އައިކޮމް އޮފީހުން ނިންމި ނިންމުމުގެ ލިޔެކިޔުންތައް އަދިވެސް ނުލިބޭ – ފޮރިން މިނިސްޓްރީ
27 އެޕްރީލު 2023 | ބުރާސްފަތި 11:41މިނިސްޓްރީގެ މި ނިންމުމަކީ، މައުލޫމާތު ހޯދައި ލިބިގަތުމުގެ ހައްގުގެ ގާނޫނުގައި ކަނޑައަޅާފައިވާ އުސޫލުތަކާ އެއްގޮތަށް ނިންމާފައިވާ ނިންމުމެއް
ފޮރިން މިނިސްޓްރީ
ކޮވިޑްއިން އަރައިގަތުމަށްޓަކައި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ބޭނުންކުރެއްވި އިގްތިސާދީ "ފޯމިއުލާ" ހޯދަން އެދުނު ގައުމުތައް ފަސް ދުވަހުގެތެރޭގައި ހާމަކުރުމަށް، އިންފޮމޭޝަން ކޮމިޝަނަރުގެ އޮފީހުން، 25 އޭޕްރީލް ވީ އަންގާރަ ދުވަހު ބޭއްވުނު ހުޅުވާލެވިފައިވާ ބައްދަލުވުމުގައި ފޮރިން މިނިސްޓްރީއަށް އަންގާފައިވީ ނަމަވެސް، މިމައްސަލައާ ގުޅޭގޮތުން އިންފޮމޭޝަން ކޮމިޝަނަރުގެ އޮފީހުން ނިންމި މި ނިންމުމުގެ ލިޔެކިޔުންތައް މިނިސްޓްރީ އޮފް ފޮރިން އެފެއަރޒަށް ނުލިބޭކަމަށް އެމިނިސްޓްރީގެ އޮފިޝަލަކު ވިދާޅުވެއްޖެއެވެ.
ކޮވިޑް-19ށްފަހު ރާއްޖޭގެ އިގްތިސާދު ކޮޅަށް ޖެހުމަށްޓަކައި ރައީސް ސާލިހު ބޭނުންކުރެއްވި ފޯމިއުލާ ހޯދަން ދުނިޔޭގެ ގައުމުތަކުގެ ވެރިން އުޅުއްވާކަމަށް، މިނިސްޓަރ އޮފް ފޮރިން އެފެއަރޒް އަބްދުﷲ ޝާހިދު، މިދިޔަ ޖަނަވަރީ މަހު އައްޑޫ ސިޓީގައި ބޭއްވުނު ޖަލްސާއެއްގައި ވިދާޅުވުމާ ގުޅިގެން، އެގައުމުތަކަކީ ކޮބައިކަމާއި އެގައުމުތަކުގެ ވެރިންގެ ނަންފުޅުތައް ހޯދުމަށް ”ދިޔަރެސް“ ނޫހުގެ ނޫސްވެރިޔާ އަހުމަދު އަޒާން، މައުލޫމާތު ހޯދައި ލިބިގަތުމުގެ ގާނޫނުގެ ދަށުން މިނިސްޓްރީ އޮފް ފޮރިން އެފެއަރޒްގައި އެދިފައިވެއެވެ.
ނަމަވެސް އެމިނިސްޓްރީން ވަނީ އެ މައުލޫމާތަކީ، ޑިޕްލޮމެޓިކް ޗެނަލްތައް މެދުވެރިކޮށް ބަދަލުކުރެވޭ މައުލޫމާތެއް ކަމަށާއި، ވިއެނާ ކޮންވެންޝަން އޮން ޑިޕްލޮމެޓިކް ރިލޭޝަންސް (1961) އަދި ވިއެނާ ކޮންވެންޝަން އޮން ކޮންސިއުލަރ ރިލޭޝަންސް (1963)ގެ ދަށުން ހިމާޔަތާއި ރައްކާތެރިކަން ލިބިފައިވާ ލިޔެކިޔުން ކަމުގައިވާތީ، ބައިނަލްއަގުވާމީ ޑިޕްލޮމެޓިކް އުސޫލުތަކާއި، ގާނޫނު ނަންބަރު 2014/1 (މައުލޫމާތު ހޯދައި ލިބިގަތުމުގެ ހައްގުގެ ގާނޫނު)ގެ 22 ވަނަ މާއްދާގެ (ނ) އަށް ރިއާޔަތްކުރާއިރު، ހިއްސާކުރެވެން ނެތް މައުލޫމާތެއްކަން ނޫސްވެރިޔާ އަހުމަދު އަޒާންއަށް ލިޔުމުން އަންގަވާފައިއެވެ. އަދި މިނިސްޓްރީގެ މި ނިންމުމަކީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގައި ކަނޑައަޅާފައިވާ އުސޫލުތަކާއި އެއްގޮތަށް ނިންމާފައިވާ ނިންމުމެއް ކަމަށްވެސް ފޮރިން އެފެއަރޒްގެ އޮފިޝަލް ވިދާޅުވިއެވެ.
އިންފޮމޭޝަން ކޮމިޝަނަރުގެ އޮފީހުން 25 އޭޕްރީލް ވީ އަންގާރަ ދުވަހު ބޭއްވުނު ހުޅުވާލެވިފައިވާ ބައްދަލުވުމުގައި، ފޮރިން މިނިސްޓްރީއަށް މައުލޫމާތު ހާމަކުރުމަށް ދީފައިވާ މުހުލަތު 5 ދުވަހުގެ ތެރޭގައި ހަމަވާއިރު، މިއަދާ ހަމައަށްވެސް، އެ ބައްދަލުވުމުގައި އެ ކޮމިޝަނުން ނިންމާފައިވާ ނިންމުމުގެ ލިޔެކިޔުންތައް އެއޮފީހުން ފޮރިން މިނިސްޓްރީއަށް ފޮނުވާފައި ނުވާކަމަށް އެމިނިސްޓްރީގެ އޮފިޝަލް ވިދާޅުވިއެވެ.
