ރާއްޖޭގެ ދެ ކުލަބަކުން އޮއްޕޮ ހޯދުމަށް މަސައްކަތް ކުރަނީ
10 މެއި 2017 | ބުދަ 19:33އޮއްޕޮ ސޮއެކުރާނެ ކަމަށް ބޮޑަށް ބެލެވެނީ ނިއުރޭޑިއަންޓަށް
ނިއުރޭޑިއަންޓަށް އޮއްޕޮ ކުޅުނު މެޗެއްގެ ތެރެއިން
ރާއްޖޭގެ ގައުމީ ޓީމުގެ ކުރީގެ ކުޅުންތެރިޔާ އިބްރާހިމް ފަޒީލް (އޮއްޕޮ) ހޯދުމުގެ މަސައްކަތް ފުރަތަމަ ޑިވިޝަނުގެ ދެ ކްލަބަކުން ފަށަފައިވާ ކަމުގެ ވާހަކަތަކެއް ފެތުރިއްޖެ އެވެ.
ރާއްޖެ އެމްވީއަށް އިތުބާރުހުރި ގޮތަކަށް މައުލޫމާތު ލިބިފައިވާ ގޮތުގައި އޮއްޕޮ ހޯދުމުގެ މަސައްކަތް ކުރަމުން އަންނަ އެއް ކުލަބަކީ ރާއްޖޭގެ ފުޓުބޯޅައިގެ ދަގަ ބާރެށް ކަމަށްވާ ނިއުރޭޑިއަންޓް ސްޕޯޓްސް ކުލަބުންނެވެ. މިފަހަރުގެ ސީޒަނަށް ބޮޑު ބަދަލުތަކަކާއެކު ނިކުމެ ރަނގަޅު ނަތީޖާތަކެށް ނިއުރޭޑިއަންޓުން ދައްކަމުން އަންނައިރު އޮއްޕޮ ސޮއެކުރާނެ ކަމަށް ބޮޑަށް ބެލެވެނީ ނިއުރޭޑިއަންޓަށެވެ. ނަމަވެސް މިކަމާގުޅިގެ އަދި ރަސްމީ ސްޓޭޓްމަންޓެށް ނިއުއިން ހާމަކޮށްފައެއް ނުވެއެވެ.
ވަރަށް ޒުވާން އުމުރެއްގައި ގައުމީ ޓީމުން ޖާގަ ހޯދައި އޮއްޕޮ ވަނީ މެދުކެނޑުމެއްނެތި 14 އަހަރު ގައުމީ ޓީމަށް ކުޅެދީފައެވެ. އަދި 2008 ވަނަ އަހަރު ދިވެހި ފުޓުބޯޅާގައި ގައުމީ ޓީމުން ހޯދި ފުރަތަމަ ރަން މެޑަލް ހޯދުމުގައިވެސް އޮއްޕޮ ވަނީ މުހިންމު ދައުރެއް އަދާކޮށްދީފައެވެ. އެ ގޮތުން އެފަހަރު ސާފް ޗެމްޕިއަންޝިޕް މުބާރާތުގެ ފައިނަލަށް ރާއްޖެ ގެންގޮސްދިން ލަނޑު ކާމިޔާބުކޮށްދީފައިވަނީ އޮއްޕޮއެވެ.
އޮއްޕޮ ވަނީ މީގެ ކުރިން ރާއްޖޭގެ ފުރަތަމަ ޑިވިޝަނުގެ ގިނަ ކްލަބުތަކަށް ކުޅެފައެވެ. އަލުން ރާއްޖޭގެ ފުރަތަމަ ޑިވިޝަނަށް އޮއްޕޮ އަންނަން އުޅޭކަމުގެ ހަބަރު ފެތުރިފައިވާއިރު ވޭލްސްގެ ހަ ވަނަ ޑިވިޝަނުގެ ކްލަބެއް ކަމަށްވާ ބޯޑޮގަން އަށް ކުޅުމަށްފަހު އޮއްޕޮ މިވަގުތު ހުރީ މާލޭގައެވެ. އޮއްޕޮ އަކީ ޔޫރަޕްގެ ކުލަބަކަށް ކުޅުނު ފުރަތަމަ ދިވެހި ކުޅުންތެރިޔާއެވެ. މީގެ ކުރިން އޮއްޕޮ ވަނީ ބުރުނާއީގެ ޑީޕީއެމް އަށްވެސް ކުޅެފައެވެ.
