ބާޒު ތަމްރީނު ކުރުމުގައި ޢާއިޝާއާއި ދަރިފުޅު ޢުޝާ ވަރެއް ނެތް!
24 އެޕްރީލު 2023 | ހޯމަ 12:43ޢާއިޝާ ދަނީ މި މަސައްކަތުގައި، އޭނާގެ 9 އަހަރުގެ އަންހެން ދަރިފުޅު، ޢުޝާވެސް ބައިވެރި ކުރަމުން
ޢާއިޝާ އަދި އޭނާގެ 9 އަހަރުގެ އަންހެން ދަރިފުޅު، ޢުޝާ
ދެ ޖިންސުގެ ހަމަހަމަކަމަށް ހަރު އަޑުން ވަކާލާތު ކުރަމުން ދާ އަދުގެ ދުނިޔޭގައި ބައެއް ކަހަލަ ކަންކަމަކީ އަދިވެސް ވަކި ޖިންސެއްގެ ބަޔަކަށް ހާއްސަ ކުރެވިފައިވާ ނުވަތަ ވަކި ޖިންސެއްގެ ބަޔަކު ކޮންޓްރޯލް ކުރަމުންދާ ކަމަކަށް އޮންނަނީ ވެފައެވެ. އެފަދަ އެއް މަސައްކަތަކީ އެކުވެރި ޢަރަބި އިމާރާތް (ޔޫއޭއީ)އިން ފެނިގެންދާ ބާޒު އާލާކޮށް، ތަމްރީނުކޮށް، ޝިކާރަ ކުރުމުގައި ބައިވެރިވުމުގެ މަސައްކަތެވެ. މިކަމުގައި އުޅޭ މީހުންނަށް އިނގިރޭސިން ކިޔައި އުޅެނީ ފެލްކަނަރޒްއެވެ. މި މަސައްކަތުގެ ފުރިހަމަ ކޮންޓްރޯލް އޮންނަނީ ފިރިހެނުންގެ އަތްމަތީގައޭވެސް ދެންނެވިދާނެއެވެ. ނަމަވެސް އެކަން ބަދަލު ކުރަމުން ދާ އެކަކީ ޢާއިޝާ އަލް-މަންސޫރީއެވެ.
އޭނާ ގެންގުޅޭ ބާޒުތައް ގޮވައިގެން އަބޫދާބީގެ ހަނަފަސް ސަހަރާތެރެއަށް ޢާއިޝާ ދަތުރު ކުރަނީ އޭނާ ގެންގުޅެ ޖިޕުގައެވެ. ޢާއިޝާ ދަނީ މި މަސައްކަތުގައި، އޭނާގެ 9 އަހަރުގެ އަންހެން ދަރިފުޅު، ޢުޝާވެސް ބައިވެރި ކުރަމުންނެވެ. ބާޒު އާލާކޮށް، ތަމްރީނުކޮށް، ބާޒުތަކާއެކު ޝިކާރަ ކުރުމަކީ ޘަޤާފީ ކުޅިވަރަކަށް ވާ އިރު، ޢާއިޝާ ދަނީ އެ ހުނަރުތައް، ޢުޝާއަށް ދަސްކޮށްދެމުންނެވެ. އެގޮތުން އެކި ކަހަލަ ދޫނިތަކާއި މުސަޅު ހިފަން ބާޒުތަކަށް ދަސްކޮށްދިނުމުގެ ތަމްރީނުތަކުގައި ޢުޝާވެސް ބައިވެރި ކުރެއެވެ.
ބާޒު ބޭނުންކޮށްގެން ޝިކާރަކޮށް، ހަނަފަސް ސަހަރާގެ ތެރެއިން ކާބޯތަކެތި ހޯދުމުގެ ޘަޤާފަތަކީ އެކުވެރި ޢަރަބި ޢިމާރާތުގެ ތާރީޚާ ގުޅިފައިވާ، އެތައް ހާސް އަހަރެއް ވީ ޘަޤާފަތެކެވެ. ޢާއިޝާ މި ހުނަރު ދަސްކުރީ އޭނާގެ ބައްޕަގެ ގާތުންނެވެ.
