ޕްރެޒިޑެންޓްސް ކަޕްގައި އެންމެ ފަހުގެ ޗެމްޕިއަން ކުލަބު ވެެލެންސިއާ ބަލިކޮށް، ގްރޫޕް އޭގެ އެއް ވަނައިގައި ކުލަބު އީގަލްސް އިން ސެމީ ފައިނަލަށް ދަތުރުކޮށްފި އެވެ.

އީގަލްސް އިން ސެމީ އަށް ދަތުރު ކުރީ މި ގްރޫޕްގައި ކުޅުނު ދެ މެޗުން ވެސް މޮޅުވެ ހަ ޕޮއިންޓާއެކު އެވެ. މި ގްރޫޕްގެ ދެ ވަނަ ސުޕަ ޔުނައިޓެޑު ސްޕޯޓްސް (ސަސް) އަށް ލިބެނީ ތިން ޕޮއިންޓާއެކު އެވެ. ޕޮއިންޓެއް ނުލިބި އެންމެ ފަހުގެ ޗެމްޕިއަން ވެލެންސިއާ ވަނީ މުބާރާތުން ކަޓައިފި އެވެ.

ހޯމަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު އީގަލްސް އިން ކާމިޔާބު ކުރީ 4-0 އިންނެވެ. މެޗުގައި އީގަލްސްގެ ފުރަތަމަ ދެ ލަނޑު ޖެހީ ފުރަތަމަ ހާފުގަ އެވެ. ފުރަތަމަ ހާފު ފަށައިގެން ވެލެންސިއާގެ ޒުވާން ޓީމުގެ ފަރާތުން ވެސް ވަނީ މޮޅު ކުޅުމެއް ފެނިފަ އެވެ،. އެ ޓީމުން ވެސް ވަނީ އީގަލްސްގެ ގޯލަށް ނުރައްކާ ކުރުމަށް ހަމަލާތަކެއް އުފައްދައިފަ އެވެ. ނަމަވެސް މެެޗުގައި އީގަލްސް އިން ވަނީ 11 ވަނަ މިނެޓުގައި ލަނޑު ޖަހައި ކުރި ހޯދައިފަ އެވެ. އެއީ ވެލެންސިއާގެ ގޯލް ކީޕަރު އާދަމް އިމްއާންގެ އަތުގައި ޖެހިފައި ރީ ބައުންސަށް ނިކުތް ބޯޅަ ގޯލަށް ވައްދާލައިގެން އިސްމާއީލް އީސަ (މެސީ) ޖަހައިދިން ލަނޑެކެވެ. އޭގެ ފަހުން 37 ވަނަ މިނެޓުގައި އީގަލްސް އަށް ލީޑު ފުޅާކޮށްދިނީ ވެސް މެސީ އެވެ.

އީގަލްސްގެ އަނެއް ދެ ލަނޑު ޖަހާފައި ވަނީ ދެ ވަނަ ހާފުގަ އެވެ. މެޗުގެ65 ވަނަ މިނެޓުގައި އީގަލްސްގެ ތިން ވަނަ ލަނޑު ޖަހައި، އެ ޓީމުގެ ލީޑު އިތުރަށް ފުޅާކޮށްދިނީ އަޙުމަދު ރިޒުވާން (ރިޒޭ) އެވެ. ކުރިން މެޗެކޭ އެއްގޮތަށް މިރޭގެ މެޗުގައި ވެސް ރިޒޭ ކުޅެން ނިކުމެފައި ވަނީ ބަދަލު ކުޅުންތެރިޔެއްގެ ގޮތުގަ އެވެ. އީގަލްސްގެ ފަހު ލަނޑު 74 ވަނަ މިނެޓުގައި ޖެހީ އަޙުމަދު ޙަސަން އެވެ. އޭނާ ވެސް މެޗުގައި ކުޅެން ނިކުމެފައި ވަނީ ބަދަލު ކުޅުންތެރިޔެއްގެ ގޮތުގަ އެވެ.

މުބާރާތުގެ ސެމީ ފައިނަލްގެ މެޗުތައް ކުޅުމަށް ތާވަލްކޮށްފައި ވަނީ އަންނަ ބުރާސްފަތި ދުވަހުގެ ހަވީރު އާއި ރޭގަނޑު އެވެ. ބުރާސްފަތި ދުވަހުގެ ހަވީރު ކުޅޭ ސެމީ ގައި އީގަލްސް ނިކުންނާނީ އަނެއް ގްރޫޕްގެ ދެ ވަނަ ބުރު ސްޕޯޓްސް ކުލަބާ ދެކޮޅަށެވެ. އެރޭގެ މެޗުގައި މާޒިޔާ ސްޕޯޓްސް އެންޑް ރެކްރިއޭޝަން ނިކުންނާނީ ސަސްއާ ދެކޮޅަށެވެ.