މޭޖަރ ޢަލީ ސަލީމްގެ ޖަނާޒާ ރަސްމީ ޢިއްޒަތުގައި ބާއްވައިފި
27 އެޕްރީލު 2023 | ބުރާސްފަތި 02:29މަރުޙޫމް މޭޖަރ ޢަލީ ސަލީމުގެ ޖަނާޒާ ރަސްމީ ޢިއްޒަތުގައި ބާއްވާފައިވަނީ ބުދަ ދުވަހުގެ ރޭ އިޝާ ނަމާދަށް ފަހު މަސްޖިދުއްތަޢާވުން 'އާސަހަރާ މިސްކިތު' ގައި
މޭޖަރ އަލީ ސަލީމްގެ ޖަނާޒާ ކުރިޔަށްގެންދަނީ
އަސްކަރީ ޚިދުމަތުގައި އިޚްލާޞްތެރިކަމާއި ވަފާތެރިކަންމަތީ 34 އަހަރަށްވުރެ ދިގު މުއްދަތެއްގައި އަގުނުކުރެވޭފަދަ އެތައް ޚިދުމަތްތަކެއް ކޮށްދެއްވާފައިވާ އަލްމަރުޙޫމް މޭޖަރ ޢަލީ ސަލީމުގެ ޖަނާޒާ ރަސްމީ ޢިއްޒަތުގައި ބާއްވައިފިއެވެ.
މަރުޙޫމް މޭޖަރ ޢަލީ ސަލީމުގެ ޖަނާޒާ ރަސްމީ ޢިއްޒަތުގައި ބާއްވާފައިވަނީ ބުދަ ދުވަހުގެ ރޭ އިޝާ ނަމާދަށް ފަހު މަސްޖިދުއްތަޢާވުން 'އާސަހަރާ މިސްކިތު' ގައެވެ. ޢަސްކަރީ އާދަކާދައާއި އުޞޫލުތަކާއެއްގޮތަށް ބޭއްވުނު މި ޖަނާޒާގައި ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލާއި، ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް ޢަބްދުއްރަޙީމް ޢަބްދުއްލަތީފާއި، ޖެނެރަލް އޮފިސަރުންނާއި އެހެނިހެން ރޭންކުތަކުގެ ގިނަ ޢަދަދެއްގެ ސިފައިންނާއި އާންމުން ބައިވެރިވިއެވެ.
ބުދަ ދުވަހުގެ ހަވީރުން ފެށިގެން އަލްމަރުޙޫމް މޭޖަރ ޢަލީ ސަލީމުގެ މޫނުދެއްކުމުގެ ކަންކަން ކުރިއަށް ގެންގޮސްފައިވާއިރު، މިނިސްޓަރ އޮފް ޑިފެންސް އަލްއުސްތާޛާ މާރިޔާ އަޙްމަދު ދީދީ އާއި ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލާއި، ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް ޢަބްދުއްރަހީމް ޢަބްދުއްލަތީފް ވަނީ އާސަހަރާއަށް ޒިޔާރަތްކުރައްވައި އަލްމަރުޙޫމް މޭޖަރ ޢަލީ ސަލީމުގެ ޢާއިލާގެ ބޭފުޅުންނާ ބައްދަލުކުރައްވާ ތަޢުޒިޔާ ދަންނަވާފައެވެ.
އަންގާރަ ދުވަހު މޭޖަރ އަލީ ސަލީމް އަވަހާރަވީ އާލާސްކަންފުޅާ އުޅުއްވުމަށްފަހުއެވެ. އެހެންނަމަވެސް އެދުވަހުވެސް އޮފީހަށް ނުކުންނެވިއެވެ.
މޭޖަރ އަލީ ސަލީމަކީ، ދިވެހި އަސްކަރީ ޚިދުމަތުގައި 34 އަހަރު ދުވަހު އަގުނުކުރެވޭފަދަ އެތައް ޚިދުމަތްތަކެއް ކޮށްދެއްވާފައިވާ ބޭފުޅެކެވެ. ޚާއްސަކޮށް، ފަޔަރ ފައިޓަރުން ތަމްރީން ކުރެއްވުމުގައި މުހިންމު ދައުރެއް އަދާކުރައްވާފައިވެއެވެ.