ދަރިފުޅު ޢުޝާގެ ޢުމުރުން އެންމެ 7 މަހުން ފެށިގެން ޢާއިޝާ ދަނީ އެ މި މަސައްކަތަށް، އެ ދަރިފުޅުވެސް ތަމްރީނު ކުރުވަމުންނެވެ.
ހުސް ވަޤުތުތައް ފަޅުފިލުވާލަން ކުރާ ކަމެއްގެ އިތުރުން، މި ޘަޤާފަތް ދިރުވާ ޢާލާ ކުރުމަށްޓަކާ، ޢާއިޝާ ވަނީ މިކަމުގެ ތެރެއަށް ވީހާވެސް ގިނަ ޢަދަދެއްގެ އަންހެނުން ވެއްދުމަށް އަމާޒު ހިފާފައެވެ. އެގޮތުން، ޢާއިޝާ ދަނީ، ގިނަ ޢަދަދެއްގެ އަންހެނުން ތަމްރީނުވެސް ކުރަމުންނެވެ. އެތައް ސަތޭކަ އަންހެނުންކަށް މިހާރުވެސް ތަމްރީނު ދީފައި ވާ އިރު، ކުޑަ ކުދިންނަށް ހާއްސަކޮށްގެން ފޮތެއްވެސް ލިޔެ ޝާޢިއުކޮށްފައިވެއެވެ.
ސަހަރާ ތެރޭގައި ބާޒުތައް ތަމްރީނުކޮށް ޝިކާރަ ކުރުމަށް ފަހު އެ ބާޒުތައް ގެންނަނީ ޚުދު ޢާއިޝާގެ އަމިއްލަ ގެއަށެވެ. ގޭގައި ބާޒުތައް ތިބޭ ސަރަޙައްދަކީ ރަނގަޅަށް ވައި ދައުރުވާނެ ގޮތަށް، ސަހަރާ ބިމުގެ ވެލި އަޅާ، ފެން ލިބޭނެހެން ފަރުމާ ކޮށްފައި ވާ ހާއްސަ ތަނެކެވެ. މި ބާޒުތަކަށް ކާންދެނީވެސް ވަރަށް ފަރުވާތެރިކަމާއެކުއެވެ. ބާޒުތަކަށް ކާންދޭ ތަކެތީގެ ތެރޭގައި ތާޒާ އަދި ގަނޑުކުރި އެއްގަމު މަހުގެ ބާވަތްތައް ހިމެނެއެވެ. ކޮންމެ ތަމްރީނެއްގެ ކުރިން، ބާޒުތަކުގެ ބަރުދަން ބަލާ، އެ ރެކޯޑްކުރެއެވެ.
ފެލްކަނަރޒްއަށް ހާއްސަކޮށްގެން ޔޫއޭއީއާއި މެދުއިރުމަތީގައި ކުރިއަށް ގެންދާ އެކި މުބާރާތްތަކުގައިވެސް ޢާއިޝާ ވަނީ ބައިވެރިވެފައެވެ.
ބާޒު އުދުއްސާ، ތަމްރީނުކޮށް ބާޒުތަކާއެކު ޝިކާރަ ކުރުމަކީ ޔޫއޭއީއަށް ޒިޔާރަތް ކުރާ ފަތުރުވެރިންގެ މެދުގައިވެސް މަޤުބޫލު ކުޅިވަރެކެވެ. ދުނިޔޭގެ އެކި ކަންކޮޅުތަކުން ގިނަ ޢަދަދެއްގެ ބަޔަކު، އެކަން ތަޖުރިބާކޮށްލުމުގެ ބޭނުމުގައި އެކަނިވެސް ޔޫއޭއީއަށް ދަތުރު ކުރެއެވެ.
