސަބަބުން ރާއްޖޭގެ ކަނޑުން އެއްވެސް ބައެއް ގެއްލިގެން ނުދާ ކަމަށް، ބާ ކައުންސިލްގެ ލޯ ރިވިއު ކޮމިޓީ (އެލްއާރްސީ) އިން ވަނީ ނިންމައިފަ އެވެ.
މި މައްސަލައިގައި 2024 ވަނަ އަހަރުގެ މާޗު މަހުގެ ހަ ވަނަ ދުވަހު އޮތް ނޫސްވެރިންގެ ބައްދަލުވުމުގައި ބަންޑާރަ ނައިބު އަލްއުސްތާޛް އަޙުމަދު އުޝާމް ވިދާޅުވެފައި ވަނީ، އެ ރިޕޯޓު ވަރަށް އަވަހަށް ވަޒީރުންގެ މަޖިލީހަށް ހުށަހަޅުއްވާނެ ކަމަށެވެ. ނަމަވެސް، އެއް އަހަރަށް ވުރެ ގިނަ ދުވަސްވީއިރު ވެސް، އެ ރިޕޯޓު ވަޒީރުންގެ މަޖިލީހަށް ހުށަނާޅަ އެވެ.
މީގެ އިތުރުން ރައީސް މުޢިއްޒު ދެއްވި ޕްރެޒެންޓޭޝަންގައި ފާހަގަ ކޮށްފައި ވަނީ، ޗާގޯސްއާ ގުޅޭ ގޮތުން އިނގިރޭސިވިލާތުން ދާދި ފަހުން ނިންމި ނިންމުމާ ގުޅިގެން، ކޮށްފާނެ އަސަރާ ގުޅޭ ގޮތުން، ބޭރުގެ މާހިރުންގެ ލަފާ ހޯދުމުގެ މަސައްކަތް ދަނީ ކުރަމުންނެވެ.
ޗާގޯސްގެ މިލްކުވެރިކަން މޮރިޝަސް އަށް ދިނުމަށް އިނގިރޭސިވިލާތުގެ ސަރުކާރުން ނިންމާފައި ވަނީ 2024 ވަނަ އަހަރުގެ އޮކްޓޫބަރު މަހުގެ ތިން ވަަނަ ދުވަހު އެވެ. އޭގެ ފަހުން މިހާތަނަށް ހަތް މަސް ދުވަސް ވެގެން ދިޔައިރު ވެސް، ބޭރު މާހިރުންގެ ލަފާ ދިވެހި ސަރުކާރުން ހޯދާފައި ނެތް ކަން ވެސް ފާހަގަ ކޮށްލެވެ އެވެ.
ޗާގޯސް މައްސަަލައިގައި ކުރީގެ ސަރުކާރުން ރާއްޖޭގެ ކަނޑުގެ ސަރަހައްދުން ބައެއް ދޫކޮށްލާފައިވާ ކަމަށް ވިދާޅުވެ، ރައީސް މުޢިއްޒު ވަނީ ރިޔާސީ ކެމްޕެއިންގެ ތެރޭގައި ވެސް ވަރަށް ބޮޑަށް ވާހަކަ ދައްކަވައިފަ އެވެ. އަދި އެ ސަރަހައްދުން ރާއްޖެ އަށް ހޯއްދަވައި ދެއްވާނެ ކަމަށް ވަނީ ވައުދުވެ ވަޑައިގެންފަ އެވެ.
