ރާއްޖޭގައި މިހާރު ކުރިއަށްދާ މޯލްޑިވްސް އޯޕަން 10 ބޯލް ބިލިއާޑް މުބާރާތުގެ ނޮކްއައުޓު ބުރުން ރާއްޖޭގެ އެއް ވަނަ ބިލިއާޑު ކުޅުންތެރިޔާ ޙަސަން ޝާޒު ޖާގަ ހޯދައިފި އެވެ.

ނޮކްއައުޓު ބުރުން ޝާޒު ޖާގަ ހޯދީ އާދިއްތަ ދުވަހުގެ ރޭ ކުޅުނު ގަދަ 32ގެ ޕްލޭ އޮފް މެޗުގައި ބަންގްލަދޭޝްގެ ނިޒާމުއްދީންގެ މައްޗަށް ކުރި ހޯދައިގެންނެވެ. ނިޒާމުއްދީންގެ މައްޗަށް ޝާޒު ކުރި ހޯދާފައި ވަނީ 7-6 ގެ ފްރޭމަކުންނެވެ. މެޗު ފަށައިގެން ނިޒާމުއްދީން ލީޑު ކުރަމުން ދިޔަ ނަމަވެސް، ޝާޒު ވަނީ ނަތީޖާ ހަމަހަމަކޮށް ލީޑު ވެސް ހޯދައިފަ އެވެ. ނަމަވެސް އޭގެ ފަހުން ވެސް ނިޒާމުއްދީން ވަނީ ކުރި ހޯދައި، މެޗު ނިންމާލަން ޕޮއިންޓަކަށް ކައިރިކޮށްފަ އެވެ. ނަމަވެސް ޖެހި ޖެހިގެން ހޯދި ތިން ޕޮއިންޓާއެކު ޝާޒު ވަނީ މެޗުން މޮޅުވެފަ އެވެ.

މި މޮޅާއެކު ޝާޒު އަކީ ދުނިޔޭގެ ރޭންކިން އަށް ކުޅޭ މުބާރާތެއްގައި ވާދަކުރާނެ ފުރަތަމަ ދިވެހި ކުޅުންތެރިޔާ އެވެ. މީގެ އިތުރުން ރާއްޖޭގައި ކުރިއަށްދާ ބިލިއާޑު މުބާރާތުގެ ނޮކްއައުޓު ބުރުން ޖާގަ ހޯދި ފުރަތަމަ ކުޅުންތެރިޔަކީ ވެސް ޝާޒު އެވެ.

ބުދަ ދުވަހުގެ ނިޔަލަށް ރާއްޖޭގައި ކުރިއަށް ދާ މުބާރާތުގެ ނޮކްއައުޓު މެޗުތައް ކުޅުމަށް ހަމަޖެހިފައި ވަނީ ހޯމަ ދުވަހު އެވެ. ހޯމަ ދުވަހު ފުރަތަމަ ކުރިއަށް ދާނީ ގަދަ 32ގެ މެޗުތަކެވެ. އެއަށްފަހު ގަދަ 16ގެ މެޗުތައް ވެސް ކުރިއަށް ދާނެ އެވެ.