އިނގިރޭސި ކެޕްޓަނަށް ވޯލްޑްކަޕް ނުކުޅެވޭނެ

އިނގިރޭސި ގައުމީ އަންހެން ޓީމުގެ ކެޕްޓަން ލިއާ ވިލިއަމްސަންއަށް ވޯލްޑްކަޕުގައި ނުކުޅެވޭނެކަން ކަށަވަރުވެއްޖެ އެވެ.

އާސެނަލްއަށް ކުޅެމުން އަންނަ, 26 އަހަރުގެ ކުޅުންތެރިޔާގެ ލިގަމެންޓަށް އަނިޔާވީ މިދިޔަ ބުދަ ދުވަހު މެންޗެސްޓަރ ޔުނައިޓެޑާ ދެކޮޅަށް ކުޅުނު މެޗުގައެވެ.

ވޯލްޑްކަޕުގައި އިނގިރޭސިން ކުޅޭ ފުރަތަމަ މެޗު އޮންނާނީ އަންނަ ޖުލައި މަހުގެ 22 ވަނަ ދުވަހު ހެއިޓީއާ ދެކޮޅަށެވެ. މިކަހަލަ އަނިޔާ ރަނގަޅުވާން އާއްމުކޮށް 6 ނުވަތަ 9 މަސްދުވަސް ހޭދަވާނެއެވެ. މި އަނިޔާގެ ސަބަބުން އޭނާއަށް މި ސީޒަނުގެ ޗެމްޕިއަންސް ލީގުގައިވެސް ދެން ނުކުޅެވޭނެއެވެ. މި މުބާރާތުގައި އާސެނަލް މިވަގުތު އޮތީ ސެމީ ފައިނަލްގައެވެ.

އޮސްޓްރޭލިޔާއާއި ނިއުޒީލޭންޑްގައި ބާއްވާ ވޯލްޑްކަޕުގައި އިނގިރޭސި ޓީމަށް ޗެލްސީގެ މިލީ ބްރައިޓަށްވެސް އަނިޔާގެ ސަބަބުން ނުކުޅެވޭނެއެވެ. އަދި ޗެލްސީގެ ފޯވަޑް ފްރަން ކިރްބީއަށްވެސް ކުޅެވޭނެ ކަމާމެދު ޔަގީންކަމެއް ނެތެވެ.