ރަނގަޅު ޑިސިޕްލިނަކާއެކު ރަނގަޅު ގޭމަކަށް ތައްޔާރުވެއްޖެ ނަމަ، ނަތީޖާ ނެރެވޭނެ: އިންމަ

ރަނގަޅު ޑިސިޕްލިނަކާއެކު ރަނގަޅު ގޭމަކަށް ތައްޔާރުވެއްޖެ ނަމަ، ކޮންމެ ވެސް ނަތީޖާއެއް ނެރެވޭނެ ކަމަށް ސުޕަ ޔުނައިޓެޑު ސްޕޯޓްސް (ސަސް)ގެ ކޯޗު އިސްމާއީލް މަހްފޫޒް (އިންމަ) ބުނެފި އެވެ.

އިންމަ މިހެން ބުނީ މިއަހަރުގެ ޕްރެޒިޑެންޓްސް ކަޕްގެ ސެމީ ފައިނަލްގައި ވަރުގަދަ މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށް ނިކުންނަ މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުންނެވެ. އިންމަ ބުނީ، ކޮންމެ ގޮތެއްވީ ނަމަވެސް މާޒިޔާ އަކީ ސަސް އަށް ވުރެ ވަރުގަދަ ޓީމެއް ކަމަށެވެ. ނަމަވެސް ފުޓުބޯޅައިގައި އޭނާ ޤަބޫލު ކުރާ ޤަބޫލު ކުރުމެއް އޮންނާނެ ކަމަށެވެ. އެއީ ރަނގަޅު ޑިސިޕްލިނަކާއެކު ރަނގަޅު ގޭމަކަށް ތައްޔާރުވެގެން ސަސް އިން ކުޅެފި ނަމަ، ކޮންމެ ވެސް ނަތީޖާއެއް ހާސިލްވުމުގެ ފުރުސަތު އޮތުން ކަމަށް އޭނާ ބުންޏެވެ. އެހެންކަމުން މިހާރު ކުރަން ޖެހޭނެ ސުވާލަކީ ސަސް އޮތީ އެ ހާލަަތށް ތައްޔާރުވެފައިތޯ ނުވަތަ ނޫންތޯ ކަމަށް އިންމަ ވަނީ ބުނެފަ އެވެ. އެކަން ފާހަގަ ކުރަމުން އިންމަ ބުނީ، އަބަދު ވެސް އެންމެ ވަރުގަދަ ޓީމަކާ ދެކޮޅަށް ކުޅޭއިރު، އަނެއް ޓީމަށް ވެސް ކޮންމެ ވެސް ފުރުސަތުތަކެއް އޮންނާނެ ކަމަށެވެ. އެހެންކަމުން ސަސް ސެމީ މެޗުގައި މާޒިޔާއާ ދެކޮޅަށް ނުކުންނާނީ އެ ފުރުސަތުތަކުގެ ބޭނުން އެންމެ ރަނގަޅު ގޮތުގައި ހިފުމަށް ފުރިހަމަ އަށް ތައްޔާރުވެގެން ކަމަށް އިންމަ ވަނީ ބުނެފަ އެވެ.

ލީގުގައި މާޒިޔާ އިން އެންމެ ފަހުން ބުރު ސްޕޯޓްސްއާ ދެކޮޅަށް ކުޅުނު މެޗުން ބަލިވެފައި އޮތުމުން އެކަމުގެ ޕްރެޝަރު އެ ޓީމަށް އޮންނާނެ ކަމަށް ފެނޭތޯ ސުވާލު ކުރުމުން އިންމަ ބުނީ، މާޒިޔާ އަށް ޕްރެޝަރު އޮންނާނެ ކަމެއް ނުވަތަ ނޫން ކަމަށް ބުނަން ނޭންގޭ ކަމަށެވެ. ނަމަވެސް އިންމަ ދިން ޔަޤީން ކަމަކީ މާޒިޔާއާ ދެކޮޅަށް ނިކުންނައިރު، ސަސް އަށް އެއްވެސް ޕްރެޝަރެއް ނޯންނާނެ ކަމުގެ ޔަޤީންކަމެވެ. އިންމަ ބުނީ ސަަސް އިން ދަނޑަށް އަރާނީ ރަނގަޅު ކުޅުމެއް ދައްކައި، ކުޅުންތެރިން ހިތްހަމަ ޖެހިގެން ދަނޑުން ފޭބުމުގެ މަޤުސަދުގައި ކަމަށެވެ. މާޒިޔާއާ ދެކޮޅަށް ކުޅޭ މެޗަކީ ނޮކްއައުޓް މެޗަކަށްވާތީ، މެޗުގައި ދައްކާ ރަނގަޅު ކުޅުމާއެކު ނަތީޖާ ނެރެން ވެސް ބޭނުންވާ ކަމަށް އިންމަ ބުންޏެވެ.

