ބަޔަކު މީހުން މުޒާހަރާކޮށްގެން އެޑިޔުކޭޝަންގެ އުސޫލުތަކަށް ބަދަލު ނުގެންނަކަމަށް، އެޑިޔުކޭޝަން މިނިސްޓަރު ޑރ. އާއިޝަތު އަލީ ވިދާޅުވެއްޖެއެވެ.

މެދު ހެންވޭރު ދާއިރާގެ މެންބަރު އަލީ އާޒިމް، ރައްޔިތުންގެ މަޖިލީހުގައި ކުރެއްވިސުވާލަށް ޖަވާބުދެއްވަމުން މިނިސްޓަރު ވިދާޅުވީ، އުސޫލުތަކަށް ބަދަލު ގެނައުމުގައި ވަކި މަރުހަލާތަކެއް އޮންނަ ކަމަށާއި، އެ މަސައްކަތް ކުރުމަށް ވަކި ޚާއްސަ ޓެކްނިކަލް ޓީމެއް އޮންނަކަމަށެވެ. އަދި ވިދާޅުވީ އުސޫލަކަށް ބަދަލު ގެންނަންޖެހޭ ހާލަތެއްގައި އެމަސައްކަތް ކުރާނީ ޓެކްނިކަލް ކޮމިޓީން ބެލުމަށްފަހު ކަމަށެވެ.

މިނިސްޓަރު ވިދާޅުވީ ދާދި ފަހުން އުސޫލުތަކަށް ބަދަލު ގެނައީ ތައުލީމުގެ ގާނޫނާ ގުޅިގެން ކަމަށެވެ. އެއީ ބަޔަކު މީހުން މުޒާހަރާކޮށްގެން ގެންނަ ބަދަލެއް ނޫންކަމަށް މިނިސްޓަރު ވިދާޅުވިއެވެ.

ބަޔަކު މީހުން މުޒާހަރާއެއް ކޮށްގެން އުސޫލުތަކަށް ބަދަލު ނުގެންނަ ކަމަށް މިނިސްޓަރު ވިދާޅުވެފައިވާއިރު، މެމްބަރު އަލީ އާޒިމް ވިދާޅުވީ ތައުލީމީ ދާއިރާއާ ގުޅުންހުރި ކަންކަމުގައި ބައެއް ބެލެނިވެރިންނާއި، ދަރިވަރުން ނުކުމެ މުޒާހަރާ ކުރުމުން ވަރަށް އަވަހަށް އުސޫލުތަކަށް ބަދަލު އަންނަކަން ފާހަގަކުރެވޭ ކަމަށެވެ. އެގޮތަށް އުސޫލުތަކަށް ބަދަލު ގެނައުމަކީ ރަނގަޅު ގޮތެއް ނޫން ކަަމަށް މެމްބަރު ވިދާޅުވިއެވެ. ނަމަވެސް ބަދަލު ގެނައީ ކޮން އުސޫލަކަށް ކަމެއް މެމްބަރު ވިދާޅުވެފައެއް ނުވެއެވެ.

މިފަހުން އެޑިޔުކޭޝަން މިނިސްޓްރީން ވަރަށް ރަނގަޅު ބަދަލުތަކެއް ބައެއް އުސޫލުތަކަށް ވަނީ ގެނެސްފައެވެ. އެގޮތުން އަރަބިއްޔާ ސްކޫލުގައި ކިޔަވާ ދަރިވަރުންނަށް ވެސް އޯލެވެލް އަދި އޭލެވެލްގެ ގަދަ 10ގައި ވާދަ ކުރެވޭ ގޮތަށް އުސޫލު ބަދަލުކޮށްފައިވެއެވެ.

މީގެ ކުރިން އަރަބިއްޔާ ސްކޫލުން ކިޔަވާ ދަރިވަރުންނަށް ގަދަ 10ގައި ވާދައެއް ނުކުރެވެ އެވެ. ނަމަވެސް އޭޕްރީލް މަހުގެ 4 ވީ އަންގާރަ ދުވަހު އުސޫލު ބަދަލު ގެނެސްފައިވަނީ ގަދަ 10ގައި އަރަބިއްޔާ ސްކޫލަށް ވާދަކުރެވޭގޮތަށެވެ. އުސޫލުގައި ބުނެފައި ވަނީ ގަދަ 10 ހޮވުމަށް މީގެ ކުރިން އިނގިރޭސި މީޑިއަމަށް ބެލި ނަމަވެސް އަރަބި މީޑިއަމަށް ކިޔަވައިދޭ ސްކޫލުތަކުގައި ޝަހާދާއި އިއުދާދީ އިމްތިހާނުގެ ނަތީޖާ ވެސް ގަބޫލުކުރާނެ ކަމަށެވެ.