މީގެ އިތުރުން އިންމަ ބުނީ މާޒިޔާ އަކީ ދިވެހި ފުޓުބޯޅައިގައި އެންމެ ތަރުތީބުން، ރަނގަޅު މެނޭޖުމަންޓަކާއެކު ހިންގަމުން އަންނަ ކުލަބެއް ކަމަށެވެ. އެގޮތުން މާޒިޔާގައި ތިބީ ވެސް ވަރަށް މޮޅެތި ކުޅުންތެރިން ކަމަށާއި، އެހެންކަމުން ކުލަބުގެ އުންމީދުތައް ވެސް ހުންނާނީ ވަރަށް މަތީގައި ކަމަށް އިންމަ ބުންޏެވެ. އޭނާ ބުނީ މާޒިޔާގެ ކޯޗުކަމުގައި ކޮންމެ މީހަކު ހުރި ނަމަވެސް ނަތީޖާ ނެރެން މަޖުބޫރު ވާނެ ކަމަށެވެ. ޚާއްސަކޮށް އެހާ ބޮޑު ހޭދައެއް ކުރަމުން އަންނައިރު، އެކަން އޮންނާނީ އެގޮތުގައި ކަމަށެވެ.

ސަސްގެ އެންމެ އިތުބާރު ކުޅުންތެރިޔާ އަލީ އަޝްފާގު (ދަގަނޑޭ) އަށް ކުރިން މެޗުގައި ލިބުނު އަނިޔާއާ ގުޅޭ ގޮތުން އިންމަ ބުނީ، ދަގަނޑޭ އަދި ވެސް ހުރީ އަނިޔާގައި ކަމަށެވެ. އެހެންކަމުން މާޒިޔާ މެޗުގައި ދަގަނޑޭ ބޭނުން ނުކުރާނެ ކަމަށާއި، ސަބަބަކީ އެއްވެސް ކަހަލަ ރިސްކެއް ނަގަން ބޭނުން ނުވުން ކަމަށް ވެސް އޭނާ ބުންޏެވެ. އިންމަ ބުނީ އުންމީދު ކުރަނީ ޕްރެޒިޑެންޓްސް ކަޕަށްފަހު، ދިވެހި ލީގަށް ނިކުންނައިރު ދަގަނޑޭ އެނބުރި ކުޅުމުގެ ތެރެއަށް އާދެވޭ ވަރުވާނެ ކަމަށެވެ. އެހެންކަމުން ޓީމުގައި މިވަގުތު ދަގަނޑޭ ނެތުމަކީ ސަސް އަށް ލިބޭ ވަރަށް ބޮޑު އުނިކަމެއް އަދި ގެއްލުމެއް ކަމަށެވެ. ނަމަވެސް ސަސްގައި ތިބި ޒުވާން ކުޅުންތެރިންނާމެދު އޭނާގެ އުންމީދު އޮތް ކަމަށާއި، އެ ކުޅުންތެރިން އަންނަނީ ދުވަހުން ދުވަހަށް ކަންކަން ރަނގަޅު ކުރަމުން ކަމަށް ވެސް އޭނާ ވަނީ ބުނެފަ އެވެ.

ސަސް އިން މާޒިޔާއާ ދެކޮޅަށް ނިކުންނާނީ ބުރާސްފަތި ދުވަހުގެ ރޭ އެވެ.